ដោយសារតែដំណោះស្រាយសម្រាប់ជម្លោះសមុទ្រចិនខាងត្បូងមិនទំនងនឹងកើតមានក្នុងពេលឆាប់ៗនេះទេ ការធ្វើឲ្យប្រសើរឡើងនូវចំណងទាក់ទងរវាងរដ្ឋាភិបាលក្រុងប៉េកាំងនិងរដ្ឋាភិបាលក្រុងម៉ានីល អាចជាសញ្ញាល្អសម្រាប់សន្តិភាពផ្លូវនាវាចរណ៍នៅក្នុងតំបន់។
នៅពេលដែលលោក Rodrigo Duterteប្រធានាធិបតីនៃប្រទេសហ្វីលីពីនទៅបំពេញទស្សនកិច្ចនៅប្រទេសចិនក្នុងខែតុលា អ្នកវិភាគខ្លះព្រួយបារម្ភថា លោក កំពុងចាកចេញពីសហរដ្ឋអាមេរិក។ ក៏ប៉ុន្តែ លោក Tran Truong Thuy នាយកប្រតិបត្តិនៃមូលនិធិសម្រាប់ការសិក្សាសមុទ្រខាងកើតនៅក្នុងទីក្រុងហាណូយគិតថា ការណ៍នេះជាព័ត៌មានល្អសម្រាប់សមុទ្រចិនខាងត្បូង។
នៅឯសន្និសិទកំពូលក្នុងទីក្រុងហូជីមិញកាលពីពេលថ្មីៗនេះរបស់ទស្សនាវដ្តី Economist លោកបាននិយាយថា ប្រសិនបើចិនមានភាពជិតស្និទ្ធកាន់តែខ្លាំងឡើងជាមួយហ្វីលីពីន ដូច្នេះវាហាក់ដូចជាមិនគម្រាមកំហែងដំណើរការនៃការទាមទារប្រជុំកោះនៅជិតហ្វីលីពីនទេ។
លោក Thuy និយាយបន្តទៀតថា «សម្រាប់ចិននៅពេលឥឡូវនេះដែលធ្វើការទាមទារទឹកដីក្នុងសមុទ្រចិនខាងត្បូង នឹងវិលត្រឡប់ទៅកាន់ការធ្វើឲ្យមានទំនាក់ទំនងជាប្រក្រតីភាពឡើងវិញរវាងចិននិងហ្វីលីពីន។ ហើយខ្ញុំគិតថា នៅក្នុងរយៈពេលដ៏ខ្លី ខ្ញុំគិតថា ចិននឹងមិនធ្វើសកម្មភាពបែបនេះទៀតទេ»។
ការមានទំនាក់ទំនងល្អជាថ្មីឡើងវិញរវាងរដ្ឋាភិបាលក្រុងម៉ានីលនិងរដ្ឋាភិបាលក្រុងប៉េកាំង មានច្រើនជាងការរំពឹងទុកពីព្រោះតែតុលាការសម្របសម្រួលអន្តរជាតិដែលមានទីតាំងនៅក្នុងទីក្រុងឡាអេ បានសម្រេចកាលពីខែកក្កដាថា ការស្ថាបនាកោះរបស់ចិនបានទន្ទ្រានយកផ្ទៃទឹកហ្វីលីពីន។ រដ្ឋាភិបាលក្រុងម៉ានីល បានជំទាស់ប្រឆាំងយ៉ាងខ្លាំងការទាមទារយកទឹកដីរបស់ចិននៅក្នុងតំបន់ ក៏ប៉ុន្តែ ការណ៍នេះ បានផ្លាស់ប្តូរទាំងអស់នៅពេលដែលប្រធានាធិបតីហ្វីលីពីនថ្មី បានកាន់អំណាចនៅរដូវក្តៅនេះ៕
