សំណើមួយរបស់គណបក្ស Move Forward ដែលឈ្នះការបោះឆ្នោតនៅប្រទេសថៃ ឲ្យចាត់ថ្នាក់កញ្ឆាជាគ្រឿងញៀនឡើងវិញ មួយឆ្នាំក្រោយពីរុក្ខជាតិនេះត្រូវបានដាក់ឲ្យស្របច្បាប់ កំពុងធ្វើឲ្យរំជើបរំជួលក្នុងវិស័យមួយដែលគេព្យាករថាអាចមានតម្លៃរហូតដល់១ពាន់២រយលានដុល្លារក្នុងរយៈពីរបីឆ្នាំទៀត។ នេះបើយោងតាមទីភ្នាក់ងារសារព័ត៌មាន Reuters។
ហាងរាប់ពាន់ បានលេចរូបរាងឡើងតាំងពីការដាក់ឲ្យស្របច្បាប់នូវការប្រើប្រាស់និងការដាំកញ្ឆានៅប្រទេសថៃ ដោយមានហាងជាច្រើននៅទីក្រុងបាងកកនិងតំបន់ទេសចរណ៍ដទៃទៀត លក់កញ្ឆាដល់អ្នកទេសចរនិងអ្នកជក់ជាជនជាតិថៃ។
គណបក្ស Move Forward កំពុងជំរុញការបង្កើតរដ្ឋាភិបាលថ្មី ក្រោយពីឈ្នះអាសនៈភាគច្រើនក្នុងការបោះឆ្នោតសកលកាលពីថ្ងៃទី១៤ខែឧសភា ដែលអ្នកបោះឆ្នោតបានបដិសេធយ៉ាងច្បាស់ក្រឡែតគណបក្សដែលមានចំណងទាក់ទងនឹងក្រុមយោធា ហើយប្រាថ្នាចង់បានប្រជាធិបតេយ្យដែលដឹកនាំដោយពលរដ្ឋស៊ីវិលឡើងវិញ។
ប្រហែលជារឿងគួរឲ្យភ្ញាក់ផ្អើលនោះ គឺគណបក្សមួយក្នុងជួររដ្ឋាភិបាលគាំទ្រដោយក្រុមយោធាដែលចេញពីអំណាចទៅវិញទេ ដែលជាអ្នកជ្រោមជ្រែងឱ្យមានភាពស្របច្បាប់នៃកញ្ឆាកាលពីឆ្នាំមុន ដែលដំបូងឡើយសម្រាប់ការប្រើប្រាស់កញ្ឆាជាឱសថ៕
វិស័យកញ្ឆាថៃចប់ហើយបើគណបក្សឈ្នះឆ្នោតធ្វើមោឃភាពភាពស្របច្បាប់
- Reuters
