មេធាវីការពារក្តីឱ្យលោក ថាច់ សេដ្ឋា អនុប្រធានគណបក្សភ្លើងទៀន បានស្នើឱ្យតុលាការកំពូល«បដិសេធដីកាឃុំខ្លួន» ដែលចេញដោយចៅក្រមសាលាដំបូងរាជធានីភ្នំពេញ និងជំរុញតុលាការពិចារណាគោលការណ៍សេរីភាព ដោយជ្រើសរើសវិធីដាក់ឱ្យស្ថិតក្រោមការត្រួតពិនិត្យតាមផ្លូវតុលាការ ជាជាងការឃុំខ្លួនក្នុងពន្ធនាគារ។
កាលពីព្រឹកថ្ងៃចន្ទ តុលាការកំពូលបានបើកសវនាការជំនុំជម្រះលើបណ្តឹងសាទុក្ខរបស់លោក ថាច់ សេដ្ឋា ដែលកំពុងជាប់ក្តីក្តាំក្នុងសំណុំរឿងចំនួនពីរ ក្នុងនោះមានការចោទប្រកាន់ក្នុងបទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» និង«ញុះញង់ឱ្យមានការរើសអើង»។
ក្នុងសវនាការលើសំណុំរឿងញុះញង់នេះ លោក ជូង ជូងី មេធាវីការពារក្តីឱ្យលោក ថាច់ សេដ្ឋា បញ្ជាក់ទៅចៅក្រមតុលាការកំពូលថាការសំអាងរបស់ចៅក្រមស៊ើបសួរសាលាដំបូងថា ការឃុំខ្លួនលោក ថាច់ សេដ្ឋា ដើម្បីបញ្ចប់បទល្មើស បង្ការបទល្មើសកុំឱ្យកើតមានជាថ្មី និងខ្លាចជនត្រូវចោទរត់គេចខ្លួន គឺជារឿងមិនចាំបាច់ឡើយ។ លោកបន្ថែមថាតុលាការគួរតែពិចារណាសេរីភាពរបស់ជនត្រូវចោទ ដែលចែងក្នុងមាត្រា២០៣នៃក្រមនីតិវិធីព្រហ្មទណ្ឌ ស្តីអំពីគោលការណ៍នៃការឃុំខ្លួនបណ្តោះអាសន្ន។
មេធាវីរូបនេះអះអាងថាលោក ថាច់ សេដ្ឋា មិនដែលរឹងទទឹង មិនមានគំនិតប្រឆាំងនឹងនីតិវិធីតុលាការ និងមិនរត់គេចខ្លួននោះទេ ព្រោះលោកមានតួនាទីជាអនុប្រធានគណបក្សភ្លើងទៀន និងជាប្រធានសហគមន៍ខ្មែរកម្ពុជាក្រោមជាដើម។
បើតាមមេធាវី ការឃុំខ្លួននេះប៉ះពាល់ធ្ងន់ធ្ងរ ខណៈលោក ថាច់ សេដ្ឋា មានជំងឺប្រចាំកាយដូចជា«ខ្លាញ់រុំបេះដូង» និងជំងឺផ្សេងទៀត ដែលត្រូវការការព្យាបាលដិតដល់។
លោកមេធាវី ជូង ជូងី ស្នើតុលាការកំពូល«បដិសេធដីកាឃុំខ្លួន» ដោយពិចារណាមាត្រា២០៣ ទាក់ទងសេរីភាព និងគួរអនុវត្តតាមនីតិវិធីនៃការត្រួតពិនិត្យតាមផ្លូវតុលាការត្រង់មាត្រា២២៣នៃក្រមនីតិវិធីព្រហ្មទណ្ឌ ជាជាងការអនុវត្តការឃុំខ្លួនក្នុងពន្ធនាគារ ដែលលោកថាប៉ះពាល់សេរីភាពរបស់ជនត្រូវចោទ។
នៅខាងក្រៅតុលាការកំពូល លោក ជូង ជូងី បញ្ជាក់បន្ថែមត្រង់មាត្រា២០៣នៃក្រមនីតិវិធីព្រហ្មទណ្ឌថា៖ «ជាគោលការណ៍ ជនត្រូវចោទមានសេរីភាព បើកាលណា មិនមានភាពចាំបាច់ទេ មិនត្រូវឃុំខ្លួនបណ្តោះអាសន្នទេ»។
ក្នុងសម្លៀកបំពាក់អ្នកជាប់ឃុំ ពាក់អាវដៃវែងពណ៌ទឹកក្រូច និងមានពុកចង្កាស្កូវស្រមូម លោក ថាច់ សេដ្ឋា មិនត្រូវបានចៅក្រមអនុញ្ញាតឱ្យបញ្ចេញមតិ ឬសំណូមពរអ្វីនោះទេ ដោយត្រឹមមកអង្គុយស្តាប់នៅក្នុងសវនាការតែប៉ុណ្ណោះ។
