ប្រទេសថៃ មានកំណត់ត្រាឆ្លងវីរុសកូរ៉ូណារហូតដល់១១.៣០៥ ករណី កាលពីថ្ងៃទី២០ខែកក្កដា និងបន្ថែមចំនួនអ្នកស្លាប់រាប់សិប ឡើងដល់៣.៤០៨ នាក់ ចាប់តាំងពីខែមេសាមក។ ប្រទេសថៃ ទទួលបានការសរសើរចំពោះការទប់ទល់ការរាតត្បាតនៃជំងឺកូវីដ១៩ កាលពីពេលដំបូង។
កំណើនចាប់តាំងពីខែមេសាមកនេះ បានធ្វើឱ្យមានការប្រឈមផ្នែកនយោបាយឡើងវិញចំពោះលោកនាយករដ្ឋមន្ត្រី Prayuth ដែលបានដណ្តើមអំណាចនៅក្នុងរដ្ឋប្រហារឆ្នាំ២០១៤ និងបានយកឈ្នះការតវ៉ាគាំទ្រលទ្ធិប្រជាធិបតេយ្យអស់ជាច្រើនខែកាលពីឆ្នាំមុន ដោយបានបង្ក្រាបចលនាតវ៉ានោះជាមួយនឹងបទចោទផ្សេងៗ និងការឆ្លើយតបយ៉ាងខ្លាំងក្លាពីប៉ូលិស។
ឥឡូវនេះ សូម្បីតែអ្នកជំនាញជាន់ខ្ពស់ផ្នែកសុខភាពទទួលស្គាល់ថា ប្រទេសថៃធ្វើការយឺតយ៉ាវទប់ទល់នឹងរលកនៃការឆ្លងរាលដាលចុងក្រោយបង្អស់នេះ និងមានភាពយឺតយ៉ាវក្នុងការចាក់វ៉ាក់សាំងជូនពលរដ្ឋ ហើយមកទល់ពេលនេះ មានប្រជាជនតែប្រមាណ៣,៥ លាននាក់ប៉ុណ្ណោះ ក្នុងចំណោមប្រជាជនសរុប៧០ លាននាក់ បានចាក់វ៉ាក់សាំងគ្រប់ដូស។
លោក Prasit Watanpana ជាព្រឹទ្ធបុរសនៃមហាវិទ្យាល័យឈ្មោះ Medicine Siriraj Hospital មានន័យថា មន្ទីរពេទ្យសេរីរាជវេជ្ជសាស្ត្រ និងមានតួនាទីជាសមាជិកអភិបាលដោយមិនទទួលប្រាក់កម្រៃនៅក្នុងក្រុមហ៊ុន Siam Bioscience គឺវិទ្យាសាស្ត្រជីវសាស្ត្រសៀមរបស់ព្រះមហាក្សត្រថៃដ៏មានអំណាច ដែលមានអាជ្ញាបណ្ណក្នុងការផលិតវ៉ាក់សាំង AstraZeneca ក្នុងស្រុក បានថ្លែងនៅក្នុងវេទិកាពិភាក្សាឈ្មោះ Clubhouse កាលពីថ្ងៃអាទិត្យពាក់កណ្តាលខែកក្កដាថា «យើងបានបញ្ជាទិញវ៉ាក់សាំងយឺតពេក»។
លោកបានបន្ថែមទៀតថា «យើងគិតថា យើងអាចគ្រប់គ្រងអ្វីៗបានហើយ»។
ស្របពេលដែលកំណើនការឆ្លងនេះ ប៉ះពាល់ដល់ការសន្យារបស់រដ្ឋាភិបាលក្នុងការបើកប្រទេសឡើងវិញចំពោះភ្ញៀវទេសចរសំខាន់ៗមួយចំនួននៅត្រឹមខែតុលា អ្នកតវ៉ាចាប់ផ្តើមនាំគ្នាតវ៉ានៅតាមដងផ្លូវក្នុងរាជធានីបាងកកឡើងវិញ។
មនុស្សជាង១.០០០នាក់ កាលពីថ្ងៃអាទិត្យពាក់កណ្តាលខែកក្កដា បានប្រឆាំងនឹងវិធានការបិទខ្ទប់ទីក្រុងស្ទើរតែទាំងស្រុង និងប្រឆាំងបទបញ្ជាបន្ទាន់មួយដែលហាមឃាត់មិនឱ្យមានការប្រមូលផ្តុំមនុស្ស៥នាក់ ឬលើសពីនេះ។ ពួកគេទាមទារឱ្យរដ្ឋាភិបាលចុះចេញពីតំណែង។
