ភ្ជាប់​ទៅ​គេហទំព័រ​ទាក់ទង

សេចក្តី​ប្រកាស​​សកល​ស្តី​ពី​ការ​ប្រយុទ្ធនឹង​​អំពើ​ពុករលួយ​ត្រូវបាន​ចុះ​ហត្ថលេខា


ទិដ្ឋភាព​នៃ​ការ​ធ្វើ​បាតុកម្ម​ប្រឆាំង​នឹង​អំពើ​ពុក​រលួយ​នៅ​ប្រទេស​ថៃ​។

បាងកក ប្រទេស​ថៃ៖​ ក្រុម​អ្នក​ជំនាញប្រឆាំងអំពើ​ពុក​រលួយ​បានជួបប្រជុំគ្នានៅក្នុងប្រទេសថៃ ហើយបានផ្តល់អនុសាសន៍ជាច្រើន​ដើម្បីប្រយុទ្ធប្រឆាំង​អំពើពុករលួយនៅទូទាំងពិភព​លោក​។

សន្និ​សិទ្ធអន្តរ​ជាតិលើក​ទី​១៤​ ស្តី​ពី​ការ​ប្រឆាំង​អំពើ​ពុក​រលួយ ដែល​ត្រូវ​បានរៀបចំឡើង​នៅ​ទី​ក្រុងបាង​កក បាន​បញ្ចប់​ទៅ ដោយ​មាន​ការ​សន្យា​ពី​ប្រទេស​ដែលបានចូលរួមនៅក្នុងសន្និសិទ្ធនេះ​ ថា​នឹង​ពន្លឿនកិច្ចខិត​ខំប្រឹង​ប្រែងក្នុងការប្រយុទ្ធ​ប្រឆាំង​អំពើ​ពុក​រលួយ និង​គោរព​ឲ្យបាន​ពេញ​លេញនូវ​កិច្ចព្រមព្រៀងស្តី​ពី​ការ​ប្រឆាំង​អំពើ​ពុក​រលួយ​ដែល​មាន​ស្រាប់។

ក្រុម​ប្រឹក្សា​មាន​ការ​សោក​ស្តាយ​ ដោយ​ហេតុ​ថា ​ប្រទេស​ជា​ច្រើន​មិន​ទាន់បាន​ផ្តល់សច្ចាប័ន​ ​ឬអនុវត្តអនុសញ្ញា​អង្គ​ការសហ​ ប្រ​ជា​ជាតិ​ស្តី​ពីការប្រឆាំងអំពើ​ពុក​រលួយដែល​មានស្រាប់​នោះ​ទេ។​ អនុ​សញ្ញា​នេះ​បាន​ចូល​ជា​ធរមាននៅ​ឆ្នាំ​២០០៥ ហើយ​បាន​កំណត់​សកម្ម​ភាព ស្តីអំពី​ការ​ទប់​ស្កាត់​ និង​ការដាក់​អំពើ​ពុក​រលួយទៅ​ជា​បទ​ឧក្រិដ្ឋ​ ហើយ​និងស្តីអំពី​កិច្ច​សហ​ប្រតិបត្តិ​ការអន្តរជាតិ​ និង​ការស្តារ​ឡើង​វិញនូវទ្រព្យ​សម្បត្តិ។

បន្ទាប់​ពី​ការ​ពិភាក្សា​រយៈ​ពេល​បួន​ថ្ងៃ​លើ​បញ្ហាពុក​រលួយ​ក្នុង​ផ្នែក​ឯកជន​ សន្តិសុខ ​និងសន្តិ​ភាព គោល​នយោ​បាយ​ការ​ផ្លាស់​ប្តូរ​អាកាស​ធាតុ និង​ការ​ដឹក​ជញ្ជូន​ជំនួយ ក្រុម​ប្រឹក្សា​បាន​ធ្វើ​សេចក្តី​សន្និ​ដ្ឋាន​ថា អំណាច​របស់​សង្គម​ស៊ីវិល​ ក្នុង​ការ​ប្រយុទ្ធ​ប្រឆាំងអំពើ​ពុក​រលួយ ​ត្រូវ​បានឲ្យ​តម្លៃតិចតួច​នា​ពេល​បច្ចុប្បន្ន​នេះ។

