ប្រធានាធិបតីតៃវ៉ាន់អ្នកស្រី Tsai Ing-wen បានព្រមានរដ្ឋាភិបាលចិននៅក្នុងសុន្ទរកថាមួយនាទិវាបុណ្យជាតិរបស់តៃវ៉ាន់នៅថ្ងៃចន្ទនេះថា កោះតៃវ៉ាន់នឹងមិនបោះបង់ចោលបែបបទនៃការរស់នៅបែបប្រជាធិបតេយ្យរបស់ខ្លួននោះទេ។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
នៅក្នុងសុន្ទរកថានោះ អ្នកស្រី Tsai បានធ្វើការប្រៀបធៀបការឈ្លានពានរបស់ប្រទេសរុស្ស៊ីនៅប្រទេសអ៊ុយក្រែនជាមួយនឹងគោលបំណងរបស់រដ្ឋាភិបាលចិនដែលកន្លងមកធ្លាប់បានអះអាងថានឹងដណ្ដើមគ្រប់គ្រងកោះតៃវ៉ាន់នៅថ្ងៃណាមួយដោយប្រើកម្លាំងប្រសិនបើចាំបាច់។
អ្នកស្រី Tsai បាននិយាយដូច្នេះថា៖ «យើងពិតជាមិនអាចធ្វើព្រងើយកន្ដើយជាមួយនឹងបញ្ហាប្រឈមដែលការពង្រីកឥទ្ធិពលយោធា [របស់ចិន] ទាំងនេះបានបង្កចំពោះរបៀបរៀបរយពិភពលោកដែលមានលក្ខណៈសេរីនិងប្រជាធិបតេយ្យនោះទេ»។
អ្នកស្រីបានបន្ថែមថា៖ «[ប្រសិនបើមាន] ការបំផ្លាញលទ្ធិប្រជាធិបតេយ្យនិងសេរីភាពរបស់តៃវ៉ាន់[នោះវា] នឹងក្លាយជាការបរាជ័យដ៏ធ្ងន់ធ្ងរសម្រាប់បណ្ដាប្រទេសប្រជាធិបតេយ្យនានានៅលើពិភពលោក»។
កោះតៃវ៉ាន់និងប្រទេសចិនបានបំបែកចេញពីគ្នានៅចុងសម័យសង្គ្រាមស៊ីវិលរបស់ចិននៅក្នុងឆ្នាំ ១៩៤៩។ ប្រធានាធិបតីចិនលោក Xi Jinping បានបង្កើនការដាក់សម្ពាធការទូត សេដ្ឋកិច្ច និងយោធាលើរដ្ឋាភិបាលតៃវ៉ាន់នៅក្នុងរយៈពេលប៉ុន្មានឆ្នាំចុងក្រោយនេះ។
អ្នកស្រី Tsai បានបញ្ជាក់ថា ការក្លាយជាផ្នែកមួយរបស់ប្រទេសចិនគឺមិនអាចទទួលយកបានទេសម្រាប់ប្រជាពលរដ្ឋតៃវ៉ាន់ ដោយសារតែ «នៅក្នុងអំឡុងពេល ៧៣ ឆ្នាំកន្លងមកនេះ ប្រជាពលរដ្ឋតៃវ៉ាន់បានរស់នៅនិងរីកចម្រើនទៅមុខជាមួយគ្នានៅលើទឹកដីតៃវ៉ាន់នេះ និងបានបង្កើតនូវអារម្មណ៍ដ៏ខ្លាំងក្លានៃអត្តសញ្ញាណនិងភាពជាម្ចាស់កម្មសិទ្ធិ»។
អ្នកស្រីបានបន្ថែមថា៖ «ការយល់ស្របគ្នាជារួមដ៏ទូលំទូលាយបំផុតក្នុងចំណោមប្រជាពលរដ្ឋតៃវ៉ាន់និងគណបក្សនយោបាយផ្សេងៗគឺថា យើងត្រូវតែការពារអធិបតេយ្យភាពជាតិរបស់យើងនិងបែបបទនៃការរស់នៅដែលមានសេរីភាពនិងបែបប្រជាធិបតេយ្យរបស់យើង។ ក្នុងចំណុចនេះ យើងនឹងមិនសម្របសម្រួលណាមួយ [ជាមួយនឹងរដ្ឋាភិបាលចិន] នោះទេ»។
រដ្ឋាភិបាលចិនបានឆ្លើយតបចំពោះការលើកឡើងរបស់អ្នកស្រី Tsai នេះ ដោយបានហៅគណបក្សនយោបាយរបស់អ្នកស្រីថាជា «បុព្វហេតុចម្បងនៃភាពតានតឹងបច្ចុប្បន្ន» រវាងចិននិងតៃវ៉ាន់។
អ្នកនាំពាក្យក្រសួងការបរទេសចិនអ្នកស្រី Mao Ning បាននិយាយថា៖ «យើងមានឆន្ទៈនៅក្នុងការបង្កើតលំហដ៏ទូលំទូលាយសម្រាប់ការបង្រួបបង្រួមឡើងវិញដោយសន្តិវិធី ប៉ុន្តែយើងនឹងមិនទុកលំហណាមួយជាដាច់ខាតសម្រាប់ឯករាជ្យភាពរបស់តៃវ៉ាន់និងសម្រាប់សកម្មភាពផ្ដាច់ខ្លួនណាមួយ»៕
