ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណបក្ស​ប្រឆាំង​របស់​ថៃ​អាច​នឹង​រួច​ខ្លួន​ពី​ការ​ចោទ​ប្រកាន់​ពី​បទ​បង្ក​អសន្តិសុខជាតិ ប៉ុន្តែ​ប្រឈម​មុខ​នឹង​ការ​រំលាយ​គណបក្ស


លោក Thanathorn Juangroongruangkit (រូប​កណ្តាល) មេដឹកនាំ​គណបក្ស​អនាគត​ថ្មី ឬ Future Forward ក្នុង​ប្រទេស​ថៃ ថ្លែង​ទៅ​កាន់​អ្នកសារព័ត៌មាន​នៅ​ក្នុង​សន្និសីទ​កាសែត​មួយ​នៅ​ទីស្នាក់ការ​កណ្តាល​របស់​គណបក្ស​នៅ​ក្នុង​ក្រុង​បាងកក កាលពី​ថ្ងៃទី២១ ខែមករា ឆ្នាំ២០២០។

ប្រជាជន​ថៃ​ជាច្រើន​បាន​បន្ទោស​លើ​យោធា​ដែល​មាន​អំណាច​នយោបាយ​នៅ​ក្នុង​រដ្ឋធម្មនុញ្ញ។ យោធា​ជា​អ្នក​តាក់តែង​រដ្ឋធម្មនុញ្ញ​នោះ​ឡើង​ដោយ​ខ្លួន​ឯង នៅ​ពេល​យោធា​កំពុង​កាន់​អំណាច​ដើម្បី​ធ្វើ​ឱ្យ​ការ​បោះឆ្នោត​ដែល​ធ្វើ​ឡើង​កាលពី​ឆ្នាំ​មុន​មាន​ប្រយោជន៍​ដល់​ខ្លួន។

តុលាការ​ធម្មនុញ្ញ​ថៃ​បាន​សម្រេច​ទម្លាក់​ការ​ចោទប្រកាន់​លើ​គណបក្ស​ប្រឆាំង​ដែល​រិះគន់​ខ្លាំងបំផុត​នៅ​ក្នុង​ប្រទេស​ថៃ​ពី​បទ​បង្ក​អសន្តិសុខ​ជាតិ នៅ​ថ្ងៃទី២១ ខែមករា។ ការណ៍​នេះ​ធ្វើ​ឲ្យ​គណបក្ស​នេះ​អាច​បន្ត​ដំណើរការ​ទៅ​មុខ​ទៀត ប៉ុន្តែ​អាច​នឹង​ធ្វើ​ឱ្យ​មាន​ការ​រំលាយ​គណបក្ស​ដោយសារ​តែ​ប្រាក់​កម្ចី​ដែល​គណបក្ស​នេះ​ទទួល​បាន​ និង​ដែល​ត្រូវ​បាន​គេ​ចោទ​ថា បាន​បំពាន​ច្បាប់​បោះឆ្នោត។

គណបក្សអនាគត​ថ្មី ឬ Future Forward បាន​ក្លាយ​ជា​គណបក្ស​ប្រឆាំង​ដ៏​សំខាន់​មួយ​នៃ​សម្ព័ន្ធ​ប្រឆាំង​នៅ​ក្នុង​សភា បន្ទាប់​ពី​ទទួល​បាន​ការ​គាំទ្រ​ដ៏​ខ្លាំង​ក្នុង​លំដាប់​ទី៣​ នៅ​ក្នុង​ការ​បោះឆ្នោត​សកល កាលពី​ខែមីនា ឆ្នាំ​២០១៩។ ការបោះឆ្នោត​នោះ​ធ្វើ​ឱ្យ​លោក​នាយករដ្ឋមន្ត្រី Prayut Chan-ocha​ ដែល​ធ្វើ​រដ្ឋប្រហារ​នៅ​ក្នុង​ឆ្នាំ២០១៤ អាច​កាន់​អំណាច​បន្ត​ទៀត។ ក្រុម​យោធា​បាន​កាន់​អំណាច​ដឹកនាំ​ប្រទេស​អស់រយៈពេល​៥ឆ្នាំ​មក​ហើយ។​

