សមាជិកគណបក្សប្រជាធិបតេយ្យដែលប្រជែងគ្នាដើម្បីទទួលបានការតែងតាំងជាបេក្ខជនប្រធានាធិបតីតំណាងឲ្យគណបក្ស ដើម្បីទៅប្រជែងយកតំណែងប្រធានាធិបតីអាមេរិកនៅឆ្នាំ២០២០ខាងមុខនេះ មានឱកាសមួយទៀតដើម្បីបញ្ចេញសមត្ថភាពឲ្យលេចធ្លោជាងគេនៅក្នុងការជជែកដេញដោលគ្នាជាសាធារណៈនៅថ្ងៃពុធនេះ នៅទីក្រុង Atlanta រដ្ឋ Georgia ដែលស្ថិតនៅប៉ែកខាងត្បូងសហរដ្ឋអាមេរិក។
ព្រឹត្តិការណ៍នៅក្នុងទីក្រុង Atlanta នេះ គឺជាការជជែកដេញដោលគ្នាលើកទី៥ ចាប់តាំងពីខែមិថុនាមក។ ការជជែកដេញដោលគ្នាលើកនេះមានបេក្ខជន១០នាក់ចូលរួម ដែលក្នុងនោះមានបេក្ខជនបីនាក់លេចធ្លោជាងគេនៅក្នុងការស្ទង់មតិសាធារណៈ ដែលមានលោក Joe Biden អតីតអនុប្រធានាធិបតីសហរដ្ឋអាមេរិក លោកស្រី Elizabeth Warren សមាជិកព្រឹទ្ធសភា និងលោក Bernie Sanders សមាជិកព្រឹទ្ធសភា។
ការស្ទង់មតិនាពេលថ្មីៗនេះទៅលើអ្នកដែលអាចនឹងទៅបោះឆ្នោតនៅក្នុងរដ្ឋ Iowa និងរដ្ឋ New Hampshire បង្ហាញថា លោក Pete Buttigieg អភិបាលក្រុង South Bend រដ្ឋ Indiana ក៏ជាអ្នកនាំមុខគេម្នាក់ផងដែរ។
រដ្ឋទាំងនោះមានលក្ខណៈពិសេសនៅក្នុងការប្រកួតប្រជែងនេះថាជារដ្ឋសំខាន់ៗ ដោយសារតែប្រជាពលរដ្ឋនឹងបោះឆ្នោតជ្រើសរើសបេក្ខជនជាផ្លូវការនៅក្នុងការបោះឆ្នោតតែម្ដង ដោយចាប់ផ្ដើមពីការបោះឆ្នោតបឋមក្នុងរដ្ឋ Iowa នៅថ្ងៃទី៣ ខែកុម្ភៈ និងការបោះឆ្នោតបឋមនៅក្នុងរដ្ឋ New Hampshire នៅថ្ងៃទី១១ ខែកុម្ភៈខាងមុខនេះ។
បេក្ខជននីមួយៗនៅមានពេល១១សប្ដាហ៍ទៀត មុនពេលដែលការបោះឆ្នោតចាប់ផ្ដើម ដើម្បីបញ្ចុះបញ្ចូលនិងបង្ហាញដល់អ្នកបោះឆ្នោតឲ្យឃើញថាពួកគេគឺជាបុគ្គលម្នាក់ ដែលសាកសមសម្រាប់ទៅប្រកួតជាមួយនឹងលោកប្រធានាធិបតី ដូណាល់ ត្រាំ នៅក្នុងការបោះឆ្នោតនៅខែវិច្ឆិកា ឆ្នាំ២០២០ខាងមុខនេះ។
ប្រធានបទនៅក្នុងការជជែកដេញដោលមិនត្រូវបានគេបញ្ចេញជាសាធារណៈជាមុននោះទេ ប៉ុន្តែដោយសារតែការជជែកដេញដោលគ្នានៅយប់ថ្ងៃពុធនេះគឺជាការជជែកដេញដោលគ្នាជាលើកទីមួយ ចាប់តាំងពីរដ្ឋសភាអាមេរិកចាប់ផ្ដើមបើកសវនាការស៊ើបអង្កេតដើម្បីពិនិត្យមើលទៅលើការចោទប្រកាន់ចំពោះលោកប្រធានាធិបតី ត្រាំ ដែលព្យាយាមដាក់សម្ពាធទៅលើប្រទេសអ៊ុយក្រែនឲ្យបើកការស៊ើបអង្កេតលើលោក Biden គេអាចនឹងជជែកដេញដោលគ្នាអំពីរឿងនេះ។ អ្នកសម្របសម្រួលការជជែកដេញដោលគ្នាកាលពីលើកមុនបានសួរបេក្ខជននីមួយៗអំពីបញ្ហាអន្តោប្រវេសន៍ ការថែទាំសុខភាព ទំនាក់ទំនងការបរទេស ពាណិជ្ជកម្ម ការគ្រប់គ្រងកាំភ្លើង និងវិសមភាពជាតិសាសន៍។
