នៅព្រឹកថ្ងៃច័ន្ទនេះ តុលាការកំពូលបានសម្រេចមិនទម្លាក់បទចោទប្រកាន់ទាំងឡាយប្រឆាំងនឹងអតីតអ្នកការពារសិទ្ធិមនុស្សលោក នី ចរិយា ដែលបច្ចុប្បន្ននេះជាអគ្គលេខាធិការរងគណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) ហើយបានបង្វែរសំណុំរឿងនេះ ទៅជំនុំជម្រះសារជាថ្មីនៅសាលាឧទ្ធរណ៍វិញ ដោយសារតែការខ្វះខាតនៃភ័ស្តុតាង។ នេះបើយោងតាមការបញ្ជាក់របស់អ្នកឃ្លាំមើលសិទ្ធិមនុស្សនៅប្រទសកម្ពុជា និងមន្ត្រីនាំពាក្យរបស់តុលាការកំពូល។
លោកនី ចរិយា ដែលជាអតីតប្រធានការិយាល័យស៊ើបអង្កេតរបស់សមាគមការពារសិទ្ធិមនុស្ស អាដហុក (Adhoc) ត្រូវបានសាលាដំបូងរាជធានីភ្នំពេញ ផ្ដន្ទាទោសពីបទបរិហារកេរ្តិ៍ជាសាធារណៈ បទបរិហារបង្កាច់កេរ្តិ៍ និងផ្សព្វផ្សាយនូវការអត្ថាធិប្បាយដើម្បីដាក់សម្ពាធលើយុត្តាធិការ។ តុលាការក្រុងភ្នំពេញបានកាត់ទោសឲ្យលោកជាប់ក្នុងពន្ធនាគារប្រាំមួយខែ ប៉ុន្តែទោសនេះ មិនទាន់ត្រូវបានអនុវត្តន៍ ឬព្យួរនោះឡើយ។ ការកាត់ទោសនេះ ត្រូវបានធ្វើឡើង កាលពីចុងខែកញ្ញា ឆ្នាំ២០១៦ គឺនៅពេលលោកជាប់ឃុំ ក្នុងសំណុំរឿងផ្សេងទៀត។
លោកអំ សំអាត ប្រធានការិយាល័យបច្ចេកទេសស៊ើបអង្កេតរបស់អង្គការឃ្លាំមើល និងការពារសិទ្ធិមនុស្សលីកាដូ (Licadho) ប្រាប់ VOA នៅថ្ងៃច័ន្ទនេះថា តុលាការកំពូលបានសម្រេចត្រឹមត្រូវទៅ តាមនីតិវិធី ដោយបានបង្វែររឿងនេះ ទៅសាលាឧទ្ធរណ៍ដើម្បីធ្វើការជំនុំជម្រះឡើងវិញ។ យ៉ាងណាក៏ដោយ លោកថា លោកនី ចរិយា គួរត្រូវបានរួចផុតពីការចោទប្រកាន់ទាំងអស់ទាក់ទិនបទបរិហារកេរ្តិ៍នេះ ក្នុងពេលសាលាឧទ្ធរណ៍បើកការកាត់ក្តីឡើងវិញ ដោយហេតុថា រឿងរ៉ាវដែលបានកើតឡើង តាមរយៈជម្លោះដីធ្លីមួយនៅឯខេត្តសៀមរាប ត្រូវបានដោះស្រាយចប់ជាស្ថាពរទៅហើយ។
«អ្វីដែលលោកធ្វើហ្នឹងគឺ មានឯកសារគ្រប់គ្រាន់នៅក្នុងហ្នឹង ហើយមកដល់បច្ចុប្បន្ន យើងឃើញថា ជនដែលត្រូវបានចាប់ប្រជាពលរដ្ឋសហគមន៍ដែលត្រូវបានចាប់ហ្នឹង ត្រូវបានដោះលែង ហើយបញ្ហាដីធ្លីហ្នឹងត្រូវបានដោះស្រាយទៀត។ អ៊ីចឹង គឺខ្ញុំគិតថា ល្មមតែដល់ពេលបញ្ចប់ បានន័យថា នៅពេលសាលាឧទ្ធរណ៍បើកសវនាការឡើងវិញ វាគួរតែទម្លាក់ចោលនូវបទចោទប្រកាន់ ទៅលើលោកនី ចរិយា នោះបាទ»។
កាលពីពាក់កណ្ដាលឆ្នាំ២០១៥ លោក សុក កែវបណ្ឌិត ព្រះរាជអាជ្ញារង និង លោក គី ឫទ្ធី ចៅក្រមស៊ើបសួរនៃសាលាដំបូងខេត្តសៀមរាប បានប្ដឹងលោក នី ចរិយា ពីបទបរិហារកេរ្តិ៍ ក្រោយពីលោកនី ចរិយា ធ្វើសន្និសីទសារព័ត៌មានមួយដោយនិយាយថា មន្ត្រីតុលាការខេត្តសៀមរាបចាប់ខ្លួនពលរដ្ឋអ្នកមានទំនាស់ដីធ្លីដោយអយុត្តិធម៌ និងបានប្ដឹងមន្ត្រីតុលាការមួយចំនួន រួមមានព្រះរាជអាជ្ញា និងចៅក្រមតុលាការខេត្តសៀមរាប ទៅកាន់ស្ថាប័នចំនួន៤ រួមទាំងក្រសួងយុត្តិធម៌ និងឧត្ដមក្រុមប្រឹក្សានៃអង្គចៅក្រម ពីបទចាប់ខ្លួនពលរដ្ឋរឿងដីធ្លី និងចោទប្រកាន់ពួកគាត់ខុស ទាក់ទងនឹងរឿងជម្លោះដីធ្លីនៅក្នុងស្រុកស្វាយលើ ខេត្តសៀមរាប កាលពីឆ្នាំ២០១៤។
