តៃវ៉ាន់នឹងធ្វើសមយុទ្ធយោធាមួយឈុត នៅសប្តាហ៍ក្រោយ ដែលនឹងរួមមានការទប់ស្កាត់ការវាយប្រហារលើអាកាសយានដ្ឋាន និង កំពង់ផែសំខាន់ៗ និងការសាកល្បងសមត្ថភាពរបស់កងទ័ព ក្នុងការឆ្លើយតបនឹងសេណារីយ៉ូស្រដៀងនឹងការឈ្លានពានដែលអាចកើតឡើងពីប្រទេសចិន។
ក្រសួងការពារជាតិរបស់តៃវ៉ាន់និយាយថា សមយុទ្ធប្រចាំឆ្នាំ Han Kuang និង Wan An ពីថ្ងៃទី២២ ដល់ថ្ងៃទី២៦ ខែកក្កដា នឹងផ្តោតទៅលើ «សមយុទ្ធដែលមិនរៀបចំទុកមុននិងពិតប្រាកដ»។ សមយុទ្ធទាំងនេះនឹងមានរួមការជ្រកពួន និងការព្រមានអំពីការវាយប្រហារតាមដែនអាកាស។
សមយុទ្ធទាំងនេះធ្វើឡើងខណៈប្រទេសចិន បង្កើនសម្ពាធយោធាលើតៃវ៉ាន់ ដែលរដ្ឋាភិបាលក្រុងប៉េកាំងចាត់ទុកថាជាដែនដីរបស់ខ្លួន។ រដ្ឋាភិបាលក្រុងប៉េកាំងបានប្តេជ្ញាបង្រួបបង្រួមកោះដែលគ្រប់គ្រងដោយលទ្ធិប្រជាធិបតេយ្យនេះ ជាមួយប្រទេសចិន ដោយការប្រើកម្លាំងយោធាបើសិនជាត្រូវការ។
នៅពេលដែលប្រធានាធិបតីតៃវ៉ាន់ លោក Lai Ching-te ឡើងកាន់តំណែងនៅខែឧសភា ប្រទេសចិនបានធ្វើសមយុទ្ធយោធាក្នុងលក្ខណៈរាំងខ្ទប់ ជុំវិញតៃវ៉ាន់ ក្នុងគោលបំណងសាកល្បងមើលសមត្ថភាពរបស់ខ្លួនក្នុងការ«ដណ្តើមអំណាច»។
រដ្ឋាភិបាលក្រុងប៉េកាំងថែមទាំងបានបង្កើនចំនួនយន្តហោះចម្បាំង នាវាចម្បាំង និងនាវាយាមល្បាតសមុទ្រដែលបើកបរនៅក្បែរកោះតៃវ៉ាន់ផងដែរ។
កាលពីថ្ងៃទី១១ ខែកក្កដា ក្រសួងការពារជាតិតៃវ៉ាន់ បានឱ្យដឹងថាខ្លួនចាប់បានក្នុងរ៉ាដានូវយន្តហោះចម្បាំងចិន៦៦គ្រឿង បើកនៅជុំវិញកោះតៃវ៉ាន់ក្នុងរយៈពេល២៤ម៉ោង ដែលជាចំនួនច្រើនបំផុត ក្នុងរយៈពេល១ថ្ងៃ ក្នុងឆ្នាំ២០២៤។ មួយថ្ងៃមុននោះ តៃវ៉ាន់បាននិយាយថា ខ្លួនបានឃើញនាវាដឹកយន្តហោះរបស់ចិន ឈ្មោះ Shandong បើកកាត់ដែនទឹកក្បែរកោះតៃវ៉ាន់ ដើម្បីទៅចូលរួមក្នុងសមយុទ្ធយោធានៅតំបន់សមុទ្រប៉ាស៊ីហ្វិកខាងលិច។
ខុសពីសមយុទ្ធយោធា Han Kuang មុនៗ អ្នកវិភាគខ្លះនិយាយថា សមយុទ្ធឆ្នាំនេះ នឹងមានលក្ខណៈដូចការប្រយុទ្ធគ្នាមែនទែន ដោយសារអាជ្ញាធរនឹងមិនប្រកាសអំពីសេណារីយ៉ូសមយុទ្ធដែលរៀបចំទុកមុននោះទេ៕
វេទិកាបញ្ចេញមតិ