ភ្ជាប់​ទៅ​គេហទំព័រ​ទាក់ទង

ការ​វាយ​ប្រហារលើស្ថានីយ៍ទូរទស្សន៍​អាហ្វហ្គានីស្ថាន​សម្លាប់​មនុស្ស​យ៉ាងតិច​២នាក់ របួស​ជាង​២០នាក់


សន្តិសុខ​អាហ្វហ្គានីស្ថាន​ជួយ​សង្គ្រោះ​សិស្ស​សាលា​ពី​បរិវេណ​នៃ​ស្ថានីយ​ទូរទស្សន៍​ បន្ទាប់​ពី​មាន​ការ​វាយប្រហារ​ដ៏​ប្រល័យ​មួយ​នៅ​ក្នុង​ក្រុង​កាប៊ុល កាលពី​ថ្ងៃទី៧ ខែវិច្ឆិកា ឆ្នាំ២០១៧។

ការ​វាយ​ប្រហារ​ដោយ​គ្រាប់បែក និង​ការ​បាញ់​ប្រហារ​លើ​ស្ថានីយ​ទូរទស្សន៍​ឯកជន​របស់​អាហ្វហ្គានីស្ថាន​នៅ​ក្រុង​កាប៊ុល​ រដ្ឋធានី​អាហ្វហ្កានីស្ថាន​ នៅ​ថ្ងៃ​អង្គារ​នេះ​ បាន​ធ្វើ​ឲ្យ​មនុស្ស​ស្លាប់​យ៉ាង​តិច​ពីរនាក់​ និង​របួសជាង​២០នាក់។ ​ក្រុម​រដ្ឋ​ឥស្លាម​ប្រកាស​ទទួល​ខុសត្រូវ​ថា ​ខ្លួន​រៀបចំ​ផែន​ការ​វាយ​ប្រហារ​លើ​ស្ថានីយ​ទូរទស្សន៍​ឈ្មោះ ​Shamshad នៅ​ទី​ក្រុង​នេះ។

សាក្សី​នានា​និយាយថា ​ ការ​វាយ​ប្រហារ​នៅ​ពេល​ព្រឹក​នេះ​បាន​ចាប់ផ្តើម​ដោយ​ការ​ដាក់​គ្រាប់​បែក ដែល​បើក​ផ្លូវ​ឲ្យ​អ្នក​វាយ​ប្រហារ​ផ្សេងទៀត​សម្រុក​ចូល​ស្ថានីយ​នោះ។ ក្រៅពីនេះ​ក៏​មាន​ឮ​សំឡេង​ផ្ទុះ​បី​លើក​ អំឡុងពេល​មាន​ការ​វាយ​ប្រហារ​ដែល​មាន​រយៈ​ពេលច្រើន​ម៉ោង​នោះ​ មុន​ពេល​កងកម្លាំង​សន្តិសុខ​អាហ្វហ្គានីស្ថាន​បាញ់​សម្លាប់​ពួក​អ្នក​វាយ​ប្រហារ។ ក្រោយពី​បាន​ផ្អាក​ការផ្សាយ​របស់ខ្លួន​ ​ អ្នក​ផ្សាយ​ទូរទស្សន៍បាន​ផ្សាយ​កម្មវិធី​ខ្លួន​ឡើង​វិញ ​ហើយ​និយាយ​ថា​ ការវាយ​ប្រហារលើ​ស្ថានីយ​ទូរទស្សន៍​ឈ្មោះ ​Shamshad ​ បាន​បញ្ចប់​ហើយ។​

បុគ្គលិក​ម្នាក់​នៅ​ស្ថានីយ​នេះ​បាន​ប្រាប់​ VOA ថា ​ យ៉ាង​ហោច​ណាស់​មាន​មនុស្ស២០​នាក់​បាន​រងរបួស​ ដែល​ភាគ​ច្រើន​គឺជា​អ្នក​ធ្វើការ​នៅ​ស្ថានីយ​នោះ ​បាន​ត្រូវ​បញ្ជូន​ទៅ​មន្ទីរពេទ្យ​នៅ​រដ្ឋធានី​អាហ្វហ្គានីស្ថាន។​

រូប​វីដេអូ​ទូរទស្សន៍​បង្ហាញ​សមាជិក​របស់​កងកម្លាំង​អាហ្វហ្គានីស្ថាន​ឈ្មោះ​អង្គភាព​ឆ្លើយ​តប​នឹង​វិបត្តិ​ បានឡោម​ព័ទ្ធ​នៅទីនោះ ​ដោយ​បាន​ព្យាយាម​ចូល​ក្នុងអគារ​ ពេល​ពួកគេ​បាញ់តគ្នា​ជាមួយ​អ្នក​វាយ​ប្រហារ​ដោយ​ប្រើ​អាវុធ​ធុនធ្ងន់។

ក្រុម​តាលីបង់ ​បាន​បដិសេធ​ថា ​ខ្លួន​មិន​មាន​ជាប់ទាក់ទង​នឹង​រឿង​នេះ​ទេ។​

Abed Ehsas ​នាយក​ស្ថានីយ​នេះ​បាន​ប្រាប់​បណ្តាញ​ទូរទស្សន៍​ឯកជន TOLO​ របស់​អាហ្វហ្គានីស្ថាន​ថា ​ក្រុមវាយ​ប្រហារ​បាន​គប់​គ្រាប់បែក​ ស្លាប់​សន្តិសុខ​យ៉ាង​តិចម្នាក់​ និង​ធ្វើ​ឲ្យ​របួស​ជាច្រើន​ទៀត​ មុនពួក​គេចាប់​ផ្តើម​បាញ់​មនុស្ស​គ្រប់រូប​ឲ្យ​តែ​គេ​ប្រទះ​ឃើញ៕

XS
SM
MD
LG