នាយករដ្ឋមន្រ្តីប៉ាគីស្ថានលោក Shahid Khaqan Abbasiនឹងធ្វើដំណើរទស្សនកិច្ចនៅក្នុងប្រទេសអាហ្វហ្គានីស្ថាននៅថ្ងៃសុក្រនេះដើម្បីពិភាក្សាអំពីចំណងទាក់ទងទៅវិញទៅមកដែលកំពុងមានភាពតានតឹង និងគំនិតផ្តួចផ្តើមរបស់រដ្ឋាភិបាលក្រុងកាប៊ុលក្នុងការស្វែងរកការចរចាដើម្បីបញ្ចប់សង្គ្រាមជាមួយពួកតាលីបង់។
ក្រុមមន្រ្តីនៅក្នុងទីក្រុងអ៊ីស្លាម៉ាបាដបាននិយាយថា លោក Abbasiនឹងធ្វើដំណើរទស្សនកិច្ចរយៈពេលមួយថ្ងៃពេញតាមការអញ្ជើញរបស់ប្រធានាធិបតីអាហ្វហ្គានីស្ថានលោក Ashraf Ghani ដែលបង្ហាញពីការគាំទ្ររបស់ប៉ាគីស្ថានដល់ការស្នើរបស់លោក Ghaniឲ្យមានការចរចាសន្តិភាពជាមួយពួកតាលីបង់។
ភាគីទាំងពីរក៏នឹងពិភាក្សាដើម្បីរកវិធីសាស្រ្តបញ្ចប់ភាពតានតឹងនៅក្នុងទំនាក់ទំនងទ្វេភាគី និងដើម្បីពង្រឹងកិច្ចសហប្រតិបត្តិការនយោបាយ សេដ្ឋកិច្ច សន្តិសុខនិងការប្រឆាំងអំពើភេរវកម្ម។
លោកប្រធានាធិបតី Ghani បានស្នើកិច្ចចរចាគ្មានលក្ខខណ្ឌទៅកាន់ពួកតាលីបង់កាលពីជាងមួយខែមុននៅឯសន្និសីទអន្តរជាតិមួយនៅក្នុងទីក្រុងកាប៊ុល ដើម្បីព្យាយាមបញ្ចប់ការប្រយុទ្ធបង្ហូរឈាមនៅក្នុងប្រទេសរបស់លោក។ ការផ្តួចផ្តើមរបស់លោកបានទទួលការគាំទ្រពីក្នុងតំបន់និងអន្តរជាតិ ប៉ុន្តែក្រុមបះបោរបានព្យាយាមមិនធ្វើការឆ្លើយតបទៅនឹងការស្នើឡើងនេះទេ។
លោកនាយករដ្ឋមន្ត្រី Abbasiបានថ្លៃងនៅក្នុងសន្និសីទស្តីពីការប្រឆាំងអំពើភេរវកម្មអន្តរជាតិនៅក្នុងរដ្ឋធានីរបស់ប្រទេសប៉ាគីស្ថានកាលពីថ្ងៃព្រហស្បតិ៍ថា «យើងឈរជាមួយនឹងសន្តិភាពនៅក្នុងប្រទេសអាហ្វហ្គានីសា្ថន»៕
