ចំនួនអ្នកឆ្លងវីរុសកូរ៉ូណាដែលបង្កជំងឺកូវីដ១៩នៅក្នុងប្រទេសឥណ្ឌាកាលពីថ្ងៃសុក្របានកើនឡើងដល់ជាង១លាននាក់ ដែលធ្វើឲ្យឥណ្ឌាក្លាយជាប្រទេសទី៣ក្នុងពិភពលោកដែលមានអ្នកឆ្លងជាង១លាននាក់ បន្ទាប់ពីសហរដ្ឋអាមេរិកនិងប្រេស៊ីល។
ក្រុមមន្ត្រីបារម្ភអំពីថា ឥណ្ឌាមិនបានត្រៀមលក្ខណៈគ្រប់គ្រាន់ដើម្បីប្រឈមនឹងកំណើនការឆ្លងដ៏គំហុកដែលទំនងនឹងកើតឡើង ហើយដែលអាចធ្វើឲ្យមន្ទីរពេទ្យនិងប្រព័ន្ធសុខាភិបាលរបស់ឥណ្ឌាហួសសមត្ថភាពទទួលអ្នកជំងឺបាន។
ការឆ្លងថ្មីចំនួនជិត៣៥.០០០ករណីក្នុងរយៈពេល២៤ម៉ោងបានធ្វើឲ្យចំនួនអ្នកឆ្លងសរុបនៅឥណ្ឌាកាលពីថ្ងៃសុក្រកើនដល់១.០០៣.៨៣២នាក់។
ក្រសួងសុខាភិបាលឥណ្ឌាកាលពីថ្ងៃសុក្រក៏បានរាយការណ៍អំពីចំនួនអ្នកស្លាប់ច្រើនបំផុតក្នុងមួយថ្ងៃរហូតដល់៦៨៧នាក់ ដែលធ្វើឲ្យចំនួនអ្នកស្លាប់សរុបជាង២៥.០០០នាក់។
ប៉ុន្តែមន្ត្រីសុខភិបាលឥណ្ឌាក៏រាយការណ៍ថា អ្នកជំងឺកូវីដ១៩ ជាង៦៣៥.០០០នាក់ បានជាសះស្បើយ ចំនួនគឺស្មើនឹង៦៣%នៃអ្នកជំងឺហើយចំនួននេះកាន់តែកើនឡើង។
ការកើនចំនួនអ្នកឆ្លងដល់ជាង១លាននាក់នេះ កើតមានឡើងខណៈដែលរដ្ឋជាច្រើនរបស់ឥណ្ឌាបានចេញវិធានការបិទសកម្មភាពនៅតាមមូលដ្ឋានមួយចំនួន ដោយអាជ្ញាធរនៅទីនោះក៏ព្យាយាមបើកសកម្មភាពសេដ្ឋកិច្ចខ្លះវិញដែរ។
រដ្ឋបីដែលមានទីក្រុងធំៗគឺ រដ្ឋ Maharashtra, Delhi និង Tamil Nadu មានអ្នកឆ្លងសរុបជាងពាក់កណ្តាលរបស់ឥណ្ឌា ប៉ុន្តែនៅពេលនេះកំណើនការឆ្លងថ្មីទំនងនឹងកើនឡើងនៅតំបន់ជនបទដ៏ធំធេងរបស់ឥណ្ឌាដែលមានប្រព័ន្ធសុខាភិបាលទន់ខ្សោយជាងតំបន់ទីក្រុង៕
