ភ្ជាប់​ទៅ​គេហទំព័រ​ទាក់ទង

ឆ្នាំ​២០១៧ជា​ឆ្នាំ​ដែល​មាន​សុវត្ថិភាព​បំផុត​សម្រាប់​​ការធ្វើ​ដំណើរ​តាម​យន្តហោះ


អ្នក​ធ្វើ​ការ​លើ​យន្តហោះ​របស់​ក្រុមហ៊ុន Ryanair បង្ហាញ​ពី​នីតិវិធី​សុវត្ថិភាព​មុន​ពេល​យន្តហោះ​ចាកចេញ​ពី​ព្រលាន​យន្តហោះ Dublin ក្នុង​ក្រុង Dublin ប្រទេស​អៀវឡង់ កាលពី​ថ្ងៃទី២៧ ខែកញ្ញា ឆ្នាំ២០១៧។

របាយការណ៍​ថ្មី​ចំនួនពីរ​បាន​ផ្សព្វផ្សាយ​ថា​ ឆ្នាំ២០១៧គឺជាឆ្នាំដែលមាន​សុវត្ថិភាព​បំផុត​នៅ​ក្នុង​កំណត់ត្រា​របស់​ឧស្សាហកម្ម​អាកាស​ចរណ៍​ស៊ីវិល។

ទីប្រឹក្សា​អាកាសចរណ៍​ហូឡង់ To70 បាន​សរសេរ​នៅក្នុង​របាយការណ៍​ប្រចាំឆ្នាំ​របស់​ខ្លួន​ថា​ គ្មាន​ករណី​ផ្ទុះ​យន្តហោះ​ធ្ងន់ធ្ងរ​កើតឡើង​នៅក្នុង​ពិភពលោក​នោះ​ទេ។ លោក Adrian Young អ្នក​ស្រាវជ្រាវ​នៅ​ក្រុមហ៊ុន To70 បាន​និយាយ​ថា៖ «២០១៧ជា​ឆ្នាំ​ដែល​មាន​ភាពប្រសើរ​ច្រើន​ជាង​ការ​រំពឹង​ទុក​ និង​មាន​ភាពល្អ​គួរ​ឲ្យ​កត់សម្គាល់​ជាង​ឆ្នាំ​មុន»។ លោក Young ថ្លែង​បន្ត​ថា​ ការ​ធ្វើ​ដំណើរ​តាម​យន្តហោះ​គឺ​មាន​សុវត្ថិភាព​ជាង​គេ​បង្អស់ ដែល​ឥឡូវ​នេះ​ឱកាស​នៃ​ការ​ស្លាប់​ដោយ​ផ្ទុះ​យន្តហោះ​គឺ​មួយ​ក្នុង​ចំណោម​១៦លាន។ ដោយឡែក​ចរាចរណ៍​ផ្លូវអាកាស​ក្នុង​ពិភពលោក​ បាន​កើនឡើង​៣ភាគរយ​លើស​ពី​ឆ្នាំ​មុន។ ករណី​គ្រោះថ្នាក់​របស់​យន្តហោះ​យោធា​មិន​បាន​ដាក់បញ្ជូល​នៅក្នុង​ការ​សិក្សា​ស្រាវជ្រាវ​នេះ​ទេ។ ការសិក្សា​ស្រាវស្រាវ​លើក​ទី២​ ដែល​បាន​ចេញ​ផ្សាយ​កាល​ពី​ថ្ងៃ​ចន្ទ ដោយ​បណ្តាញ​សុវត្ថិភាព​អាកាសចរណ៍​ ហៅ​កាត់​ថា ASN បាន​ឲ្យ​ដឹង​ថា ករណី​ផ្ទុះ​យន្តហោះ​ដឹក​អ្នកដំណើរ​ និង​យន្តហោះ​ដឹក​ទំនិញ​ចំនួន១០ដង​ កាល​ពី​ឆ្នាំមុន ​បណ្តាល​ឲ្យ​បាត់បង់​ជីវិត​មនុស្ស​៤៤នាក់។ កាល​ពី​ឆ្នាំ​មុន ASN បាន​រាយការណ៍​ថា​ មាន​ករណី​ផ្ទុះ​យន្តហោះ​ចំនួន១៦ដង​ និង​បាន​សម្លាប់​មនុស្ស​ចំនួន​៣៣០នាក់។

លោក Harro Ranter ប្រធាន ASN បាន​និយាយ​ថា​ យោង​តាម​ការ​ដកស្រង់​ពី​ការ​ធ្លាក់​ចុះ​នៃ​ចំនួន​មនុស្ស​ស្លាប់​ដោយសារ​ការធ្វើ​ដំណើរ​តាម​យន្តហោះ​នៅ​ជុំវិញ​ពិភពលោក​ជាងមួយ​ទសវត្សរ៍​មក​នេះ​ ការ​ធ្លាក់ចុះ​នៃ​ករណី​ផ្ទុះ​យន្ត​ហោះ​នេះ «គ្មាន​អ្វី​គួរ​ឲ្យ​ភ្ញាក់​ផ្អើល​នោះ​ទេ» ។ ប្រធានាធិបតី​សហរដ្ឋអាមេរិក​ លោក Donald Trump ហាក់​ដូចជា​ចង់​និយាយ​ថា កាល​ដែល​គ្មាន​ករណី​ធ្ងន់ធ្ងរ​កើតឡើង​ចំពោះ​យន្តហោះ​ដឹក​អ្នក​ដំណើរ​នេះ​ គឺ​ដោយសារ​តែ​គោលនយោបាយ​របស់​លោក។ លោក​បាន​សរសេរនៅ​លើ​ Twitter របស់​លោក​កាល​ពី​ថ្ងៃអង្គារ​ម្សិលមិញ​ថា​ ចាប់តាំង​ពី​ឡើង​កាន់​តំណែង​ជា​ប្រធានាធិបតី​មក «ខ្ញុំ​បាន​រឹតបន្តឹង​ផ្នែក​ពាណិជ្ជកម្ម​អាកាសចរណ៍​នេះ​យ៉ាងខ្លាំង។ នេះ​ជា​ដំណឹង​ល្អ។ គេ​ទើប​តែ​រាយការណ៍​ថា​ គ្មាន​មនុស្ស​ស្លាប់​ទេ​កាល​ពី​ឆ្នាំ២០១៧។ វា​គឺ​ជា​ឆ្នាំ​ដែល​ល្អ​បំផុត​ និង​មាន​សុវត្ថិភាព​បំផុត​នៅក្នុង​កំណត់ត្រា»៕

XS
SM
MD
LG