ប្រធានាធិបតីសហរដ្ឋអាមេរិកលោក Joe Biden និងប្រធានាធិបតីចិនលោក Xi Jinping បាននិយាយគ្នាយ៉ាងយូរកាលពីព្រឹកថ្ងៃព្រហស្បតិ៍ នៅពេលមានការតានតឹងអំពីដំណើរទស្សនកិច្ចទៅកោះតៃវ៉ាន់ ដែលបានស្នើឡើងដោយប្រធានរដ្ឋសភាសហរដ្ឋអាមេរិកលោកស្រី Nancy Pelosi ដែលអ្នកនាំពាក្យក្រសួងការបរទេសចិន លោក Zhao Lijian បានព្រមានថា នឹងមាន«វិធានការឆ្លើយតបដោយកម្លាំង»។
ក្រោយមកមន្ត្រីជាន់ខ្ពស់រដ្ឋបាលម្នាក់របស់សហរដ្ឋអាមេរិកបានប្រាប់អ្នកយកព័ត៌មានថា មេដឹកនាំទាំង២ក៏បានពិភាក្សាគ្នាអំពីជំនួបទល់មុខគ្នា ហើយបានព្រមព្រៀងគ្នាឱ្យមានក្រុមការងារជួបគ្នាជាបន្ទាប់ដើម្បីស្វែងរកពេលវេលាព្រមព្រៀងគ្នាដើម្បីមេដឹកនាំទាំង២ជួបទល់មុខគ្នា។
នៅក្នុងសន្និសីទកាសែតអំពីជំនួបតាមទូរស័ព្ទរយៈពេល២ម៉ោងនោះ សេតវិមានបាននិយាយថា សហរដ្ឋអាមេរិកមិនបានផ្លាស់ប្តូរជំហរនៃគោលនយោបាយរបស់ខ្លួនអំពីកោះតៃវ៉ាន់ទេ។ សេតវិមាននិយាយថា៖ «សហរដ្ឋអាមេរិកប្រឆាំងយ៉ាងខ្លាំងដល់ការខិតខំប្រឹងប្រែងជាឯកតោភាគីដើម្បីផ្លាស់ប្តូរស្ថានភាពធម្មតាបច្ចុប្បន្ន ឬ ធ្វើឱ្យអន្តរាយសន្តិភាព និងស្ថិរភាពនៅច្រកសមុទ្រតៃវ៉ាន់»។
នេះជាការនិយាយទូរស័ព្ទលើកទី៥រវាងមេដឹកនាំទាំង២ ចាប់តាំងពីលោក Biden បានចូលកាន់តំណែងជាប្រធានាធិបតីនៅឆ្នាំ ២០២១មក។
លោកស្រី Anita Kellogg ជាអ្នកស្រាវជ្រាវក្រោយថ្នាក់បណ្ឌិតនៅឯវិទ្យាស្ថានគោលនយោបាយការបរទេសនៅឯសាកលវិទ្យាល័យ John Hopkins បាននិយាយថា៖ «ជាអកុសល ការសន្ទនាតាមទូរស័ព្ទនេះមិនបានផ្លាស់ប្តូរអ្វីជាដុំកំភួនទេ។ វាមិនបានកាត់បន្ថយការតានតឹងកម្រិតខ្ពស់នៅក្នុងប្រវត្តិសាស្ត្រ រវាងប្រទេសទាំង២នេះទេ។ ហើយខ្ញុំជឿជាក់ថា ជំហរនៅតែដដែល»។
ដំណើរទស្សនកិច្ចរបស់សមាជិកសភាសហរដ្ឋអាមេរិកទៅកាន់កោះតៃវ៉ាន់ត្រូវបានរដ្ឋាភិបាលក្រុងប៉េកាំងមើលឃើញថា ផ្ទុយនឹងគោលនយោបាយ«ចិនតែមួយ»របស់ក្រុងវ៉ាស៊ីនតោន ដែលទទួលស្គាល់ក្រុងប៉េកាំងជារដ្ឋាភិបាលតែមួយរបស់ចិន។ ទីក្រុងប៉េកាំងចាត់ទុកតៃវ៉ាន់ដែលគ្រប់គ្រងដោយខ្លួនឯងថា ជាខេត្តបំបែកខ្លួន៕