ទោះ​ជា​គណបក្ស​នេះ​ទើប​តែ​ត្រូវ​បាន​បង្កើត និង​នៅ​ក្មេង​ខ្ចី បើ​ប្រៀបធៀប​ទៅ​នឹង​គណបក្ស​ប្រឆាំង Pheu Thai ក៏​ដោយ គណបក្ស​នេះ​មាន​ភាព​សកម្ម​ជាង​ក្នុង​ការ​ប្រឆាំង​នឹង​ការ​ក្តោបក្តាប់​អំណាច​ជា​បន្តបន្ទាប់​របស់​យោធា​តាមរយៈ​គណបក្ស Palang Pracharath ដែល​ជា​គណបក្ស​តំណាង​របស់​យោធា និង​ព្រឹទ្ធសភា​ដែល​មាន​ការ​ចាត់តាំង​ពី​យោធា។ ​

លោក Natthaporn Toprayoon ដែល​ជា​មេធាវី និង​អតីត​ទីប្រឹក្សា​របស់​ការិយាល័យ​បណ្តឹង​រដ្ឋបាល​ក្នុង​ប្រទេស​ថៃ បាន​ដាក់​ពាក្យ​បណ្តឹង​កាលពី​ឆ្នាំ​មុន​ ដោយ​បាន​ចោទប្រកាន់​គណបក្សអនាគត​ថ្មី ឬ Future Forward ថា បាន​ព្យាយាម​ផ្តួល​រំលំ​របប​រាជានិយម ដែល​រដ្ឋធម្មនុញ្ញ​បាន​កំណត់​ថា មិន​អាច​ប៉ះពាល់​បាន។ ក្នុង​ការ​ការពារ​ក្តី​របស់​លោក លោក Natthaporn បាន​លើក​ឡើង​ពី​សុន្ទរកថា​របស់​ថ្នាក់​ដឹកនាំ បទបញ្ញត្តិ និង​សូម្បី​តែ​ស្លាកសញ្ញា​របស់​គណបក្ស ដែល​មាន​រាង​ត្រីកោណ។ លោក​បាន​អះអាង​ថា​ វា​ស្រដៀង​ទៅ​នឹង​សញ្ញា​របស់​អង្គការ Illuminati ដែល​ជា​អង្គការ​សម្ងាត់​មួយ​មាន​បំណង​គ្របដណ្តប់​ពិភពលោក​ទាំង​មូល។

គណបក្សគណបក្សអនាគត​ថ្មី ឬ Future Forward បាន​ច្រានចោល​នូវ​ការ​ចោទប្រកាន់​នោះ​ថា​ជា​ការ​ចោទប្រកាន់​បែប​នយោបាយ។ ​

នៅ​ក្នុង​ក្រុង​បាងកក កាលពី​ថ្ងៃទី២១ ខែ​មករា ឆ្នាំ២០២០ តុលាការ​ធម្មនុញ្ញ​បាន​ប្រកាស​ថា ភស្តុតាង​ដែល​បាន​ដាក់​មិន​មាន​គ្រប់គ្រាន់​ក្នុង​ការ​ចោទប្រកាន់​នោះ​ទេ។

លោក Thanathorn Juangroongruangkit មេដឹកនាំ​អនាគតថ្មី ឬ Future Forward​ បាន​ជួប​ជាមួយ​នឹង​អ្នក​គាំទ្រ​ដែល​សប្បាយរីករាយ​នៅ​ទីស្នាក់ការ​កណ្តាល​របស់​គណបក្ស និង​បាន​បង្ហាញ​ការ​បន្ទន់​ឥរិយាបថ ដោយ​បាន​អំពាវនាវ​ឱ្យ​គណបក្ស​ផ្សេងៗ​មក​ចូលរួម​ជាមួយ​នឹង​របៀបវារៈ​កំណែទម្រង់​របស់​ខ្លួន។

