តាំងពីព្រលឹមស្រាងៗ ប្រជាពលរដ្ឋរស់នៅក្នុងសហគមន៍សំរោងត្បូងជាប់ផ្ទៃបឹងតាមោកប្រមាណ១០០នាក់ បានប្រមូលផ្តុំគ្នានៅក្រោមដើមពោធិ៍មួយក្នុងទីធ្លាសួនវត្តបទុមវតី ដើម្បីសុំកិច្ចអន្តរាគមន៍ពីខុទ្ទកាល័យនាយករដ្ឋមន្ត្រី។
ពលរដ្ឋដែលកំពុងបារម្ភអំពីការបណ្តេញចេញបានស្នើសុំឱ្យកាត់ឆ្វៀលដី៥ហិកតាដល់ពលរដ្ឋជាង១០០ខ្នងផ្ទះ ដែលពួកគេអះអាងថាបានរស់នៅទីនោះជាង២០ឆ្នាំ ឬតាំងពីអំឡុងឆ្នាំ១៩៩០។
ប្រជាពលរដ្ឋរំពឹងថាលោកនាយករដ្ឋមន្ត្រីនឹងផ្តល់យុត្តិធម៌ដល់ពួកគេ ដូចជាការស្នើសុំឱ្យកាត់ឆ្វៀលដី និងការធ្វើសៀវភៅគ្រួសារ សៀវភៅស្នាក់នៅ និងការស្នើសុំឱ្យមានកិច្ចអន្តរាគមន៍អំពីការចាក់ដី និងថ្មចំកន្លែងចិញ្ចឹមត្រីរបស់ពួកគេ ដោយស្នើពេលមួយរយៈទៀត ដើម្បីប្រមូលផលត្រី ដែលចិញ្ចឹមក្នុងបឹង ។ ពលរដ្ឋទាំងនោះបន្តថាពួកគេអស់ជំនឿលើពាក្យសម្តីរបស់អាជ្ញាធរមូលដ្ឋាន និងព្រួយបារម្ភខ្លាចត្រូវអាជ្ញាធរបណ្តេញចេញដោយបង្ខំនៅពេលណាមួយ។
ស្រ្តីវ័យអាយុ៥៦ឆ្នាំ ដែលឡើងមកសុំអន្តរាគមន៍ជាមួយពលរដ្ឋប្រមាណ១០០នាក់ទៀត គឺអ្នកស្រី ផន សុំ ថ្លែងថាប្រជាពលរដ្ឋមិនទុកចិត្តពាក្យសម្តីរបស់អាជ្ញាធរមូលដ្ឋានឡើយ ទើបមកស្នើសុំអន្តរាគមន៍ពីលោកនាយករដ្ឋមន្រ្តី។
អ្នកស្រីថ្លែងថា៖ «គាត់[អាជ្ញាធរខណ្ឌព្រែកព្នៅ]បានតែសន្យាយើងចោល យើងទៅដាក់ញត្តិយើងទៅដាក់ពាក្យ គាត់បានតែទទួលហើយ គាត់យករបស់យើងធីបចោល កប់ចោល គាត់មិនទទួលស្គាល់យើង។ ហើយគាត់មកដៀងពួកខ្ញុំថាពួកខ្ញុំនៅលើដីចំណីផ្លូវ នៅលើដីអនុក្រឹត្យមិនស្របច្បាប់។ អ៊ីចឹងប្រជាពលរដ្ឋសួរថា២០ ឬ៣០ឆ្នាំហើយ នៅតែអត់ស្របច្បាប់ទៀតឬអីពួកខ្ញុំហ្នឹង មានដល់ទៅចៅរៀងៗខ្លួនអស់ហើយនែក! ហេតុអ្វីបានជាថាពួកខ្ញុំអត់ស្របច្បាប់ ថាពួកគាត់ស្របច្បាប់ ហើយគាត់ដៀលខ្ញុំថាខ្ញុំនៅចិញ្ចើមផ្លូវ ហើយចុះគ្រប់គ្នាគេអត់នៅចិញ្ចើមផ្លូវ? ចុះបើមិនឱ្យខ្ញុំនៅចិញ្ចើមផ្លូវ កាត់ទៅដីរាប់ហិកតា កាត់ឱ្យខ្ញុំថយក្រោយទៅ។ ខ្ញុំចាក់ដីក៏បិទសិទ្ធិ ខ្ញុំធ្វើអ្វីមួយ ក៏បិទសិទ្ធិពួកខ្ញុំទាំងអស់ [និង]មិនផ្តល់ឱ្យខ្ញុំទាំងអស់»។
