យោធាថៃបានចូលរួមចួលការជជែកពិភាក្សាអំពីប្រវត្តិសាស្ត្រនិងលទ្ធិប្រជាធិបតេយ្យនៅក្នុងប្រទេសអាស៊ីអាគ្នេយ៍មួយនេះ ដោយបានប្រារព្ធពិធីមួយក្នុងថ្ងៃដែលអ្នកគាំទ្រលទ្ធិប្រជាធិបតេយ្យថៃបានធ្វើបាតុកម្មនៅតាមវិមានដែលរំឭកដល់បដិវត្តន៍ឆ្នាំ១៩៣២ ដែលបានបញ្ចប់របបរាជានិយមផ្តាច់ការរបស់ថៃ។
ជម្លោះអំពីប្រវត្តិសាស្ត្រនេះកើតមានឡើងខណៈដែលពលរដ្ឋថៃកាន់តែច្រើននិយាយប្រឆាំងនឹងប្រព័ន្ធនយោបាយមួយដោយក្តោបក្តាប់ដោយយោធា ហើយខណៈដែលវិមានជាច្រើនតំណាងឲ្យការស្ថាបនាលទ្ធិប្រជាធិបតេយ្យនៅក្នុងប្រទេសថៃកាលពីឆ្នាំ១៩៣២ ត្រូវបានគេដកចេញដោយអាថ៌កំបាំងក្នុងពេលថ្មីៗនេះ។
សេចក្តីថ្លែងការណ៍មួយរបស់យោធាថៃដែលត្រូវទីភ្នាក់ងារព័ត៌មានReuters បានឃើញកាលពីថ្ងៃព្រហស្បតិ៍បានបញ្ជាក់ថា មន្ត្រីយោធាបានធ្វើពិធីរំឭកគុណនៅទីបញ្ជាការកណ្តាលក្នុងក្រុងបាងកកដល់មេដឹកនាំនៃអ្វីដែលគេហៅថាចលនាបះបោរBoworadet ដែលបរាជ័យកាលពីឆ្នាំ១៩៣៣។ ចលនាបះបោរ Boworadetដែលយកតាមព្រះនាមនៃព្រះអម្ចាស់ថៃមួយអង្គ ត្រូវបានប្រវត្តិវិទូជាទូទៅពិពណ៌នាថា ជាកិច្ចប្រឹងប្រែងដើម្បីបង្កើតឡើងវិញនូវប្រព័ន្ធរាជានិយមផ្តាច់ការ ប៉ុន្តែសេចក្តីថ្លែងការណ៍របស់យោធាថៃនិយាយថា យោធាថៃប្រឆាំងនឹងការគ្រប់គ្រងដោយ«ផ្តាច់ការ»។
កន្លងមកយោធាថៃតែងយកតួនាទីខ្លួនជាអ្នកការពារស្ថាប័នរាជានិយមថាជាហេតុផលនៃការធ្វើរដ្ឋប្រហារកាលពីឆ្នាំ២០០៦និង២០១៤។ ក្រោយពីបានដឹកនាំរដ្ឋាភិបាលយោធាដែលជំនួសឲ្យរដ្ឋាភិបាលថៃកើតឡើងតាមការបោះឆ្នោតដោយប្រជាធិបតីនោះ លោក Prayuth Chan-ocha មេបញ្ជាការកងទ័ពថៃបន្តនៅកាន់តំណែងជានាយករដ្ឋមន្ត្រីក្រោយពីការបោះឆ្នោតដ៏ចម្រូងចម្រាស់មួយកាលពីឆ្នាំមុន។
ទោះបីប្រទេសថៃជារាជានិយមអាស្រ័យរដ្ឋធម្មនុញ្ញក្តី ក៏ព្រះមហាក្សត្រព្រះបាទMaha Vajiralongkorn មានឥទ្ធិពលយ៉ាងខ្លាំង ហើយការប្រមាថព្រះមហាក្សត្រអាចនាំឲ្យមានទណ្ឌកម្មជាប់ពន្ធនាគាររហូតដល់១៥ឆ្នាំ៕
