រដ្ឋាភិបាលយោធាថៃកំពុងខិតខំប្រឹងប្រែងជាថ្មីធ្វើការផ្សះផ្សាខាងនយោបាយនៅមុនការបោះឆ្នោតសកលដែលទំនងជានឹងប្រព្រឹត្តទៅនៅក្នុងឆ្នាំ២០១៨ខាងមុខនេះ។
កិច្ចខិតខំប្រឹងប្រែងថ្មីៗបំផុតដើម្បីបោះជំហានទៅមុខដើម្បីសម្រេច «ផែនទីបង្ហាញផ្លូវទៅកាន់លទ្ធិប្រជាធិបតេយ្យ» តាមរយៈកិច្ចចរចារវាងគណបក្សកំពុងត្រូវដឹកនាំដោយលោក Prawit Wongsuwan ឧបនាយករដ្ឋមន្ត្រី និងរដ្ឋមន្ត្រីការពារជាតិ។
លោក Prawit បានមានប្រសាសន៍ថា គោលដៅគឺធ្វើឱ្យមានការយល់ឃើញរួមគ្នា និងសុំទស្សនៈអំពីបញ្ហាមួយចំនួនដោយមានរួមបញ្ចូលនយោបាយ ការអភិវឌ្ឍសង្គម បរិស្ថាន កិច្ចការបរទេស និងបណ្តាញផ្សាយព័ត៌មាន។
លោក Panitan Wattanayakorn ទីប្រឹក្សានយោបាយរបស់លោក Prawit បាននិយាយថា ក្រុមយោធាកំពុងស្វះស្វែងឱ្យមាន «អន្តរកាលនៃអំណាចយ៉ាងរលូន» ទៅឱ្យរដ្ឋបាលស៊ីវិលមួយ។
ការផ្តើមគំនិតថ្មីនេះជាផ្នែកមួយនៃកំណែទម្រង់ជាតិដែលក្រុមយោធាយល់ឃើញថា ជាគន្លឹះមួយដោយរដ្ឋាភិបាលបានបង្កើតគណៈកម្មាធិការបួនដើម្បីជួយចាត់វិធានការតាមរយៈ «ផែនទីបង្ហាញផ្លូវខាងនយោបាយ»។
លោក Panitan បានថ្លែងថារដ្ឋាភិបាលចង់ស្តាប់កង្វល់របស់ពួកអ្នកនយោបាយ និងកត់ត្រាគំនិតរបស់ពួកគេក្នុងដំណើរការនេះ៕
