ប្រធានាធិបតីតៃវ៉ាន់អ្នកស្រី Tsai Ing-wen បាននិយាយថា កោះតៃវ៉ាន់នឹងពង្រឹងទំនាក់ទំនងយោធារបស់ខ្លួនជាមួយសហរដ្ឋអាមេរិកឱ្យបានកាន់តែស៊ីជម្រៅបន្ថែមទៀត។
អ្នកស្រី Tsai បានសន្យាដូច្នេះនៅថ្ងៃអង្គារនេះក្នុងអំឡុងកិច្ចប្រជុំមួយជាមួយនឹងក្រុមសមាជិកសភាសហរដ្ឋអាមេរិកដែលធ្វើទស្សនកិច្ចនៅក្នុងទីក្រុងតៃប៉ិ កោះតៃវ៉ាន់។ អ្នកស្រីបាននិយាយថា តៃវ៉ាន់នឹង«ធ្វើកិច្ចសហប្រតិបត្តិការឱ្យបានកាន់តែសកម្មជាងមុនជាមួយនឹងសហរដ្ឋអាមេរិកនិងដៃគូប្រជាធិបតេយ្យផ្សេងទៀតដើម្បីតទល់ជាមួយនឹងការប្រឈមខ្លាំងក្លានានាដូចជាការវាតទីបែបអាជ្ញាធិបតេយ្យ និងការប្រែប្រួលអាកាសធាតុជាដើម។
ប្រទេសចិនបានធ្វើសមយុទ្ធយោធាផ្លូវអាកាសនិងផ្លូវទឹកជាច្រើននៅជិតកោះតៃវ៉ាន់នៅក្នុងរយៈពេលប៉ុន្មានឆ្នាំចុងក្រោយនេះ ដែលក្នុងនោះរួមមានទាំងសមយុទ្ធកាលពីខែសីហាឆ្នាំមុនផងដែរដែលជាការឆ្លើយតបទៅនឹងដំណើរទស្សនកិច្ចរបស់អ្នកស្រី Nancy Pelosi ដែលជាប្រធានរដ្ឋសភាអាមេរិកនៅពេលនោះ។ ចិនក៏បានដាក់សម្ពាធការទូតផងដែរលើប្រទេសនានាឱ្យកាត់ផ្ដាច់ទំនាក់ទំនងផ្លូវការជាមួយនឹងតៃវ៉ាន់។
សមាជិករដ្ឋសភាអាមេរិកលោក Ro Khanna ដែលជាសមាជិកនៃគណៈប្រតិភូមកពីគណបក្សទាំងពីរនិងជាសមាជិកនៃគណៈកម្មាធិការពិសេសដែលទើបនឹងបង្កើតថ្មីដែលមើលការខុសត្រូវលើស្ថានភាពប្រកួតប្រជែងរវាងសហរដ្ឋអាមេរិកនិងចិន បានប្រាប់អ្នកស្រី Tsai ថា គណៈប្រតិភូរបស់លោកធ្វើទស្សនកិច្ចនៅតៃវ៉ាន់ដើម្បី «បញ្ជាក់អំពីគុណតម្លៃរួមគ្នារវាងសហរដ្ឋអាមេរិកនិងតៃវ៉ាន់ ដែលនោះគឺការតាំងចិត្តចំពោះប្រជាធិបតេយ្យនិងសេរីភាព»។
បន្ថែមទៅនឹងការប្រជុំជាមួយនឹងអ្នកស្រី Tsai និងសមាជិកសភាតៃវ៉ាន់ គណៈប្រតិភូសហរដ្ឋអាមេរិកនេះក៏បានជួបពិភាក្សាផងដែរជាមួយនឹងលោក Morris Chang ដែលជាស្ថាបនិកក្រុមហ៊ុនផលិតបន្ទះអេឡិចត្រូនិក Semiconductor របស់តៃវ៉ាន់ ដែលជាក្រុមហ៊ុនផលិតបន្ទះអេឡិចត្រូនិក Semiconductor ធំជាងគេបំផុតនៅលើពិភពលោក៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារព័ត៌មាន AP ទីភ្នាក់ងារព័ត៌មាន Reuters និងទីភ្នាក់ងារព័ត៌មាន AFP។