លោក Corey Booker ដែលជាសមាជិកព្រឹទ្ធសភា លោកស្រី Tulsi Gabbard ដែលជាសមាជិករដ្ឋសភា លោកស្រី Kamala Harris ដែលជាសមាជិកព្រឹទ្ធសភា លោកស្រី Amy Klobuchar ដែលជាសមាជិកព្រឹទ្ធសភា លោក Tom Steyer ដែលជាមហាសេដ្ឋីប្រាប់រាប់ពាន់លានដុល្លារ និងលោក Andrew Yang ដែលជាសហគ្រិន គឺជាអ្នកដែលត្រូវចូលរួមជជែកដេញដោលគ្នានៅក្នុងយប់នេះ។
អ្នកដែលមានគុណសម្បត្តិគ្រប់គ្រាន់ត្រូវមានអ្នកបរិច្ចាគប្រាក់ចំនួន១សែន៦ម៉ឺន៥ពាន់នាក់ និងទទួលបានការគាំទ្រយ៉ាងហោចណាស់ចំនួន៣%នៅក្នុងការស្ទង់មតិថ្នាក់ជាតិចំនួនបួនដង ឬទទួលបានការគាំទ្រចំនួន៥% នៅក្នុងការស្ទង់មតិនៅក្នុងការរដ្ឋដែលបោះឆ្នោតមុនគេចំនួនពីរ។
លក្ខខណ្ឌនេះកាន់តែតឹងរ៉ឹង ខណៈដែលដំណើរការនេះបន្ដទៅមុខ ហើយបេក្ខជនឈរឈ្មោះប្រធានាធិបតីបានធ្លាក់ចុះពី១២នាក់នៅក្នុងការជជែកដេញដោលគ្នាលើកចុងក្រោយកាលពីខែតុលា មកនៅត្រឹម១០នាក់ ដោយសារតែលោក Beto O'Rourke អតីតសមាជិករដ្ឋសភា បោះបង់ចោលការប្រកួតប្រជែងនេះ ហើយលោក Julian Castro ដែលជាអតីតរដ្ឋមន្ត្រីអភិវឌ្ឍន៍លំនៅដ្ឋាននិងទីក្រុង មិនបានទទួលការគាំទ្រតាមចំនួនកំណត់ដើម្បីបន្តទៅមុខទៀត។
បេក្ខជននីមួយៗនឹងត្រូវការអ្នកគាំទ្រចំនួន២សែននាក់ ហើយនិងការគាំទ្រចំនួន៤%នៅក្នុងការស្ទង់មតិជាតិ ឬការគាំទ្រចំនួន៦%នៅក្នុងការបោះឆ្នោតនៅក្នុងរដ្ឋដំបូងៗ ដើម្បីអាចបន្ដទៅជជែកដេញដោលគ្នានៅខែធ្នូបន្តទៀត។
ទោះជាសមាជិកគណបក្សប្រជាធិបតេយ្យមួយចំនួនដែលធ្លាប់ប្រកួតតែម្ដង បោះបង់ចោលការប្រកួតប្រជែងដោយសារតែខ្វះការគាំទ្រឬប្រាក់បរិច្ចាគក៏ដោយ ក៏បេក្ខជនផ្សេងទៀតនៅតែចង់ប្រកួតប្រជែងដើម្បីទទួលបានការតែងតាំងជាបេក្ខជនប្រធានាធិបតីពីគណបក្ស។ លោក Deval Patrick អតីតអភិបាលរដ្ឋ Massachusetts បានប្រកាសកាលពីសប្ដាហ៍មុនថា លោកនឹងចូលរួមការប្រកួតប្រជែងនេះ។ ចំណែកឯលោក Michael Bloomberg អតីតអភិបាលក្រុង New York ត្រូវបានគេរាយការណ៍ថា កំពុងពិចារណាយ៉ាងម៉ឺងម៉ាត់ចំពោះការប្រកួតប្រជែងយកតំណែងប្រធានាធិបតីនេះ៕
ប្រែសម្រួលដោយអ្នកស្រី ហុង ចិន្ដា
