មនុស្ស៩នាក់រួមទាំងមន្ត្រីយោធាជាន់ខ្ពស់ដែលជាប់ពាក់ព័ន្ធនឹងការជួញដូរអវយវៈមនុស្សដ៏ចម្រូងចម្រាសមួយ ត្រូវបានតុលាការសម្រេចដោះលែងឱ្យមានសេរីភាពវិញហើយនៅថ្ងៃច័ន្ទនេះ បន្ទាប់ពីបានឃាត់ខ្លួនចំនួនពីរថ្ងៃ។
កាលពីថ្ងៃសៅរ៍នេះ ក្រុមសមត្ថកិច្ចបានចុះទៅចាប់ខ្លួនមនុស្ស៩នាក់រួមទាំងលោកឧត្ដមសេនីយ៍ឯក លី សុវណ្ណ អនុប្រធាននាយកដ្ឋានភស្តុភារក្រសួងការពារជាតិ និងជាប្រធានមន្ទីរពេទ្យព្រះកេតុមាលា លោក កែវ ដាវុធ អនុប្រធានមន្ទីរពេទ្យ ក្រុមវេជ្ជបណ្ឌិតជនជាតិខ្មែរ វៀតណាមនិងចិន និងជនជាតិវៀតណាមចំនួន២នាក់ ក្នុងករណីសង្ស័យជាប់ពាក់ព័ន្ធហ្នឹងការជួញដូរក្រលៀនដែលជាអវយវៈមនុស្សខុសច្បាប់។ ជនទាំងនោះត្រូវបានសង្ស័យថាបានជាប់ពាក់ព័ន្ធហ្នឹងការជួញដូរនេះអស់រយៈពេលជាច្រើនខែមកហើយនៅមន្ទីរពេទ្យព្រះកេតុមាលា។ មន្ទីរពេទ្យព្រះកេតុមាលាជាមន្ទីរពេទ្យយោធាមួយមានទីតាំងនៅក្បែរវត្តភ្នំ ក្រុងភ្នំពេញ ដែលទទួលយកអ្នកជំងឺជាជនស៊ីវិលផងដែរ។
ក៏ប៉ុន្តែជនសង្ស័យទាំងនោះត្រូវបានដោះលែងមកវិញហើយនៅថ្ងៃនេះ ដោយតុលាការសំអាងថាពុំមានភស្តុតាងគ្រប់គ្រាន់។ នេះបើតាមលោក ព្រំ សន្ធរ ស្នងការរងនគរបាលរាជធានីភ្នំពេញ។
លោក ព្រំ សន្ធរ ដែលបានស៊ើបអង្កេតករណីនេះអះអាងថាពិតជាមានការវះកាត់យកក្រលៀនមែននៅមន្ទីរពេទ្យព្រះកេតុមាលា ប៉ុន្តែវាជាការព្រមព្រៀងទាំងសងខាងប៉ុណ្ណោះ។
«ក្រោយពីយើងធ្វើការសាកសួរហ្នឹងទៅ យើងឃើញព័ត៌មាននិងឯកសារមួយចំនួន គឺយើងសន្និដ្ឋានបានថាការងាររបស់គាត់ហ្នឹងគឺមានគោលការណ៍ពីរសំខាន់។ ទីមួយគឺការអភិវឌ្ឍបច្ចេកវិទ្យាវេជ្ជសាស្ត្រ និងទីពីរគឺជារឿងមនុស្សធម៌។ មានការឯកភាពគ្នារវាងអ្នកផ្តល់និងអ្នកជំងឺហ្នឹង គឺអត់មានការបង្ខិតបង្ខំទេ»។
លោក មាស ច័ន្ទពិសិដ្ឋ ព្រះរាជអាជ្ញាដឹកនាំការចុះឃាត់ខ្លួននេះមិនអាចទាក់ទងបានទេនៅថ្ងៃនេះ។ ប៉ុន្តែសេចក្តីប្រកាសព័ត៌មានរបស់អយ្យការអមសាលាដំបូងរាជធានីភ្នំពេញនៅថ្ងៃច័ន្ទនេះអះអាងថា«ករណីខាងលើនេះពុំមែនជាបទល្មើសជួញដូរសរីរាង្គមនុស្ស (ក្រលៀន) តាមច្បាប់ព្រហ្មទណ្ឌកម្ពុជាដូចការចុះផ្សាយរបស់សារព័ត៌មានមួយចំនួននោះឡើយ»។
