ក្រុមតាលីបង់បានប្រកាសនៅថ្ងៃសៅរ៍នេះថា ខ្លួននឹងបញ្ឈប់កិច្ចប្រតិបត្តិការវាយប្រហារប្រឆាំងនឹងកងកម្លាំងសន្តិសុខរបស់រដ្ឋាភិបាលនៅទូទាំងប្រទេសអាហ្វហ្គានីស្ថានក្នុងរយៈពេលនៃពិធីបុណ្យEid al Fitr រយៈពេល៣ថ្ងៃដែលកត់សម្គាល់នៃការបញ្ចប់ខែតមអាហារពេលថ្ងៃនៃពិធីបុណ្យ Ramadan នៃសាសនាឥស្លាម។
ការឈប់បាញ់គ្នានេះស្របគ្នានឹងការបញ្ឈប់កិច្ចប្រតិបត្តិការប្រឆាំងនឹងតាលីបង់ជាឯកតោភាគីរយៈពេលមួយសប្តាហ៍ដោយរដ្ឋាភិបាលអាហ្វហ្គានីស្ថានដែលចាប់ផ្តើមនៅថ្ងៃអង្គារ។
សេចក្តីថ្លែងការណ៍របស់ពួកបះបោរបានប្រាប់ឲ្យដឹងថា មេដឹកនាំតាលីបានក៏បានបញ្ជាពួកអ្នកប្រយុទ្ធរបស់ខ្លួនមិនឲ្យធ្វើការជួបប្រជុំនៅក្នុងតំបន់ជនស៊ីវិលរស់នៅក្នុងអំឡុងនៃពិធីឈប់សម្រាកដើម្បីអាចឲ្យប្រជាពលរដ្ឋអបអរពិធីនោះដោយសន្តិវិធី។ ក៏ប៉ុន្តែ ក្រុមនោះបានសន្យាបន្តវាយប្រហារលើកងទ័ពបរទេសដែលដឹកនាំដោយសហរដ្ឋអាមេរិកនៅក្នុងប្រទេសនោះ។
ការឈប់បាញ់គ្នានេះជាលើកទី១ចាប់តាំងពីឆ្នាំ២០០២មកដែលពួកបះបោរឥស្លាមនឹងបញ្ឈប់អរិភាពនៅក្នុងប្រទេសអាហ្វហ្គានីស្ថានដែលនៅទីនោះពួកគេបានត្រួតត្រាស្រុកជិតពាក់កណ្តាលនៃស្រុកទាំងអស់៤០៧របស់អាហ្វហ្គានីស្ថាន។
លោក Omar Zakhilwal ឯកអគ្គរដ្ឋទូតអាហ្វហ្គានីស្ថានប្រចាំនៅប្រទេសប៉ាគីស្ថានបានស្វាគមន៍កាយវិការរបស់ក្រុមបះបោរនេះ។
លោក Zakhilwal បានផ្ញើរសារតាមប្រព័ន្ធ Twitter ថា «ការណ៍នេះជាវិធានការលើក ទឹកចិត្តនិងមានសារៈសំខាន់មួយឆ្ពោះទៅកាន់សន្តិភាព។ សង្ឃឹមថាភាពសប្បាយរីករាយដោយគ្មានការបង្ហូឈាមពលរដ្ឋអាហ្វហ្គានីស្ថានក្នុងពិធីបុណ្យ Eid ក្នុងរយៈពេលមួយឆ្នាំនេះ»៕