លោក អ៊ុក គឹមសិទ្ធិ អគ្គព្រះរាជអាជ្ញារង និងជាតំណាងអយ្យការតុលាការកំពូលលើកឡើងថាការឃុំខ្លួនបណ្តោះអាសន្ន ជារឿងត្រឹមត្រូវ ដោយថាតុលាការមានឆន្ទានុសិទ្ធិសម្រេចឃុំខ្លួន ព្រោះនេះជាបទល្មើសព្រហ្មទណ្ឌ។
ក្រោយបញ្ចប់សវនាការ លោក ស៊ឹង បញ្ញាវុធ ចៅក្រមតុលាការកំពូល និងជាប្រធានប្រឹក្សាជំនុំជម្រះ បានឱ្យដឹងថា តុលាការកំពូលនឹងប្រកាសសាលដីកា នៅថ្ងៃ១៩ ខែមិថុនា ឆ្នាំ២០២៣។
លោក រ៉ុង ឈុន អនុប្រធានគណបក្សភ្លើងទៀនដែល បានចូលស្តាប់សវនាការ យល់ថាការចោទប្រកាន់ និងការបន្តឃុំខ្លួននេះ ជារឿងអយុត្តិធម៌ ព្រោះថាស្ថានភាពក្នុងប្រទេសកម្ពុជាមិនមានអ្វីមួយកើតឡើងឡើយ ក្រោយការថ្លែងរបស់លោក ថាច់ សេដ្ឋា។ លោកចាត់ទុកករណីនេះជារឿងនយោបាយ។
លោកប្រាប់អ្នកសារព័ត៌មាននៅខាងក្រៅតុលាការកំពូលថា៖ «បើយើងពិនិត្យមើលអង្គហេតុ អង្គច្បាប់ វាមិនមានកំហុសធ្ងន់ធ្ងរ រហូតដល់ឃុំខ្លួននោះទេ។ បើយើងមើលទៅ វាជារឿងនយោបាយ ច្រើនជាងរឿងប្រព្រឹត្តកំហុស»។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ លោក អំ សំអាត ប្រាប់វីអូអេនៅថ្ងៃចន្ទថាជនជាប់ចោទទាំងអស់មានសិទ្ធិស្នើសុំនៅក្រៅឃុំជាបណ្ដោះអាសន្ន នៅពេលដែលជនទាំងនោះមានលក្ខខណ្ឌគ្រប់គ្រាន់ក្នុងការធានាថាមិនរត់គេចខ្លួន។
លោកថ្លែងថា៖ «ជនជាប់ឃុំ គឺមានសិទ្ធិ នៅក្នុងការស្នើសុំនៅក្រៅឃុំបណ្តោះអាសន្ន ដោយមានលក្ខខណ្ឌផ្សេងៗ ដូចជាមានទីលំនៅពិតប្រាកដ មុខរបរពិតប្រាកដ សហការជាមួយអាជ្ញាធរឬតុលាការ ឬអាចមានលក្ខខណ្ឌផ្សេងទៀត ដើម្បីធានាថាគាត់មិនទៅណាទេ បានន័យថាដំណើរការនីតិវិធីជនត្រូវចោទ គឺចូលគ្រប់ដំណើរការនីតិវិធីទាំងអស់»។
គួរបញ្ជាក់ថាលោក ថាច់ សេដ្ឋា ត្រូវបានអាជ្ញាធរចាប់ខ្លួន និងឃុំខ្លួនក្នុងពន្ធនាគារព្រៃស កាលពីថ្ងៃទី១៦ ខែមករា ឆ្នាំ២០២៣ ចំពោះបទល្មើស ដែលកើតឡើងកាលពីចុងឆ្នាំ២០១៩ ពាក់ព័ន្ធនឹងការចោទប្រកាន់ចេញសែកស្អុយ។ នេះជាបទល្មើសដំបូងដែលលោកត្រូវបានចាប់ខ្លួន។ ក្រោយមក ក្នុងពេលកំពុងជាប់ពន្ធនាគារ លោក ថាច់ សេដ្ឋា ក៏ត្រូវបានចោទប្រកាន់ពីបទ«ញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម» និងបទ«ញុះញង់ឱ្យមានការរើសអើង» ពាក់ព័ន្ធនឹងសកម្មភាពរបស់លោកនៅប្រទេសកូរ៉េខាងត្បូង កាលពីខែមករា ឆ្នាំ២០២៣ ដែលកាលនោះ លោកនិយាយអំពីនយោបាយ និងប្រវត្តិសាស្ត្រប្រទេសកម្ពុជា ហើយវីដេអូនៃការថ្លែងនោះត្រូវបានផ្សព្វផ្សាយតាមបណ្តាញសង្គមយូធូប(Youtube)៕