លោក​បាន​និយាយ​ថា៖ «យើង​សង្ឃឹម​ថា ប្រសិន​បើ​យើង​អាច​ដាក់​ស្នើ​ច្បាប់​ទៅ​សភា យើង​នឹង​ធ្វើ​ឱ្យ​បាន​ល្អជាង​ក្រុម​ប្រឆាំង និង​សម្ព័ន្ធ​កាន់​អំណាច​ និង​ធានា​ថា ច្បាប់​របស់​យើង​នឹង​ផ្តល់​ប្រយោជន៍​ដល់​ប្រជាពលរដ្ឋ​ទាំង​អស់​គ្នា»។

លោក​បាន​បន្ត​ថា៖ «នៅ​ក្រៅ​សភា យើង​នឹង​បន្ត​ធ្វើ​យុទ្ធនាការ​លើ​វិសោធនកម្ម​រដ្ឋធម្មនុញ្ញ​ឆ្នាំ២០១៧ ដោយសារ​តែ​យើង​ជឿ​ថា សង្គម​ថៃ​ទាំង​មូល​ត្រូវ​អង្គុយ​ពិភាក្សា​គ្នា និង​សម្រេច​ថា​ប្រទេស​បែប​ណា​ ដែល​ពួកគេ​ចង់​រស់នៅ​ទាំង​អស់​គ្នា»។

ប្រជាជន​ថៃ​ជាច្រើន​បាន​បន្ទោស​លើ​យោធា​ដែល​មាន​អំណាច​នយោបាយ​នៅ​ក្នុង​រដ្ឋធម្មនុញ្ញ។ យោធា​ជា​អ្នក​តាក់តែង​រដ្ឋធម្មនុញ្ញ​នោះ​ឡើង​ដោយ​ខ្លួន​ឯង នៅ​ពេល​យោធា​កំពុង​កាន់​អំណាច​ដើម្បី​ធ្វើ​ឱ្យ​ការ​បោះឆ្នោត​ដែល​ធ្វើ​ឡើង​កាលពី​ឆ្នាំ​មុន​មាន​ប្រយោជន៍​ដល់​ខ្លួន។

លោក Thitinan Pongsudhirak អ្នក​វិភាគ​នយោបាយ និង​សាស្ត្រាចារ្យ​នៅ​សាកលវិទ្យាល័យ Chulalongkorn ក្នុង​ប្រទេស​ថៃ​និយាយ​ថា លោក​គិត​ថា គណបក្ស​បោះ​ជំហាន​ទៅ​អនាគត​អាច​គេច​ផុត​ពី​ការ​ចោទប្រកាន់​ពី​បទ​បង្ក​អសន្តិសុខ​ជាតិ ដោយសារ​តែ​រឿងក្តី​នេះ​មើល​ទៅ​មិន​មាន​ទម្ងន់​នោះ​ទេ។

លោក​បាន​បន្ថែម​ថា តុលាការ​ធម្មនុញ្ញ​ដែល​រង​ការ​រិះគន់​ ដោយសារ​តែ​ការ​ដោះស្រាយ​របស់​ខ្លួន​ចំពោះ​បណ្តឹង​ពាក់ព័ន្ធ​នឹង​ការ​បោះឆ្នោត មាន​ភាព​ស្ទាក់ស្ទើរ​ក្នុង​ការ​រំលាយ​គណបក្ស​នេះ​ដោយ​ផ្អែក​លើ​មូលដ្ឋាន​ស្តួចស្តើង ឬ​ធ្វើ​ឱ្យ​គេ​យល់​ថា រាជវង្ស​មាន​ជាប់ពាក់ព័ន្ធ​នៅ​ក្នុង​នយោបាយ​នោះ​ទេ។​

ប៉ុន្តែ​លោក Thitinan​ បាន​និយាយ​ថា វា​មិន​ទាន់​ដល់​ពេល​ដែល​គណបក្ស​បោះ​ជំហាន​ទៅ​អនាគត​អាច​ដក​ដង្ហើម​បាន​ស្រួល​នោះ​ទេ ដោយ​លោក​យល់​ថា ការ​ចោទប្រកាន់​ពី​បទ​បង្ក​អសន្តិសុខ​ជាតិ​គ្រាន់​តែ​ជា «នុយ» សម្រាប់​រឿង​ក្តី​ប្រាក់​កម្ចី​ប្រឆាំង​នឹង​គណបក្ស​នេះ​ ដែល​តុលាការ​ធម្មនុញ្ញ​នឹង​ធ្វើ​ការ​សម្រេច​ចិត្ត​បន្ទាប់ ទោះ​បី​ជា​កាលបរិច្ឆេទ​មិន​ទាន់​ត្រូវ​បាន​កំណត់​ក្តី។

