រដ្ឋាភិបាលស៊ីរីនិងគណៈប្រតិភូក្រុមប្រឆាំងបានប្រមូលផ្តុំគ្នានៅថ្ងៃចន្ទនេះក្នុងរដ្ឋធានីនៃប្រទេសកាហ្សាក់ស្ថាន ដើម្បីធ្វើការចរចាសន្តិភាពគាំទ្រដោយប្រទេសរុស្សីនិងប្រទេសតួកគី ដែលប្រភពពួកឧទ្ទាមបាននិយាយថាគ្មានរួមបញ្ចូលកិច្ចចរចាគ្នាដោយផ្ទាល់ទេ។
គេរំពឹងថាកិច្ចចរចានៅក្នុងក្រុង Astana នឹងផ្តោតការយកចិត្តទុកដាក់លើការពង្រឹងកិច្ចឈប់បាញ់គ្នានៅទូទាំងប្រទេសជាតិដែលបានសម្របសម្រួលដោយប្រទេសរុស្សី អ៊ីរ៉ង់និងប្រទេសតួកគី កាលពីខែធ្នូដែលមានការគោរពតាមដោយភាគច្រើន។
ការប៉ុនប៉ងកាលពេលមុនៗក្នុងការធ្វើឱ្យមានកិច្ចឈប់បាញ់គ្នាដែលមានទាក់ទិនដោយស.រ.អា.និងអ.ស.ប.បានរលំនៅពេលដែលភាគីច្បាំងគ្នាបានបាញ់តគ្នានិងបានបន្ទោសគ្នាទៅវិញទៅមក។ កិច្ចចរចាសន្តិភាពកាលពីពេលមុនៗ ដោយមានរួមបញ្ចូលទាំងការចរចាសន្តិភាពថ្មីបំផុតកាលពីមួយឆ្នាំមុននេះបានធ្វើឱ្យមានការជឿនលឿនតែបន្តិចបន្តួចដើម្បីបញ្ចប់សង្គ្រាមនេះដែលបានចាប់ផ្តើមមានកាលពីខែមិនាឆ្នាំ២០១១។
នៅពេលលោកបើកកិច្ចចរចាគ្នានេះ លោក Kairat Abdrakhmanov រដ្ឋមន្ត្រីការបរទេសនៃប្រទេសកាហ្សាក់ស្ថាន បាននិយាយថា«នេះជាបំណងស្មោះត្រង់បំផុតរបស់យើងថាកិច្ចចរចានេះនឹងនាំឱ្យមានការទំលាយភាពទាល់ច្រកដល់វិបត្តិក្នុងប្រទេសស៊ីរី។ នៅពេលនេះវាអាស្រ័យលើយើងម្នាក់ៗក្នុងការធ្វើឱ្យមានការទំលាយភាពទាល់ច្រកពិតប្រាកដដែលប្រជារាស្ត្រស៊ីរីស័ក្តិសមទទួល។» លោក Staffan de Mistura ប្រេសីតអ.ស.ប.ក៏ចូលរួមក្នុងកិច្ចចរចានេះដែរដែលនឹងប្រព្រឹត្តទៅយ៉ាងហោចណាស់រហូតដល់ថ្ងៃអង្គារ៕
