ប្រទេសរុស្ស៊ីពិចារណាការចរចាសន្តិភាពជុំទី២ស្តីពីសន្តិភាពក្នុងប្រទេសស៊ីរីដែលធ្វើឡើងនៅសប្តាហ៍នេះនៅប្រទេសកាហ្សាក់ស្ថានថា ជាជោគជ័យ នេះតាមការបញ្ជាក់របស់មន្រ្តីជាន់ខ្ពស់ម្នាក់របស់ក្រសួងការបរទេសកាលពីថ្ងៃសៅរ៍ម្សិលមិញ។
លោក Sergey Vershinin នាយកនៃនាយកដ្ឋានសម្រាប់តំបន់មជ្ឈឹមបូព៌ា និងអាហ្វ្រិកខាងជើងនៃក្រសួងការបរទេសរុស្ស៊ី បានប្រាប់បណ្តាញផ្សាយព័ត៌មានរដ្ឋរុស្ស៊ីថា ការចរចានៅក្នុងទីក្រុងអាស្តាណា ជាជំហានដ៏មានសារៈសំខាន់មួយឆ្ពោះទៅកាន់ការដោះស្រាយវិបត្តិក្នុងប្រទេសស៊ីរី។
ប្រទេស៣ដែលរៀបចំសន្និសីទនោះគឺ រុស្ស៊ី និងអ៊ីរ៉ង់ដែលគាំទ្ររដ្ឋាភិបាលស៊ីរី ហើយតួកគីដែលគាំទ្រពួកឧទ្ទាមខ្លះបានជំទាស់ប្រឆាំងរដ្ឋាភិបាលស៊ីរី បានរៀបចំការចរចានៅប្រទេសកាហ្សាក់ស្ថាន។ ក្រៅពីប្រទេសម្ចាស់ផ្ទះ ប្រទេសផ្សេងទៀតដែលចូលរួម រួមមានពួកតំណាងមកពីរដ្ឋាភិបាលស៊ីរី និងក្រុមប្រឆាំងស៊ីរី អង្គការសហប្រជាជាតិនិងពួកអ្នកសង្កេតការណ៍ផ្សេងៗទៀតដូចជា សហរដ្ឋអាមេរិក និងប្រទេសហ្ស៊កដានី។
គណៈប្រតិភូនៅឯការចរចាក្នុងរដ្ឋធានីនៃប្រទេសកាហ្សាក់ស្ថាន មានចំនួនតិចជាងនិងកម្រិតទាបជាងក្នុងអំឡុងនៃការចរចាជុំទី១នៅក្នុងទីក្រុងអាស្តាណាកាលពីខែមករា។ ពួកគេមិនអាចព្រមព្រៀងគ្នាចេញសេចក្តីថ្លែងការណ៍ផ្តាច់ព្រាត់ហើយនៅមិនទាន់មានការចរចាដោយផ្ទាល់រវាងរដ្ឋាភិបាលស៊ីរី និងក្រុមប្រឆាំងនៅឡើយទេ។ ថ្វីបើមានកត្តាទាំងអស់នេះក៏ដោយ ពួកមន្រ្តីរុស្ស៊ី បានវាយតម្លៃប្រកបដោយសុទិដ្ឋិនិយមអំពីលទ្ធផលនៃការចរចានេះ៕
