កិច្ចពិភាក្សាជុំទី ៤ រវាងរដ្ឋាភិបាលរបស់លោកប្រធានាធិបតីស៊ីរី Bashar al-Assad និងអ្នកតំណាងមកពីភាគីប្រឆាំងពាក់ព័ន្ធនឹងអនាគតនៃស្ថានការណ៍នយោបាយនៅក្នុងប្រទេសស៊ីរី បានធ្វើឡើងនៅក្នុងទីក្រុងហ្សឺណែវ ប្រទេសស្វ៊ីស នៅថ្ងៃព្រហស្បតិ៍នេះ។
លោក Staffan de Mistura បេសកជនពិសេសរបស់អង្គការសហប្រជាជាតិប្រចាំប្រទេសស៊ីរី កាលពីថ្ងៃពុធម្សិលមិញបានទទួលស្គាល់ថា កិច្ចពិភាក្សានេះនឹងទំនងជាមិនអាចស្វែងរកដំណោះស្រាយសម្រាប់ការវាយប្រយុទ្ធគ្នាដែលអូសបន្លាយអស់រយៈពេល ៦ ឆ្នាំ នៅក្នុងប្រទេសស៊ីរីនោះទេ។
លោក De Mistura បាននិយាយថា មូលដ្ឋាននៃកិច្ចពិភាក្សានេះគឺផ្ដោតលើសេចក្ដីសម្រេចរបស់អង្គការសហប្រជាជាតិលេខ ២២៥៤ ដែលអំពាវនាវឲ្យមាននូវរដ្ឋធម្មនុញ្ញថ្មីមួយ និងការបោះឆ្នោតថ្មី ដែលឈានទៅដល់ការបង្កើតរដ្ឋាភិបាលមួយដែលគួរឲ្យជឿទុកចិត្តបាន និងមិនមានការប្រកាន់បក្ខពួក។
លោកក៏បានបញ្ជាក់ផងដែរថា ប្រទេសរុស្ស៊ីបានស្នើរដ្ឋាភិបាលស៊ីរីឲ្យបញ្ឈប់ការវាយប្រហារតាមអាកាសក្នុងអំឡុងពេលកិច្ចពិភាក្សាកំពុងដំណើរការ ទោះបីជាមានការរាយការណ៍ថា ការវាយប្រយុទ្ធគ្នានៅតែបន្តធ្វើក៏ដោយ។
កិច្ចពិភាក្សានេះបានធ្វើឡើង ចំពេលដែលកិច្ចឈប់វាយប្រយុទ្ធគ្នាមួយត្រូវបានរៀបចំឡើងដោយរដ្ឋាភិបាលក្រុងមូស្គូ និងរដ្ឋាភិបាលតួកគី និងការជំទាស់ជាមួយនឹងកិច្ចពិភាក្សាដែលធ្វើឡើងជាទៀងទាត់នៅក្នុងប្រទេសកាហ្សាក់ស្ថាន។
កិច្ចពិភាក្សានេះគឺជា កិច្ចពិភាក្សាដែលគាំទ្រដោយអង្គការសហប្រជាជាតិនៅក្នុងរយៈពេល ១០ ខែ ចុងក្រោយនេះ៕
