ការប្រកួតដណ្តើមយកបេក្ខភាពប្រធានាធិបតីសហរដ្ឋអាមេរិកពីគណបក្សប្រជាធិបតេយ្យបានប្រែក្លាយពីការប្រកួតដែលធ្លាប់មានបេក្ខជនយ៉ាងច្រើនរហូតដល់ជាង២០រូប មកជាការប្រកួតជាក់ស្តែងរវាងបុរសពីរនាក់ ក្រោយពីលទ្ធផលនៃការបោះឆ្នោតព្រមៗគ្នានៅរដ្ឋចំនួន១៤ បានផ្តល់លទ្ធផលដ៏ល្អដល់ លោក Joe Biden អតីតអនុប្រធានាធិបតីសហរដ្ឋអាមេរិក និងលោក Bernie Sanders សមាជិកព្រឹទ្ធសភាប្រចាំរដ្ឋ Vermont។
នៅក្នុងការបោះឆ្នោតបឋមជ្រើសរើសបេក្ខជនប្រធានាធិបតីក្នុងថ្ងៃតែមួយនៅរដ្ឋចំនួន១៤ ឬហៅថា Super Tuesday លោក Joe Biden បានឈ្នះក្នុងរដ្ឋចំនួន៩ រួមទាំងឈ្នះនៅរដ្ឋ Texas ដែលមានចំនួនប្រតិភូច្រើន ហើយដែលជាការភ្ញាក់ផ្អើលមួយ ដោយការស្ទង់មតិមុនការបោះឆ្នោតបានបង្ហាញថា លោក Bernie Sanders បាននាំមុខនៅរដ្ឋ Texas នេះ។ លោក Biden ក៏បានឈ្នះខ្លាំងនៅបណ្តារដ្ឋភាគខាងត្បូង សហរដ្ឋអាមេរិក រួមមានរដ្ឋ Virginia North Carolina Alabama Okhlahoma Tennessee និង Arkansas ហើយថែមទាំងបានឈ្នះនៅរដ្ឋភាគខាងជើងចំនួនពីរទៀត គឺរដ្ឋ Minnesota និង Massachusetts។
លោក Sanders បានយកឈ្នះនៅក្នុងដែលមានប្រតិភូច្រើនជាងគេគឺរដ្ឋ California (កាលីហ្វ័រញ៉ា) ក៏ដូចជាឈ្នះនៅរដ្ឋ Colorado, Utah និងរដ្ឋ Vermont ដែលជារដ្ឋកំណើតរបស់លោក Sanders។
បេក្ខជនទាំងពីរនៅប្រកិតប្រកៀកគ្នានៅឡើយនៅក្នុងរដ្ឋ Maine ភាគឦសានប្រទេសដែលនៅទីនោះការរាប់សន្លឹកឆ្នោតនៅបង្ហាញពីលទ្ធផលប្រកៀកគ្នាពេកមិនទាន់អាចប្រកាសអ្នកឈ្នះបាន។
លោក Sanders បានសម្តែងនូវភាពជឿទុកចិត្តនៅក្នុងការជួបប្រជុំជាមួយអ្នកគាំទ្រកាលពីយប់ថ្ងៃអង្គារនៅរដ្ឋ Vermont ដោយលោកមិនត្រឹមជឿជាក់ថាលោកនឹងក្លាយជា បេក្ខជនប្រធានាធិបតីពីគណបក្សប្រជាធិបតេយ្យតែប៉ុណ្ណោះទេ ប៉ុន្តែលោកនឹងយកឈ្នះលើលោកប្រធានាធិបតី Donald Trump ថែមទៀត។
នៅមុនការឈ្នះដំបូងក្នុងរដ្ឋ South Carolina កាលពីថ្ងៃសៅរ៍ យុទ្ធនាការឃោសនារបស់លោក Biden បានថមថយចុះយ៉ាងខ្លាំង។ ប៉ុន្តែក្រោយពីការឈ្នះនៅរដ្ឋភាគខាងត្បូងនោះ លោក Biden ក៏បានទទួលការគាំទ្រពីអតីតគូរប្រជែង សមាជិកព្រឹទ្ធសភាប្រចាំរដ្ឋ Minnesota អ្នកស្រី Amy Klobuchar និង លោក Pete Buttigie អតីតអភិបាលក្រុង South Bend រដ្ឋ Indiana ។
លោក Biden ថ្លែងទៅកាន់អ្នកគាំទ្រនៅរដ្ឋកាលីហ្វ័រញ៉ាកាលពីយប់ថ្ងៃអង្គារថា យប់ថ្ងៃអង្គារជាយប់ល្អសម្រាប់លោក ហើយក្រុមយុទ្ធនាការរបស់លោកហាក់កាន់តែទទួលបានជ័យជម្នះឡើង។
ការបោះឆ្នោតកាលពីថ្ងៃអង្គារមានចំនួនប្រតិភូរហូតដល់ចំនួន ១.៣៥៧ ដែលបេក្ខជនអាចដណើ្តមយក។ បេក្ខជននិមួយៗត្រូវទទួលឲ្យបានប្រតិភូចំនួន១.៩៩១ ដើម្បីអាចទទួលបានការតែងតាំងជាបេក្ខភាពប្រធានាធិបតីពីគណបក្សប្រជាធិបតេយ្យ៕