លោក Thanathorn ដែល​ជា​មហាសេដ្ឋី​ផ្នែក​គ្រឿង​បន្ទាស់​រថយន្ត​បាន​ផ្តល់​ប្រាក់​កម្ចី​យ៉ាង​ច្រើន​ដល់​គណបក្ស​ក្មេងខ្ចី​របស់​លោក​ នៅ​ក្នុង​រដូវកាល​ធ្វើ​យុទ្ធនាការ​កាលពី​ឆ្នាំ​មុន និង​រង​ការ​ចោទប្រកាន់​ថា បាន​បំពាន​ច្បាប់​ស្តី​ពី​ការ​កម្រិត​ប្រាក់​កម្ចី និង​ធនធាន​មូលនិធិ។

​គណបក្សអនាគត​ថ្មី ឬ Future Forward បាន​បដិសេធ​ចំពោះ​ការ​បំពាន​ទាំង​នេះ និង​អនុគណៈកម្មាធិការ​ចំនួន​ពីរ​របស់​គណៈកម្មាការ​បោះឆ្នោត​ទំនង​ជា​យល់ស្រប​ថា​ គណបក្ស​នេះ​មិន​បាន​បំពាន​ច្បាប់​នោះ​ទេ នេះ​បើ​យោង​តាម​របាយការណ៍​ព័ត៌មាន​ក្នុង​ស្រុក​ដែល​លើក​ឡើង​ពី​កំណត់ត្រា​បែកធ្លាយ​របស់​គណៈកម្មការ​បោះឆ្នោត។ ជា​ការ​ឆ្លើយតប​ចំពោះ​ការ​បែក​ធ្លាយ​នោះ​ គណៈកម្មការ​បោះឆ្នោត​បាន​និយាយ​ថា អនុសាសន៍​របស់​អនុគណៈកម្មាធិការ​ក្នុង​ការ​ទម្លាក់​ចោល​ការ​ចោទប្រកាន់​នេះ​មិន​មាន​អានុភាព និង​អាច​ប្រឆាំង​នឹង​ការ​សម្រេច​ចិត្ត​របស់​គណៈកម្មការ​ក្នុង​ការ​បន្ត​ការ​ចោទប្រកាន់​នោះ​ទេ។

លោក Thitinan បាន​និយាយ​ថា៖ «ប្រសិន​បើ​មាន​ការ​សម្រេច​ចិត្ត​ក្នុង​ការ​រំលាយ​អនាគតថ្មី ឬ Future Forward ដោយសារ​តែ​ខ្លួន​ជា​គ្រោះថ្នាក់​នា​ពេល​បច្ចុប្បន្ន និង​ច្បាស់ៗ​ចំពោះ​រដ្ឋាភិបាល​របស់​លោក Prayut ពួកគេ​ត្រូវ​ស្វែងរក​រឿង​ក្តី​មួយ​ដើម្បី​ធ្វើ​ជា​សំអាង។ ខ្ញុំ​គិត​ថា រឿង​ក្តី​ប្រាក់​កម្ចី​អាច​ធ្វើ​ឱ្យ​ពួកគេ​មាន​សំអាង​ខ្លាំង​ជាង​រឿង​ក្តី​បង្ក​អសន្តិសុខ​ជាតិ»។​

