សម្ព័ន្ធភាពដែលដឹកនាំដោយគណបក្ស Move Forward នៅប្រទេសថៃសង្ឃឹមថានឹងអាចព្រាងរដ្ឋធម្មនុញ្ញថ្មី បញ្ចប់ភាពផ្ដាច់មុខ និងអនុញ្ញាតឱ្យមានអាពាហ៍ពិពាហ៍របស់អ្នកស្រឡាញ់ភេទដូចគ្នា ក្នុងចំណោមគោលបំណងផ្សេងៗទៀត។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters ដែលយោងលើសេចក្ដីព្រាងនៃគោលបំណងរបស់គណបក្សនេះ ដែលនៅក្នុងសេចក្ដីព្រាងនោះមិនមានការលើកឡើងអំពីច្បាប់ប្រមាថព្រះមហាក្សត្រនោះទេ។
គណបក្ស Move Forward និងគណបក្ស Pheu Thai ឈ្នះបានសំឡេងឆ្នោតច្រើនជាងគេនៅក្នុងការបោះឆ្នោតកាលពីសប្ដាហ៍មុនដោយបានផ្ដួលគណបក្សអភិរក្សនិយមដែលគាំទ្រដោយយោធារាជានិយមដែលបានដឹកនាំរដ្ឋាភិបាលតាំងពីរដ្ឋប្រហារឆ្នាំ២០១៤មក។
ពួកគេមានបំណងបង្កើតរដ្ឋាភិបាលចម្រុះជាមួយនឹងគណបក្ស៦ផ្សេងទៀត។
គណបក្ស Move Forward បានឈ្នះការបោះឆ្នោតដ៏ភ្ញាក់ផ្អើល ដោយឈ្នះបានអាសនៈច្រើនជាងគេបំផុត បន្ទាប់ពីមានការគាំទ្រពីអ្នកបោះឆ្នោតដែលជាយុវជនដែលពេញចិត្តនឹងគោលការណ៍របស់គណបក្សដែលប្រឆាំងនឹងផលប្រយោជន៍និងស្ថាប័នអាជីវកម្មធំៗ ដែលក្នុងនោះរួមមានទាំងផែនការនៅក្នុងការកែទម្រង់ច្បាប់ប្រមាថព្រះមហាក្សត្រផងដែរ។
គណបក្សផ្សេងទៀតនៃសម្ព័ន្ធភាពនេះនៅមានចម្ងល់ចំពោះការកែទម្រង់ច្បាប់ប្រមាថព្រះមហាក្សត្រនេះ។
នៅពេលសួរអំពីបញ្ជីដំបូងៗនៃសំណើដែលព្រាងដោយគណបក្ស Move Forward នេះនិងចែកចាយក្នុងចំណោមសមាជិកសម្ព័ន្ធភាពគណបក្សនេះ អ្នកស្រី Bencha Saengchantra ដែលជាមន្ត្រីជាន់ខ្ពស់របស់គណបក្ស Move Forward បាននិយាយថា សមាជិកសម្ព័ន្ធភាពនេះបានព្រមព្រៀងលើផែនការនេះចំនួន ៨០% ទៅ ៩០% ហើយ «ប៉ុន្តែវានៅតែអាចកែសម្រួលបាន»៕
សម្ព័ន្ធភាពគណបក្សនៅថៃមានបំណងធ្វើកំណែទម្រង់ធំ ប៉ុន្តែមិនបានបញ្ជាក់អំពីច្បាប់ប្រមាថព្រះមហាក្សត្រទេ
- Reuters
ទីក្រុងបាងកក ប្រទេសថៃ —
