ប្រធានាធិបតីតៃវ៉ាន់អ្នកស្រី Tsai Ing-wen បាននិយាយនៅថ្ងៃអង្គារនេះថា ការគំរាមកំហែងដែលបង្កឡើងដោយរបបអាជ្ញាធិបតេយ្យគឺជា«ការដាស់ស្មារតីសម្រាប់អ្នកប្រជាធិបតេយ្យនានានៅលើពិភពលោក»។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
អ្នកស្រីថ្លែងដូច្នេះនៅពេលដែលអ្នកស្រីបើកកិច្ចប្រជុំមួយដែលមានការចូលរួមពីសកម្មជនប្រហែល ២០០ នាក់មកពីប្រទេសចំនួន ៧០ ដែលក្នុងនោះរួមមានទាំងប្រទេសអ៊ីរ៉ង់ រុស្ស៊ី អ៊ុយក្រែន និងទីក្រុងហុងកុងផងដែរ នៅក្នុងទីក្រុងតៃប៉ិ កោះតៃវ៉ាន់។
កិច្ចប្រជុំនេះបានធ្វើឡើងក្នុងពេលពីរថ្ងៃក្រោយមក បន្ទាប់ពីប្រធានាធិបតីចិនលោក Xi Jinping ត្រូវបានសមាជគណបក្សកុម្មុយនីស្តចិនជ្រើសរើសឱ្យធ្វើជាមេដឹកនាំនៅអាណត្តិទី ៣ ជាបន្តទៀត។
កោះតៃវ៉ាន់រងការគំរាមកំហែងមិនឈប់ឈរពីសំណាក់ប្រទេសចិនដែលជាប្រទេសអាជ្ញាធិបតេយ្យ ដែលប្រទេសនេះចាត់ទុកតៃវ៉ាន់ថាជាផ្នែកមួយរបស់ខ្លួន។
អ្នកស្រី Tsai បាននិយាយថា ប្រជាពលរដ្ឋតៃវ៉ាន់ «មិនដែលគេចចេញពីបញ្ហាប្រឈមនៃការជ្រៀតជ្រែកបែបអាជ្ញាធិបតេយ្យនោះទេ … និងបានតតាំងជាមួយនឹងកម្លាំងណាដែលមានបំណងបំផ្លាញ» លទ្ធិប្រជាធិបតេយ្យរបស់កោះតៃវ៉ាន់។
អ្នកស្រីបានបញ្ជាក់នៅក្នុងសុន្ទរកថានៅក្នុងកិច្ចប្រជុំនោះដែលលើកឡើងអំពីការឈ្លានពានរបស់ប្រទេសរុស្ស៊ីលើប្រទេសអ៊ុយក្រែនថា៖ «បញ្ហាប្រឈមដែលបង្កឡើងដោយរបបអាជ្ញាធិបតេយ្យគឺជាការដាស់ស្មារតីដ៏សំខាន់មួយសម្រាប់អ្នកប្រជាធិបតេយ្យនានានៅជុំវិញពិភពលោក»៕
តៃវ៉ាន់រៀបចំកិច្ចប្រជុំជាមួយសកម្មជនប្រជាធិបតេយ្យមកពីជុំវិញពិភពលោក
ទីក្រុងតៃប៉ិ កោះតៃវ៉ាន់ —