ស្ត្រីរូបនេះដែលបានអះអាងថាខ្លួនរស់នៅភូមិសំរោងត្បូង សង្កាត់សំរោង ខណ្ឌព្រែកព្នៅ ជាង២០ឆ្នាំមកហើយនោះ បន្ថែមថា ការឡើងមកដាក់លិខិតស្នើសុំនេះ គឺគ្រាន់តែចង់ឱ្យលោកនាយករដ្ឋមន្ត្រីបានដឹងព័ត៌មានពិតប្រាកដ និងដោះស្រាយកាត់ឆ្វៀលដីឱ្យប្រជាពលរដ្ឋ ព្រោះពលរដ្ឋអស់ជំនឿលើអាជ្ញាធរមូលដ្ឋាន និងព្រួយខ្លាចថាត្រូវបាត់បង់ទីជម្រកនៅថ្ងៃណាមួយ។
អ្នកស្រីបន្ថែមថា៖ «អ៊ីចឹងខ្ញុំមានតែរត់ឱ្យសម្តេចហ្នឹងហើយដែលជួយជាឪពុកជាម្តាយរបស់ខ្ញុំ អ៊ីចឹងមានសម្តេចទេដែលជួយកូនចៅបាន។ បើដឹងដល់សម្តេច គឺសម្តេចជួយកូនចៅហើយ។ អ៊ីចឹងខ្ញុំមកនេះមានតែរំពឹងថាពិតជាឪពុកជួយដល់ខ្ញុំ គឺឪពុកជួយកូនជួយចៅហើយ ពីព្រោះកូនចៅនេះមិនមែនមកប្លន់ មិនមែនមកលួច មិនមែនមកធ្វើអ្វីទេ គឺមកលើកដៃសុំឪពុកជួយ»។
ពលរដ្ឋដែលរស់នៅក្នុងសហគមន៍សំរោងត្បូង ក្នុងខណ្ឌព្រែកព្នៅ ភាគច្រើនបានសង់ផ្ទះឈើជាប់ផ្លូវលេខ១៣០ ដោយជើងសសរផ្ទះនៅក្នុងទឹកបឹងតាមោក ទៅតាមទំហំផ្ទះនៃលទ្ធភាពគ្រួសារនីមួយៗ ដែលផ្ទះខ្លះមានទទឹង៣ម៉ែត្រ ខ្លះ៤ម៉ែត្រ និងខ្លះ៨ម៉ែត្រជាដើម។ ពលរដ្ឋរស់នៅក្នុងតំបន់នោះប្រកបរបរនេសាទ ចិញ្ចឹមត្រី និងដាំបន្លែលើទឹក រកនិងលក់ដូរខ្ចៅខ្ចង ក្រអៅឈូក និងលក់អីវ៉ាន់ចាប់ហួយនៅតាមមុខផ្ទះរបស់ពួកគេនីមួយៗ។
លោក គង់ ចំរើន មន្ត្រីខុទ្ទកាល័យរបស់លោកនាយករដ្ឋមន្រ្តី ហ៊ុន សែន បានចុះហត្ថលេខាទទួលលិខិតរបស់ពលរដ្ឋ។
ស្ត្រីម្នាក់ទៀតដែលកំពុងនិយាយជាមួយអ្នកសារព័ត៌មានបណ្តើរ ស្រក់ទឹកភ្នែកបណ្តើរ អ្នកស្រី ហុន ស្រីណាក់ អាយុ៣៧ឆ្នាំ បានរៀបរាប់ផលលំបាករបស់ខ្លួន ដែលនឹងប្រឈមនៅថ្ងៃខាងមុខ ប្រសិនបើមិនមានកន្លែងស្នាក់នៅ។ អ្នកស្រីស្នើសុំដូចគ្នានឹងពលរដ្ឋផ្សេងទៀតផងដែរ ដូចជាការផ្តល់ប្លង់កម្មសិទ្ធិដីធ្លីដោយស្របច្បាប់ ផ្តល់សៀវភៅគ្រួសារ និងស្នើសុំឱ្យអាជ្ញាធរកុំទាន់លុបបឹងចំកន្លែងចិញ្ចឹមត្រីរបស់អ្នកស្រី និងរបស់ពលរដ្ឋផ្សេងទៀត។