អ្នកតវ៉ាដែលដុតរូបរបស់លោក Prayuth នៅក្បែរវិមានរដ្ឋាភិបាល ត្រូវបានប៉ូលិសប្រឆាំងកុបកម្មបង្ក្រាបដោយប្រើឧស្ម័នបង្ហូរទឹកភ្នែក ឡានបាញ់ទឹក និងបាញ់កាំភ្លើងគ្រាប់ជ័រ។
ក្រុមបាតុករនិយាយថា ការចាក់វ៉ាក់សាំងជូនពលរដ្ឋយឺតយ៉ាវជាឧទាហរណ៍មួយនៃការដឹកនាំប្រទេសដ៏ទន់ខ្សោយរបស់លោក Prayuth។
ពួកគេចង់ឱ្យរដ្ឋាភិបាលយកសាច់ប្រាក់ចេញពីខ្ទង់ចំណាយការពារជាតិមកទិញវ៉ាក់សាំងប្រភេទ mRNA ជំនួសវ៉ាក់សាំង Sinovac ដែលផលិតដោយចិន។ នៅប្រទេសថៃ មនុស្សជាច្រើនយល់ថា វ៉ាក់សាំង Sinovac មិនល្អនោះទេ។
លោក Attapon Buapat ប្រធានចលនាតវ៉ាគាំទ្រលទ្ធិប្រជាធិបតេយ្យបានប្រាប់ VOA ក្នុងសម្តីដើមថា «កូវីដបានបង្ហាញពីបញ្ហានៃប្រព័ន្ធដឹកនាំនៅថៃដែលមានដូចជា បញ្ហាឋានានុក្រម បក្ខពួកនិយម និងការការពារបក្ខពួកខ្លួន»។
ក្រុមហ៊ុនថៃចម្រុះដែលមានទ្រព្យសម្បត្តិច្រើនបំផុត ហើយដែលប្រតិបត្តិការហាងលក់ទំនិញ ជាម្ចាស់ភាគហ៊ុនមួយក្នុងចំណោមម្ចាស់ភាគហ៊ុនទាំងអស់របស់ក្រុមហ៊ុនផលិតវ៉ាក់សាំង Sinovac តាមរយៈភាគហ៊ុនរបស់ខ្លួននៅក្នុងក្រុមហ៊ុនមួយទៀត ដែលនេះធ្វើឱ្យមានការមិនទុកចិត្តកាន់តែខ្លាំងលើវ៉ាក់សាំងនេះ។
ក្នុងពេលជាមួយគ្នានេះដែរ ការផលិតវ៉ាក់សាំង Astra-Zeneca នៅក្នុងប្រទេសត្រូវបានពន្យារពេលយ៉ាងចម្លែក ទោះបីជាមានគាំទ្រពីរាជវង្សថៃ ការគំរាមកំហែងកិច្ចព្រមព្រៀងចែកចាយវ៉ាក់សាំងនេះនៅទូទាំងតំបន់អាស៊ីអាគ្នេយ៍ក្តី។
ថ្លែងពីការយល់ស្របគ្នាច្រើនឡើងៗក្នុងចំណោមពលរដ្ឋដែលធ្លាប់មានការបែងបាក់រវាងអ្នកគាំទ្រ និងអ្នកប្រឆាំងនោះ លោក Attapon មេដឹកនាំអ្នកតវ៉ានិយាយថា «វាជាការប្រយុទ្ធប្រឆាំងនឹងរដ្ឋាភិបាលដ៏ខ្លាំងក្លាកាលពីឆ្នាំមុន ប៉ុន្តែវាមានតម្លៃ ដោយសារតែមនុស្សម្នាចាប់ផ្តើមភ្ញាក់ខ្លួនហើយឥឡូវនេះ»។
«ធ្វើការសម្រាប់ពលរដ្ឋខ្លួន»
អ្នកវិភាគនិយាយថា កំណើនឆ្លងជំងឺឡើងវិញនេះ បានធ្វើឱ្យមនុស្សចាស់ដែលមានគំនិតអភិរក្សនិយមមានការយល់ស្របដោយទើសទាល់ជាមួយនឹងក្រុមអ្នកគាំទ្រលទ្ធិប្រជាធិបតេយ្យ។
លោក Thitinan Pongsudhirak អ្នកវិភាគនយោបាយនៅវិទ្យាស្ថានសិក្សាអន្តរជាតិ និងសន្តិសុខនៃមហាវិទ្យាល័យវិទ្យាសាស្ត្រនយោបាយនៃសាកលវិទ្យាល័យ Chulalongkorn បានថ្លែងប្រាប់ VOA ក្នុងសម្តីដើមថា «ខណៈដែលអ្នកតវ៉ាក្មេងៗមិនពង្រីកចលនាកំណែទម្រង់របស់ខ្លួនដើម្បីបញ្ចូលមនុស្សចំណាស់ៗ ការរាតត្បាតជំងឺកំពុងតែធ្វើរឿងនេះឱ្យពួកគេ»។