កញ្ញា​ អែមម៉ា​ សុវ៉ាណ្ណារ៉ាត់​ (Emma Suwannarat) ដែល​ជាតារា​ភាព​យន្ត គឺជាអ្នកធ្វើ​បទបង្ហាញ​សេចក្តី​ថ្លែង​ការណ៍​នេះ​ ដោយ​បាន​កត់​សម្គាល់ពី​ការវិវត្ត​ដ៍យឺត​ នៃ​អនុសញ្ញាអង្គ​ការ​សហ​ប្រជា​ជាតិ​ស្តី​ពី​ការ​ប្រឆាំង​អំពើ​ពុករលួយ​ដែល​មាន​ស្រាប់​។ កញ្ញា​បន្ត​ថា៖

«យើង​កត់​សម្គាល់​ឃើញ​ថា អនុសញ្ញា​អង្គ​ការ​សហ​ប្រជា​ជាតិស្តី​ពី​ការ​ប្រឆាំង​អំពើ​ពុក​រលួយ​ គឺ​ជាអនុសញ្ញា​ថ្មី​ស្រឡាង​ ពីព្រោះ​វាជា​ឧបករណ៍​សកល​ដំបូងបង្អស់​មួយ​ដែល​ត្រូវបាន​តាក់​តែង​ឡើង​ ដើម្បីដោះ​ស្រាយ​បញ្ហា​ពុក​រលួយ។​ គួរ​ឲ្យសោក​ស្តាយ​ ប្រទេស​ជា​ច្រើន​មិន​ទាន់​បាន​ផ្តល់​សច្ចា​ប័ន​ទៅ​លើ​អនុ​សញ្ញា​នេះ​ ឬ​មាន​ការ​យឺត​យ៉ាវក្នុង​ការ​អនុវត្ត​អនុសញ្ញា​នេះ​»។

សន្និសិទ​នេះ​ត្រូវ​បាន​ធ្វើ​ឡើង​ដំណាល​គ្នា​នឹង​ជំនួប​កំពូលនៃប្រទេស​ដែលមាន​សេដ្ឋ​កិច្ច​លូត​លាស់​ខ្ពស់​ជាង​គេ​បង្អស់​ G20 នៅ​ក្នុង​ទី​ក្រុង​សេអ៊ូល​ ប្រទេស​កូរ៉េខាង​ត្បូង ជា​ទី​ដែល​ក្រុម​មេដឹក​នាំ​បាន​សន្យា​ប្រយុទ្ធ​ប្រឆាំង​អំពើ​ពុក​រលួយ តាមរយៈ​ផែន​ការ​ប្រឆាំង​អំពើ​ពុក​រលួយ​របស់​ប្រទេស​គេ​រៀងៗ​ខ្លួន។​ សន្និសិទ​នេះ​ក៏​កើត​ឡើង​ដំណាល​គ្នា​ផង​ដែរ​ ជាមួយ​នឹង​កិច្ច​ប្រជុំ​ថ្នាក់​រដ្ឋ​មន្រ្តី​នៃ​កិច្ច​សហ​ប្រតិបត្តិ​ការសេដ្ឋ​កិច្ច​ក្នុង​តំបន់​អាស៊ី​ប៉ាស៊ី​ហ្វិក APEC ដែល​នៅទី​នោះ​ក្រុម​មេដឹក​នាំបាន​កំណត់​ថា អំពើ​ពុក​រលួយ​ គឺ​ជា​ការ​គំរាម​កំហែង​មួយ​ទៅ​នឹង​ភាពរុង​រឿង ​និងការ​អភិវឌ្ឍ។

ប្រធាន​បទ​សំខាន់​ក្នុង​របៀប​វារៈ​នៃសន្និសិទ្ធ​នេះ​ គឺបញ្ហា​ពុក​រលួយ គោល​នយោបាយផ្លាស់​ប្តូរ​អាកាស​ធាតុ ជា​ពិសេស​គឺ​ផែន​ការ​អភិរក្ស​ព្រៃ​ឈើ​ដែលគាំទ្រ​ដោយ​អង្គ​ការ​សហប្រជាជាតិ​ ការ​កាត់​បន្ថយការ​បញ្ចេញ​ឧស្ម័ន​កខ្វក់​ដែលកើតពីការ​កាប់​បំផ្លាញ​ និង​ការ​រិចរិល​ព្រៃ​ឈើ ដែល​ហៅ​កាត់ថា REDD។