អ្នកស្រីបន្ថែមថា៖ «ខ្លះមាន[ផ្ទះទំហំ]៦ម៉ែត្រ មាន៧គ្រួសាររស់នៅលើហើយ ដាក់គ្រែដេកនៅក្រោមហ្នឹងទៀត។ ហើយបើខ្ញុំវិញដីតែ៣ម៉ែត្រ ដេកលើផ្ទះមិនអស់ កូនទៅដេកលើទូក រកកំពឹស រកត្រី នៅទូកទៀត ៤នាក់ដេកទូក។ បើដឹកលើផ្ទះទាំងអស់គ្នា ដេកអត់អស់ទេបង ព្រោះផ្ទះទំហំតែ២ម៉ែត្រ៧តឹករស់នៅដល់តែ១២នាក់ មានប្រុសមានស្រី ដេកច្របូលច្របល់គ្នា វាមិនកើតក្មេងវាទ្រើស[ធំ]។ ដល់អ៊ីចឹងអាខ្លះដេកទូកទៅ អាប្រុសៗ ដេកទូកទៅ ស្រីៗដេកលើផ្ទះជាមួយម៉ែ ជាមួយយាយហ្នឹងទៅ អាប្រុសៗដេកទូកជាមួយឪវាហ្នឹង»។
អ្នកស្រីដែលមានកូន៩នាក់ និងបានខ្ចីលុយធនាគារប្រមាណ៨ពាន់ដុល្លារអាមេរិក បានសម្តែងការព្រួយបារម្ភយ៉ាងខ្លាំង ដោយខ្លាចថាខ្លួននឹងត្រូវធ្លាក់ខ្លួនកាន់តែក្រលំបាកបន្ថែមទៀត ឬជាប់បំណុលធនាគារ ដោយសារមិនអាចប្រមូលផលត្រីដែលអ្នកស្រីដាក់ចិញ្ចឹមក្នុងបឹងតាមោកបាន ព្រោះអាជ្ញាធរកំពុងលុបចំកន្លែងចិញ្ចឹមត្រីរបស់អ្នកស្រី។ អ្នកស្រីបន្ថែមថា អ្នកស្រីមិនទទួលយកការដោះដូរ ឬទៅកន្លែងណា ក្រៅពីកន្លែងរស់នៅរាល់ថ្ងៃនេះទេ។
អ្នកស្រីថ្លែងថា៖ «ធ្លាប់រកនៅតាមថ្នល់ដាក់លក់ទឹកសុទ្ធ រើសខ្ចង បេះត្រកូន ខ្ញុំដាក់លក់តែតាមថ្នល់ក៏មានអ្នកទេសចរ អ្នកដើរលេងដំណើរតាមផ្លូវហ្នឹង គេជួយទិញ ក៏ខ្ញុំអាចចិញ្ចឹមជីវិតបានដែរបង ដល់ពេលឱ្យខ្ញុំទៅនៅវាលរហោឋានមានតែពួកខ្ញុំប៉ុន្មាននាក់ហ្នឹងទៅរកស៊ីអីបង»។
អភិបាលរងរាជធានីភ្នំពេញ លោក កើត ឆែ បានប្រាប់វីអូអេកាលពីថ្ងៃចន្ទថាការដែលអាជ្ញាធរមិនធ្វើប័ណ្ណកម្មសិទ្ធិឱ្យប្រជាពលរដ្ឋដែលកំពុងរស់នៅម្តុំបឹងតាមោក គឺដោយសារតែពួកគេមិនមានឯកសារកាន់កាប់គ្រប់គ្រាន់។
គួរបញ្ជាក់ថារដ្ឋាភិបាលបានកាត់ដីបឹងតាមោកផ្នែកខ្លះ ឱ្យទៅស្ថាប័នរដ្ឋ ក្រុមហ៊ុនឯកជន និងនីតិបុគ្គល។ គ្រឿងចក្រកំពុងធ្វើសកម្មភាពលុបបឹងតាមោកយ៉ាងសកម្ម ចំកន្លែងចិញ្ចឹមត្រីរបស់ពលរដ្ឋទាំងនោះ។ ការអភិវឌ្ឍបឹងតាមោក ឬបឹងទំនប់កប់ស្រូវ ដែលមានផ្ទៃដីចំនួន៣.២៣៩ហិកតា ក៏រងការរិះគន់ផងដែរថាធ្វើឱ្យប៉ះពាល់បឹងស្តុកទឹកធម្មជាតិនេះ៕