លោកបានបន្ថែមទៀតថា «ការគ្រប់គ្រងមិនត្រឹមត្រូវរបស់រដ្ឋាភិបាលលោក Prayuth ចំពោះជំងឺរាតត្បាតកំពុងពង្រីកការកើតទុក្ខដែលបានឃើញកាលពីឆ្នាំមុន។ វាកំពុងវិវត្តទៅជាវិបត្តិនយោបាយជាប្រវត្តិសាស្ត្រ»។
បរាជ័យលើបញ្ហាវ៉ាក់សាំងបានបង្កើតការផ្ទុះប្រតិកម្មយ៉ាងខ្លាំងនៅក្នុងបណ្តាញសង្គមថៃ រាលដាលដល់មនុស្សច្រើនលាននាក់ដែលកំពុងជាប់នៅក្នុងផ្ទះ។ មនុស្សជាច្រើនមិនអាចចុះឈ្មោះសម្រាប់ការចាក់វ៉ាក់សាំងបានទេ ដោយសារតែវ៉ាក់សាំងមិនគ្រប់ ហើយគេហទំព័រ និងកម្មវិធីអ៊ីនធឺណិតរដ្ឋាភិបាលមានការរអាក់រអួលដោយសារតែមានតម្រូវការពីសាធារណជនច្រើនហួសហេតុ។
អាជ្ញាធរសុខាភិបាលកាលពីថ្ងៃទី២០ ខែកក្កដាកន្លងទៅបាននិយាយថា រដ្ឋាភិបាលបានចុះកិច្ចព្រមព្រៀងជាមួយក្រុមហ៊ុន Pfizer ដើម្បីទិញវ៉ាក់សាំងចំនួន២០ លានដូសនៅត្រឹមចុងឆ្នាំនេះ និងទិញចំនួនទ្វេដងនៅក្នុងឆ្នាំ២០២២ ប៉ុន្តែការណ៍នេះយឺតពេលទៅហើយ។
បន្ទាប់ពីចុះហត្ថលេខាលើកិច្ចព្រមព្រៀងជាមួយក្រុមហ៊ុន Pfizer រួច លោក Anutin Charnvirakul រដ្ឋមន្ត្រីសុខាភិបាលបានសរសេរនៅលើទំព័រហ្វេសប៊ុកផ្លូវការរបស់លោកថា «ខ្ញុំធានាថា រដ្ឋាភិបាលនឹងមិនអង្គុយស្ងៀមនោះទេនៅពេលនិយាយពីការទិញវ៉ាក់សាំងនោះ»។
«សូមទុកចិត្តចុះថា គោលនយោបាយរបស់យើង គឺទិញវ៉ាក់សាំងដែលមានគុណភាពល្អ និងត្រឹមត្រូវតាមពេលកំណត់របស់យើង»។
ប៉ុន្តែការបន្ទោសរដ្ឋាភិបាលកំពុងកើនឡើងពីមួយថ្ងៃទៅមួយថ្ងៃ ដោយសារតែពលរដ្ឋថៃកាន់តែច្រើនយល់ថា ពួកគេកំពុងប្រយុទ្ធនឹងការរាតត្បាតជំងឺដោយខ្លួនឯង។
លោក Apichartpong Weerasethakul ជាផលិតករភាពយន្តថៃបានថ្លែងក្នុងសុន្ទរកថាថា «ខ្ញុំសំណាងណាស់ដែលបានឈរនៅទីនេះ ខណៈដែលបងប្អូនជនរួមជាតិខ្ញុំជាច្រើនមិនអាចធ្វើដំណើរបាន»។ លោកនិយាយដូច្នេះ ពេលលោកថ្លែងសុន្ទរកថាទទួលពានរង្វាន់ Jury Prize សម្រាប់ភាពយន្ត Memoria របស់លោកក្នុងទីក្រុង Cannes ប្រទេសបារាំង។
លោកបានបន្ថែមទៀតថា «ពួកគេជាច្រើនរងគ្រោះយ៉ាងខ្លាំងពីការរាតត្បាតជំងឺ ដោយសារការគ្រប់គ្រងមិនត្រឹមត្រូវផ្នែកធនធាន សេវាសុខាភិបាល និងការចាក់វ៉ាក់សាំង»។ លោកបានជំរុញឱ្យរដ្ឋាភិបាលថៃ «ភ្ញាក់ខ្លួនឡើង និងធ្វើការសម្រាប់ប្រជាជនខ្លួននៅពេលនេះ»៕
ប្រែសម្រួលដោយលោក ពិន ស៊ីសុវណ្ណ
