ភ្ជាប់​ទៅ​គេហទំព័រ​ទាក់ទង

តាលីបង់​បាន​រំដោះ​មនុស្ស​ជា​ច្រើន​រយ​នាក់​ពី​ពន្ធនាគារ


ទាហាន​ជាតិ​អាហ្វហ្គានីស្ថាន​​ឈរ​ការពារ​នៅ​ក្បែរ​សាកសព​​យុទ្ធពល​តាលីបាន​ម្នាក់​ នៅ​មុខ​អគារ​ពន្ធនាគារ ​នៅ​ក្នុង​ខេត្ត Ghazni ប្រទេស​អាហ្វហ្គានីស្ថាន​ កាល​ពី​ថ្ងៃ​ទី​១៤ ខែ​កញ្ញា ឆ្នាំ​២០១៥។ ​

ក្រុម​បះ​បោរ​តាលីបង់​បាន​វាយ​ឆ្មក់​ពន្ធនាគារមួយ​កន្លែង​ នៅ​ក្នុង​ប៉ែក​ខាង​កើត​នៃ​ប្រទេស​អាហ្វហ្គានីស្ថាន​ ដោយ​បាន​ដោះលែង​ក្រុម​អ្នក​ទោស​រាប់​រយ​នាក់។​

លោក Mohammad Ali Ahmadi ​អភិបាល​រង​នៃ​ខេត្ត​ Ghazni នា​ប៉ែក​ខាង​កើត​នៃ​ប្រទេស​អាហ្វហ្គានីស្ថាន​បាន​និយាយ​ថា​ ការ​វាយ​ប្រហារ​មាន​ការ​រៀបចំ​យ៉ាង​ល្អ​នេះ ​បាន​ចាប់​ផ្តើម​ជា​មួយ​នឹង​ការ​បំផ្ទុះ​គ្រាប់​បែក​អត្តឃាត​ក្នុង​ឡាន​មួយ​គ្រឿង​ ដែល​ធ្វើ​ឱ្យ​ក្រុម​ឧទ្ទាម​ឯ​ទៀតៗ​ចូល​ទៅ​ក្នុង​ពន្ធនាគារនោះ​បាន។​

ក្រុម​មន្ត្រី​អាហ្វហ្គានីស្ថាន​បាន​និយាយ​ថា​ មាន​អ្នក​ទោស​ទាំង​អស់​៤៣៦​នាក់​នៅ​ក្នុង​ពន្ធនាគារនេះ​ ហើយ​អ្នក​ទោស​៣៥៥នាក់​ក្នុង​បណ្តា​ក្រុម​អ្នកទោស​ទាំងអស់​បាន​រត់​គេច​ខ្លួន​រួច​ នៅ​ពេល​មាន​ការ​វាយ​ប្រហារ​នោះ។

​រដ្ឋាភិបាល​បាន​និយាយ​ថា​ ក្រុម​អ្នក​ទោស​រត់​រួច​១៤៨​នាក់​ គឺ​ជា​អ្នក​ដែល«​គំរាម​កំហែង​ដល់​សន្តិសុខជាតិ។»

សេចក្តី​ថ្លែង​ការណ៍​មួយ​របស់​ក្រសួង​មហា​ផ្ទៃ​អាហ្វហ្គានីស្ថាន​ក្នុង​ទីក្រុង​កាប៊ុល​បាន​ថ្លែង​ថា ​ឆ្មាំ​សន្តិសុខ​៧​នាក់​ត្រូវ​បាន​សម្លាប់​ ហើយ​ឆ្មាំ​៧​នាក់​ទៀត​បាន​រង​របួស។ សេចក្តី​ថ្លែង​ការណ៍​នេះ​ឱ្យ​ដឹង​ទៀត​ថា​ ក្រុម​បះបោរ​៥​នាក់​ក៏​បាន​ស្លាប់​ផង​ដែរ។

នៅ​ក្នុង​សេចក្តី​ថ្លែងការណ៍​មួយ​ផ្ញើ​តាម​សារ​អេឡិចត្រូនិច​ទៅ​កាន់​ក្រុម​អ្នក​សារព័ត៌មាន​ អ្នក​នាំ​ពាក្យ​របស់​ក្រុម​តាលីង់​ឈ្មោះ​ Zabihullah Mujahid បាន​អះអាង​ទទួល​ខុស​ត្រូវ​ដល់​ការវាយ​ប្រហារ​នេះ ដោយ​បាន​ចោទ​ប្រកាន់​ថា​ ពន្ធនាគារ​នេះ​ត្រូវ​បាន​គ្រប់​គ្រង​ដោយទី​ភ្នាក់ងារ​ស៊ើបការ​សម្ងាត់​របស់​រដ្ឋាភិបាលអាហ្វហ្គានីស្ថាន​ ហើយ​បាន​និយាយ​ទៀត​ថា​ ក្រុម​អ្នក​ទោសរួម​បញ្ចូល​ទាំង​ក្រុម​យុទ្ធជន​តាលីបង់ផង​ដែរ​នោះ ទទួល​រង​ការធ្វើ​បាប​យ៉ាង​ខ្លាំង៕

XS
SM
MD
LG