លោក Prajak Kongkirati សាស្ត្រាចារ្យ​វិទ្យាសាស្ត្រ​នយោបាយ​នៅ​សាកលវិទ្យាល័យ Thammasat​ បាន​យល់ស្រប​ថា រដ្ឋាភិបាល​ទំនង​នឹង​ធ្វើ​ការ​កាត់ទោស​ និង​រំលាយ​អនាគតថ្មី ឬ Future Forward ដោយសារ​រឿងក្តី​ប្រាក់​កម្ចី។ លោក​និយាយ​ថា រឿង​ក្តី​នេះ​ «មាន​លក្ខណៈ​បច្ចេកទេស​ជាង» និង​ធ្វើ​ឱ្យ​មាន​ការ​ចាប់​អារម្មណ៍​ឡើង​វិញ​ចំពោះ​ការ​កាត់ទោស​របស់​តុលាការ​ទៅ​លើ​លោក Thanathorn នៅ​ក្នុង​ខែវិច្ឆិកា ចំពោះ​ការ​កាន់កាប់​ភាគហ៊ុន​នៅ​ក្នុង​ក្រុមហ៊ុន​ផ្សព្វផ្សាយ​ព័ត៌មាន​មួយ នៅ​ក្នុង​ពេល​ធ្វើ​យុទ្ធនាការ​បោះឆ្នោត។​ រឿង​ក្តី​ភាគហ៊ុន​នោះ​បាន​ធ្វើ​ឱ្យ​លោក Thanathorn បាត់បង់​កៅអី​នៅ​ក្នុង​សភា ប៉ុន្តែ​លោក​បាន​ច្រានចោល​ការ​ចោទប្រកាន់​នេះ។

ខណៈ​ដែល​គណបក្ស​នេះ និង​ថ្នាក់​ដឹកនាំ​របស់​ខ្លួន​កំពុង​ប្រឈមមុខ​នឹង​បណ្តឹង​ប្រមាណ​ជា​២០ គណបក្ស​បោះ​ជំហាន​ទៅ​អនាគត​នៅ​តែ​ជា​ការ​ប្រឆាំង​ដ៏​រឹងមាំ​សម្រាប់​រដ្ឋាភិបាល។

លោក Thitinan បាន​និយាយ​ថា លើស​ពី​គណបក្ស​ផ្សេងៗ​នៅ​ក្នុង​សម្ព័ន្ធ​ប្រឆាំង «គណបក្សអនាគត​ថ្មី ឬ Future Forward ​កំពុង​ធ្វើ​ការ​ប្រឈម​មុខ​ប្រថុយប្រថាន។​ គណបក្ស​នេះ​បាន​ធ្វើ​ការ​ប្រឆាំង​រដ្ឋាភិបាល និង​យោធា ដោយ​មិន​មាន​ការ​ភ័យខ្លាច។ ដូច្នេះ​ហើយ​បាន​ជា​ពួកគេ​កំពុង​ប្រឈម​មុខ​នឹង​ការ​រំលាយ»។

គណបក្ស​នេះ​បាន​ដឹកនាំ​ការ​ដេញដោល​ទៅ​លើ​ការ​ការពារ​របស់​រដ្ឋាភិបាល​ចំពោះ​ផែនការ​ថវិកា និង​បាន​អំពាវនាវ​ឱ្យ​បញ្ចប់​ការ​ចាប់​បង្ខំ​ឱ្យ​អនុវត្ត​កាតព្វកិច្ច​យោធា។ លោក Prajak បាន​និយាយ​ថា ការ​បោះឆ្នោត​ជា​រួម​របស់​គណបក្ស​នេះ​ប្រឆាំង​នឹង​ក្រឹត្យ​បន្ទាន់​នៅ​ក្នុង​ខែ​តុលា​ដើម្បី​ផ្ទេរ​អង្គភាព​យោធា​ចំនួន​ពីរ​ឱ្យ​ស្ថិត​នៅ​ក្រោម​ព្រះបរមរាជវាំង​គឺ​ជា​រឿង​ដ៏​សំខាន់​មួយ​ទៀត។

