មន្ត្រីនយោបាយរបស់តាលីបង់ថ្លែងថា ពួកគេបានបញ្ជូនរបាយការណ៍ប្រជុំទៅថ្នាក់ដឹកនាំកំពូលរបស់ពួកគេ បន្ទាប់ពីបញ្ចប់កិច្ចប្រជុំជាមួយក្រុមមន្ត្រីប៉ាគីស្ថាន និងតំណាងមកពីប្រទេសផ្សេងទៀត រួមមានចិន និងកាតា ដើម្បីស្វែងរកដំណោះស្រាយសម្រាប់សង្គ្រាមអាហ្វហ្គានីស្ថាន។
សេចក្តីប្រកាសនេះបានធ្វើឲ្យមានសេចក្តីសង្ឃឹមឡើងវិញថា ដំណើរការសន្តិភាពនៅអាហ្វហ្គានីស្ថាន អាចលេចចេញជាផ្លែផ្កាមុននឹងការប្រយុទ្ធចាប់ផ្តើមនៅក្នុងរដូវក្តៅឆ្នាំនេះ។
នៅក្នុងសេចក្តីថ្លែងការណ៍សរសេរជាភាសា Pashto ដែលបណ្តាញផ្សព្វផ្សាយទទួលបានកាលពីថ្ងៃពុធ បានឲ្យដឹងថា ក្រុមបះបោរឥស្លាម បញ្ជាក់ពីការប្រជុំជាលើកទីមួយនេះថា គណៈប្រតិភូដែលមានសមាជិក៥នាក់ មកពីការិយាល័យនយោបាយរបស់ក្រុមតាលីបង់ដែលមានមូលដ្ឋាននៅក្នុងប្រទេសកាតា កាលពីពេលថ្មីៗនេះបានធ្វើដំណើរទៅកាន់ទីក្រុង Islamabad និងបានធ្វើការចរចាជាមួយនឹងក្រុមមន្ត្រីនៅទីនោះ។
របាយការណ៍បានបញ្ជាក់ថា ទស្សនកិច្ចនេះត្រូវបានធ្វើឡើង បន្ទាប់ពីរដ្ឋាភិបាលប៉ាគីស្ថាន សុខចិត្តធ្វើជាអ្នកសម្របសម្រួល រៀបចំកិច្ចប្រជុំស្វែងរកដំណោះស្រាយនយោបាយលើបញ្ហាជម្លោះអាហ្វហ្គានីស្ថាន និងផ្លាស់ប្តូរទស្សនៈជាមួយក្រុមតាលីបង់។
សេចក្តីថ្លែងការណ៍ក៏បានឲ្យដឹងផងដែរថា ភាគីទាំងពីរបានផ្លាស់ប្តូរយោបល់ និងស្តាប់គ្នាទៅវិញទៅមក ដើម្បីស្វែងរកដំណោះស្រាយសន្តិភាពទៅលើសង្គ្រាមនេះ។
ដោយមានកិច្ចសហប្រតិបត្តិការពីប្រទេសប៉ាគីស្ថាន ប្រតិភូតាលីបង់បានជួបប្រជុំជាមួយមន្ត្រីចិន កាតា និងប្រទេសផ្សេងទៀតផងដែរ ដើម្បីពិភាក្សាគ្នា ស្វែងរកវិធីសាស្ត្របញ្ចប់ជម្លោះនៅអាហ្វហ្គានីស្ថាន៕
