ពួកអ្នកចរចាខាងឧទ្ទាមស៊ីរីបានប្រកាសកាលពីថ្ងៃសៅរ៍ថា ពួកគេគាំទ្រការចរចាដែលសម្របសម្រួលដោយប្រទេសតួកគី និងរុស្ស៊ីដែលមានគោលបំណងស្វែងរកដំណោះស្រាយខាងនយោបាយដល់ជម្លោះដែលមានរយៈពេល៦ឆ្នាំនៅក្នុងប្រទេសស៊ីរី ក៏ប៉ុន្តែ ពួកឧទ្ទាមបាននិយាយថា ជំនួបដែលបានគ្រោងធ្វើឡើងនៅចុងខែនេះនៅក្នុងប្រទេសកាហ្សាក់ស្ថានត្រូវបានមើលឃើញថាជាជំហានដំបូងឆ្ពោះទៅកាន់ការបន្តដំណើរការសន្តិភាពនៅក្នុងទីក្រុងហ្សឺណែវដែលគាំទ្រដោយអង្គការសហប្រជាជាតិដែលបានជាប់គាំងជាយូរយារណាស់មកហើយ។
គណៈកម្មាធិការចរចាជាន់ខ្ពស់របស់ក្រុមប្រឆាំងស៊ីរីដែលបានគេរារាំងមិនឲ្យចូលរួមដំណើរការចរចាដែលសម្របសម្រួលដោយតួកគី និងរុស្ស៊ីបាននិយាយនៅក្នុងសេចក្តីថ្លែងការណ៍ថា ខ្លួនគាំទ្រគណៈប្រតិភូយោធាដែលនឹងចូលរួមជំនួបនៅក្នុងរដ្ឋធានី Astana នៃប្រទេសកាហ្សាក់ស្ថាន។
ក្រុមប្រឆាំងនោះបាននិយាយថា «គណៈកម្មាធិការចរចាជាន់ខ្ពស់បានបញ្ជាក់ថា ខ្លួនប្រុងប្រៀបហើយដើម្បីគាំទ្រគណៈប្រតិភូយោធាដែលត្រូវបង្កើតឡើងដោយក្រុមប្រឆាំងដើម្បីចូលរួមការចរចានោះ»។ គណៈកម្មាធិការចរចាជាន់ខ្ពស់នោះ បានបញ្ជាក់ទៀតថា ការចរចានៅប្រទេសកាហ្សាក់ស្ថានត្រូវតែគាំទ្រការឈប់បាញ់គ្នានៅក្នុងប្រទេសស៊ីរីដែលបានសម្របសម្រួលដោយរដ្ឋាភិបាលក្រុងមូស្គូ និងអង់ការ៉ាដែរ។
ក៏ប៉ុន្តែ គណៈកម្មាធិការចរចាជាន់ខ្ពស់របស់ក្រុមប្រឆាំងនោះ បានបញ្ជាក់ថា ជំនួបនៅក្នុងប្រទេសកាហ្សាក់ស្ថានជាជំហានដំបូងសម្រាប់ការចរចាខាងនយោបាយបន្ទាប់នៅក្នុងទីក្រុងហ្សឺណែវ។ សេចក្តីថ្លែងការណ៍នោះបានចេញផ្សាយបន្ទាប់ពីជំនួបរយៈពេល២ថ្ងៃដោយគណៈកម្មាធិការចរចាជាន់ខ្ពស់របស់ក្រុមប្រឆាំងនៅក្នុងរាជធានីរីយ៉ាដនៃប្រទេសអារ៉ាប៊ីសាអូឌីត៕