លោក​និយាយ​ថា «វា​ទំនង​នឹង​មិន​កើត​ឡើង​នោះ​ទេ។ អ្នក​វិភាគ ឬ​តាមដាន​ស្ថានភាព​នយោបាយ​គិត​ថា មិន​មាន​គណបក្ស​ណា​មួយ​នឹង​ហ៊ាន​ធ្វើ​រឿង​នេះ​នោះ​ទេ ប៉ុន្តែ​គណបក្សអនាគត​ថ្មី ឬ Future Forward ​បាន​ធ្វើ​វា។ ដូច្នេះ ច្បាស់​ណាស់​ពួកគេ​មាន​តាំងចិត្ត​ធ្វើ​អ្វី​ដែល​ពួកគេ​បាន​និយាយ​នៅ​ក្នុង​ពេល​ធ្វើ​យុទ្ធនាការ​បោះឆ្នោត​ថា ពួកគេ​ចង់​ផ្លាស់ប្តូរ​សង្គម​ថៃ។ ពួកគេ​ចង់​កែទម្រង់​កងទ័ព កាត់​បន្ថយ​អំណាច​របស់​កងទ័ព។ នេះ​ជា​អ្វី​ដែល​កងទ័ព និង​លោក Prayut មិន​អាច​អត់​ឱន​ឱ្យ​បាន»។​

នៅ​ទីស្នាក់ការ​កណ្តាល​របស់​គណបក្ស លោក Thanathorn សង្ឃឹម​ថា គណបក្សអនាគត​ថ្មី ឬ Future Forward​ នឹង​អាច​បន្ត​វត្តមាន​ទោះ​ជា​មាន​បណ្តឹង​នៅ​តុលាការ​ក៏​ដោយ។ ប៉ុន្តែ​គណបក្ស​នេះ​បាន​ត្រៀម​ខ្លួន​សម្រាប់​ការ​រំលាយ​ដែល​អាច​កើត​មាន​ឡើង មិន​ថា​ដោយសារ​មូលហេតុ​ល្អ ឬ​អាក្រក់​នោះ​ទេ។ តុលាការ​ថៃ​បាន​រំលាយ​គណបក្ស​ប្រឆាំង​ចំនួន​៣រួច​មក​ហើយ​ចាប់តាំង​ពី​ឆ្នាំ២០០៧មក។

គណបក្សអនាគត​ថ្មី ឬ Future Forward ​បាន​ប្រកាស​ពី​ផែនការ​របស់​ខ្លួន​ក្នុង​ការ​បង្កើត​គណបក្ស​តំណាង ដែល​អ្នក​តំណាងរាស្ត្រ និង​អ្នក​គាំទ្រ​របស់​ខ្លួន​អាច​យក​មក​ប្រើប្រាស់ នៅ​ពេល​គណបក្ស​នេះ​ត្រូវ​បាន​រំលាយ។

លោក Prajak និង​លោក Thitinan និយាយ​ថា សម្ព័ន្ធ​កាន់កាប់​អំណាច​ទំនង​នឹង​ទាក់ទាញ​យក​អ្នក​តំណាងរាស្ត្រ​ខ្លះ​របស់​អនាគតថ្មី ឬ Future Forward ប្រសិន​បើ​មាន​ការ​រំលាយ​គណបក្ស និង​ដើម្បី​បង្កើន​នូវ​សំឡេង​ភាគច្រើន​តិចតួច​របស់​ខ្លួន​នៅ​ក្នុង​សភា។ ប៉ុន្តែ​ពួកគេ​បាន​ព្រមាន​ថា វា​ក៏​អាច​ជា​សញ្ញា​បង្ហាញពី​ការ​ធ្វើ​បាតុកម្ម​កាត់​តែ​ធំ និង​កាន់​តែ​គ្រោះថ្នាក់​ដែល​ទាមទារ​ឱ្យ​រដ្ឋាភិបាល​ចុះ​ចេញ​ពី​តំណែង​ផង​ដែរ។​

សម្ព័ន្ធ​ប្រឆាំង​រដ្ឋាភិបាល​ចំនួន​ពីរ​បាន​ប្រមូល​ផ្តុំ​គ្នា​នៅ​ក្នុង​ក្រុង​បាងកក​ ដែល​មាន​មនុស្ស​រាប់ម៉ឺន​នាក់​នៅ​ក្នុង​ចុង​ខែធ្នូ និង​ដើម​ខែ​មករា៕

តួលេខនៃករណីឆ្លងជំងឺកូវីដ១៩

XS
SM
MD
LG