លោកស្រី អែស្ទែល ផាច​ (Estelle Pach) អ្នក​វិភាគផែន​ការ​ REDD របស់​កម្ម​វិធីអភិវឌ្ឍអង្គ​ការ​សហ​ប្រជា​ជាតិ​ប្រចាំ​នៅក្នុង​ទី​ក្រុង​ញ៉ូវ​យ៉ក បាន​ព្រមាន​អំពី​លទ្ធភាព​ដែល​អាច​នឹង​នាំ​ឲ្យ​មានអំពើ​ពុក​រលួយនៅ​ក្នុង​ផែន​ការ​បច្ចុប្បន្ន​របស់​REDD។ លោកស្រីថ្លែងថា៖

«ហនិ​ភ័យ​គឺ​នៅ​ទី​នោះ​ ពី​ព្រោះ​អភិ​បាល​កិច្ច​ព្រៃ​ឈើគឺ​មិន​ល្អ​ឥត​ខ្ចោះ​នៅ​គ្រប់​ទី​កន្លែង​ទាំង​អស់ទេ​។ ​លំហូរ​ថវិកាដ៏​ច្រើនចេញពី​យន្តការរបស់​ REDD​នឹងបង្កើត​ឲ្យ​មានសក្តា​នុពល​សម្រាប់​អំពើ​ពុក​រលួយ​ក្នុង​ទ្រង់​ទ្រាយ​ធំ​ និង​ទ្រង់​ទ្រាយ​តូច»។

តំណាង​ជា​ច្រើន​មក​ពី​ប្រទេស​កំពុង​អភិវឌ្ឍ​ ដូចជាប្រទេស​ម៉ាល់ឌីវស៍ (Maldives) ​និយាយ​ថា ប្រទេស​របស់គេ​មាន​អារម្មណ៍​ថា គេ​មិនត្រូវ​បាន​អនុញ្ញាត​ឲ្យ​ចូលរួម​ចរចារ​ ហើយ​មាន​ជំនឿ​តិច​តួច​ចំពោះ​សេចក្តី​ស្មោះ​ត្រង់​របស់ប្រទេស​ជឿនលឿន​ ចំពោះ​ការ​ប្តេជ្ញា​ចិត្ត​របស់​ពួក​គេ​ក្នុង​ការ​អនុវត្ត​តាម​ការសន្យា​នៅ​ក្នុង​ផែន​ការ REDD។

តារា​ភាព​យន្ត អែមម៉ា​ សុវ៉ាណ្ណារ៉ាត់​ ដែល​ជា​អ្នកធ្វើ​បទ​បង្ហាញសម្រាប់​ក្រុម​ប្រឹក្សានេះ​បាន​និយាយ​ថា​ មានឱកាស​ក្នុង​ការ​កសាង​ទំនុក​ចិត្ត។ កញ្ញា​អែមម៉ា​ថ្លែង​ថា៖

«យើងផ្តល់អនុសាសន៍​ថា​ ឱន​ភាព​នៃ​ទំនុកចិត្តរវាង​ប្រទេស​កំពុង​អភិវឌ្ឍ​ និង​ប្រទេស​ជឿនលឿន​ នៅ​ក្នុង​ការ​ចរចារ​ស្តី​ពី​អាកាស​ធាតុ​អន្តរជាតិ​ នឹង​ត្រូវ​បាន​ធ្វើ​ឲ្យប្រសើរ​ឡើង​ ដោយ​យន្ត​ការ​ថ្មីៗ ​និង​ការ​ទទួល​ខុសត្រូវ​ទៅ​វិញ​ទៅ​មក​ នៅ​ក្នុង​កម្រិត​អន្តរ​ជាតិ»។

ក្រុម​ប្រឹក្សា​ក៏​បាន​ផ្តល់​អនុសាសន៍​ ដើម្បី​ធ្វើ​ឲ្យប្រសើរ​ឡើង​នូវ​តម្លា​ភាព​ធំធេង​ជាង​មុនក្នុង​ផ្នែក​ឯកជន​ និង​បាន​ជំរុញ​ឲ្យមាន​ការ​ដឹកនាំ​ និង​ឆន្ទៈ​នយោបាយខ្លាំង​ជាង​មុន​ ដើម្បី​ទប់ស្កាត់​ ​និង​បង្រ្កាប​អំពើ​ពុក​រលួយ​នៅ​ក្នុង​គ្រប់​ទម្រង់ទាំងអស់​៕

ប្រែ​សម្រួល​ដោយ​ ឌី ខាំបូលី

XS
SM
MD
LG