សេចក្តីថ្លែងការណ៍នេះបន្តថា «ករណីការវះកាត់ប្តូរក្រលៀននៅមន្ទីរពេទ្យព្រះកេតុមាលាគឺធ្វើឡើងក្រោមកិច្ចសហប្រតិបត្តិការរវាងក្រសួងការពារជាតិនៃព្រះរាជាណាចក្រកម្ពុជានិងក្រសួងការពារជាតិនៃសាធារណរដ្ឋប្រជាមានិតចិនក្នុងក្របខណ្ឌជំនួយឥតសំណងដោយមានការបញ្ជូនអ្នកឯកទេសដែលជាវេជ្ជបណ្ឌិតចិនឱ្យមកបណ្តុះបណ្តាលវេជ្ជបណ្ឌិតយោធាកម្ពុជាដើម្បីអភិវឌ្ឍន៍បច្ចេកវិទ្យានិងផ្លាស់ប្តូរបទពិសោធន៍ផ្នែកវះកាត់ប្តូរក្រលៀនក្នុងគោលដៅជួយសង្គ្រោះប្រជាពលរដ្ឋកម្ពុជាក្នុងពេលអនាគត»។
ក្រលៀនមនុស្សបានក្លាយជាមុខសញ្ញានៃការជួញដូរសម្រាប់ជំនួសក្រលៀនមនុស្សចាស់ឬអ្នកដែលខ្សោយក្រលៀន។
នាពេលកន្លងមកមានមនុស្ស១០នាក់ហើយ ដែលបានមកវះកាត់ផ្ដល់ក្រលៀននៅមន្ទីរពេទ្យយោធាមួយនេះ ហើយអ្នកស្ម័គ្រចិត្តទាំងនោះសុទ្ធសឹងតែជាជនជាតិវៀតណាម។ នេះបើតាមលោក ព្រំ សន្ធរ។
យ៉ាងណាក៏ដោយ លោក ព្រំ សន្ធរ នៅតែអះអាងថាករណីនេះមិនមែនជាការជួញដូរនោះទេ ក៏ប៉ុន្តែលោកបានបង្ហើបឱ្យដឹងថាអ្នកដែលបរិច្ចាគក្រលៀនទាំងនោះបានសារភាពថាពួកគេបង្ខំចិត្តធ្វើដូច្នេះដោយសារបញ្ហាជីវភាពប៉ុណ្ណោះ។
«តាមការប្រាប់យើងគឺដោយសារជីវភាពគាត់ខ្វះខាត អញ្ចឹងទៅគាត់បរិច្ចាគទៅ ខាងនោះគេដឹងគុណគាត់យ៉ាងម៉េច អីយ៉ាងម៉េច យើងមិនដឹងទេ»។
តាមច្បាប់របស់កម្ពុជា ការជួញដូរអវយវៈមនុស្សអាចប្រឈមនឹងការជាប់ពន្ធនាគារចន្លោះពី៧ឆ្នាំដល់១៥ឆ្នាំហើយបើតាមប្រភពនានាឱ្យដឹងថាក្រលៀនមួយមានតម្លៃរហូតដល់៤ម៉ឺនដុល្លារនៅលើទីផ្សារងងឹតក្នុងប្រទេសកម្ពុជា។
លោក មឿន តុលា មន្ត្រីកម្មវិធីសិទ្ធិការងាររបស់មជ្ឈមណ្ឌលអប់រំច្បាប់សម្រាប់សហគមន៍ អះអាងថាការជួញដូរអវយវៈមនុស្សនៅកម្ពុជាកំពុងកើតមានច្រើន ប៉ុន្តែអ្នកជួញដូរខុសច្បាប់ដែលជាមន្ត្រីធំៗមិនដែលត្រូវបាននាំមកផ្ដន្ទាទោសនោះទេ។ ហើយលោក មឿន តុលា យល់ថាករណីវះកាត់ផ្ដល់ក្រលៀននៅមន្ទីរពេទ្យព្រះកេតុមាលាមិនមែនជាការស្ម័គ្រចិត្តទេ។
«ខ្ញុំគិតថាវាមិនមែនជារឿងមួយស្ម័គ្រចិត្តទេ។ ខ្ញុំនៅតែជឿជាក់ថាវាជាការជួញដូរអវៈយវៈមនុស្ស ដូចច្បាប់ហាមឃាត់ហើយថាមនុស្សមិនមែនជាទំនិញទេ មិនអាចជួញដូរបានទេ។ ការជួញដូរវាតែងតែជាប់ពាក់ព័ន្ធហ្នឹងមន្ត្រីធំៗហ្នឹង ហើយកាលណាវាចូលដល់អ្នកធំៗហ្នឹង គឺតែងតែទទួលបាននិទណ្ឌភាពរហូត មិនដែលទទួលបានការដាក់ទោសទណ្ឌឱ្យបានច្បាស់លាស់ទេ»។
លោក មឿន តុលា បញ្ជាក់ថាប្រសិនបើមន្ត្រីធំៗដែលនៅពីក្រោយខ្នងការជួញដូរខុសច្បាប់បែបនេះមិនត្រូវបានយកទៅផ្ដន្ទាទោសខុសច្បាប់ បទល្មើសបែបនេះនឹងនៅតែកើតមានបន្តទៀត៕