កាលពីថ្ងៃទី២៦ ខែកញ្ញា ឆ្នាំ២០១៨ លោក នី ចរិយា បានបង្ហាញខ្លួននៅតុលាការកំពូល ដើម្បីទាមទារឲ្យតុលាការទម្លាក់រាល់បទចោទប្រកាន់ទាំងបីខាងលើប្រឆាំងនឹងលោក។ នាពេលនោះ លោកបានថ្លែងបញ្ជាក់នៅមុខក្រុមប្រឹក្សាជំនុំជម្រះថា ក្នុងពេលលោកនៅបម្រើការងារជាមន្ត្រីសិទ្ធិមនុស្សនោះ លោកបានស្វះស្វែងរកយុត្តិធម៌ដល់ជនរងគ្រោះពីរនាក់ឈ្មោះបឿន សុខ និងវ៉ែន ឡន ដែលមានវិវាទដីធ្លីមួយនៅឯខេត្តសៀមរាប។
លោកបានពណ៌នាថា មានការចាប់ខ្លួនជនរងគ្រោះទាំងពីរនាក់ដោយខុសពីនីតិវិធីនៃការចាប់ខ្លួន។ លោករៀបរាប់បន្តថា ការចាប់ខ្លួននាពេលនោះធ្វើឡើងដោយមានភាពមិនប្រក្រតី ដោយហេតុថា ជនរងគ្រោះមិនបានប្រព្រឹត្តបទល្មើសជាក់ស្តែង ហើយថា ការចាប់ខ្លួននោះបានកើតឡើងក្នុងទីតាំងដែលមិនមានជម្លោះដីធ្លី។
លោក អ៊ុក គឹមសិទ្ធិ អគ្គព្រះរាជអាជ្ញា និងជាអ្នកនាំពាក្យតុលាការកំពូល មានប្រសាសន៍ប្រាប់ VOA នៅថ្ងៃច័ន្ទដែរថា រឿងក្តីរបស់លោកនី ចរិយា ត្រូវបានតុលាការកំពូលរុញទៅឲ្យធ្វើការជំនុំជម្រះឡើងវិញនៅសាលាឧទ្ធរណ៍ ដោយសារកង្វះនៃមូលដ្ឋានក្នុងការរក្សាសាលដីការបស់តុលាការដំបូង។
លោកថ្លែងថា៖
«មូលហេតុច្រើន ខ្ញុំមិនអាចបញ្ជាក់ទាំងអស់ទេ គ្រាន់តែខ្ញុំសរុបថា សាលាឧទ្ធរណ៍គ្មាន មូលដ្ឋានគ្រប់គ្រាន់ក្នុងសម្រេចតម្កល់សាលក្រមរបស់សាលាដំបូងរាជធានី»។
នៅថ្ងៃច័ន្ទដដែលនេះដែរ បន្ទាប់ពីតុលាការកំពូលបានសម្រេចតម្កល់បទចោទបរិហារកេរ្តិ៍ប្រឆាំងនឹងលោកនី ចរិយា នោះ អង្គការសិទ្ធិមនុស្សលីកាដូ បានចេញសេចក្តីប្រកាសមួយ បញ្ជាក់ភ្លាមៗពីភាពមិនប្រក្រតី ទាក់ទិនក្តីក្តាំរបស់លោក នី ចរិយា។
សេចក្តីប្រកាសរបស់អង្គការលីកាដូចេញផ្សាយនៅថ្ងៃច័ន្ទនេះ បានសរសេរថា នៅមានភាពមិនប្រក្រតីជាច្រើនទៀតក្នុងដំណើរការសវនាការ។ ភាគីដើមបណ្ដឹងរដ្ឋប្បវេណី និងមេធាវីរបស់អ្នកទាំងនោះ មិនបានបង្ហាញវត្តមានក្នុងសវនាការនៅតុលាការកំពូលទេ ដែលធ្វើឱ្យភាគីជនត្រូវចោទគ្មានឱកាសជជីកសួរដេញដោលអ្នកទាំងនោះបាន ដែលដូចគ្នាទៅនឹងសវនាការនៅសាលាដំបូងរាជធានីភ្នំពេញដែរ។
សេចក្តីប្រកាសដដែលបានបញ្ជាក់បន្ថែមថា៖ «សិទ្ធិរបស់លោក នី ចរិយា ក្នុងការត្រៀមខ្លួន និងការការពារក្ដី សម្រាប់ការជំនុំជម្រះលើកដំបូង និងការជំនុំជម្រះនៅសាលាឧទ្ធរណ៍ក៏ត្រូវបានរឹតត្បិតផងដែរ ខណៈដែលពេលនោះលោកត្រូវបានឃុំខ្លួនបណ្ដោះអាសន្នក្នុងពន្ធនាគាររង់ចាំសវនាការ ដោយរងការចោទប្រកាន់ពីបទសមគំនិតសូកប៉ាន់សាក្សី នៅក្នុងរឿងក្ដីផ្សេងមួយទៀត»។
លោក នី ចរិយា ត្រូវបានតុលាការចោទប្រកាន់ក្នុងសំណុំរឿងសូកប៉ាន់សាក្សី ដែលផ្តើមចេញពីរឿងអាស្រូវស្នេហាលួចលាក់ដ៏គួរឲ្យសង្ស័យរបស់លោក កឹម សុខា ប្រធានគណបក្សសង្គ្រោះជាតិ ដែលត្រូវបានរំលាយចោលកាលពីឆ្នាំ២០១៧៕
