ភ្ជាប់​ទៅ​គេហទំព័រ​ទាក់ទង

ស្ថានភាព​របស់​មេខ្លោង​នៃ​ការ​វាយ​ប្រហារ​នៅ​ប៉ារីស​ក្រោយ​ពី​ការ​វាយ​ឆ្មក់​របស់​ប៉ូលីស​នៅ​តែ​មិន​ច្បាស់


ប៉ូលិស​បែលហ្ស៊ិក​ធ្វើ​ការ​វាយ​ឆ្មក់​ ដើម្បី​ស្វែងរក​ជន​សង្ស័យ​ម៉ូស្លីម​ដែល​មាន​ជាប់​ពាក់ព័ន្ធ​ទៅ​នឹង​ការ​វាយប្រហារ​នៅ​ក្នុង​ក្រុង​ប៉ារីស នៅ​ក្នុង​ជាយ​ក្រុង​ព្រុចសែល កាលពី​ថ្ងៃទី១៧ ខែវិច្ឆិកា ឆ្នាំ២០១៥។

គេ​នៅ​មិន​ទាន់​ដឹង​ឲ្យ​ប្រាកដ​នៅ​ឡើយទេ ថា​តើ​មេខ្លោង​នៃ​ការ​វាយ​ប្រហារ​ក្នុង​ទីក្រុង​ប៉ារីស​កាល​ពី​សប្តាហ៍​មុន​នោះ គឺ​ជា​មនុស្ស​ម្នាក់​ក្នុង​ចំណោម​មនុស្ស​ជាច្រើន​នាក់​នៅ​ខាង​ក្នុង​អាគារ​មួយ​ ដែល​ត្រូវ​បាន​ប៉ូលិស​បារាំង​វាយ​ឆ្មក់​ចូលកាល​ពី​ថ្ងៃ​ពុធ។ ការ​វាយ​ឆ្មក់​នោះ​ចំណាយ​ពេល​អស់​៧ម៉ោង។ រដ្ឋ​អាជ្ញា​ប្រចាំ​ទីក្រុង​ប៉ារីស លោក Francois Molins បាន​និយាយ​ត្រឹម​ថា ជន​ឈ្មោះ Abdelhamid Abaaoud ដែល​ជា​ជនជាតិ​បែលហ្ស៊ិក (Belgium) មាន​ដើម​កំណើត​ម៉ូរ៉ូកូ (Morocco) ​មិន​ស្ថិត​នៅ​ក្នុង​ចំណោម​ជន​ទាំង​៨នាក់​ ដែល​ត្រូវ​បាន​ចាប់​ខ្លួន​នៅ​ក្នុង​ការ​វាយ​ឆ្មក់​របស់​ប៉ូលិស នៅក្នុង​សង្កាត់​ Saint-Denis​ នោះ​ទេ។

លោក​រដ្ឋ​អាជ្ញា​បាន​និយាយកាល​ពី​ថ្ងៃ​ពុធ​ថា រហូត​មក​ទល់​នឹង​ពេល​នេះ គេ​នៅ​មិន​ទាន់​ដឹង​ជា​ផ្លូវការ​នៅ​ឡើយ​ ពី​អត្តសញ្ញាណ​របស់​ជន​ទាំងអស់​ដែល​ត្រូវ​បាន​ចាប់​ខ្លួន​នៅ​ក្នុង​អាគារ​នោះ​ទេ ប៉ុន្តែ​លោក​បញ្ជាក់​ថា ជន​ឈ្មោះ Abdelhamid Abaaoud និង​ជនម្នាក់​ទៀត​ឈ្មោះ Salah Abedestam មិន​ស្ថិត​នៅ​ក្នុង​ចំណោម​ជន​ដែល​ត្រូ​វបាន​ឃុំ​ខ្លួន​នោះ​ទេ។

លោក​រដ្ឋ​អាជ្ញា Molins បាន​និយាយ​ថា ​មនុស្ស​យ៉ាង​ហោច​ណាស់​២នាក់​ ត្រូវ​បាន​សម្លាប់​នៅ​ក្នុង​ការ​វាយ​ឆ្មក់​របស់​ប៉ូលិស​នោះ ប៉ុន្តែ​លោក​មិន​បាន​ប្រាប់​ពី​ចំនួន​ជាក់​លាក់​នោះ​ទេ។

របាយការណ៍​បឋមៗ​បង្ហាញ​ថា ស្រ្តី​ម្នាក់​ដែល​ចុច​បំផ្ទុះ​គ្រឿង​ផ្ទុះ​ដែល​ជាប់​នៅ​នឹង​អាវ​របស់​ខ្លួន​នោះ ត្រូវ​បាន​សម្លាប់ ហើយ​គេ​ប្រទះ​ឃើញ​សាកសព​មួយ​ទៀត​នៅក្នុង​គំនរ​បាក់បែក។ ​សាកសព​នោះ​ មាន​ស្នាម​គ្រាប់​កាំភ្លើង​ធ្លុះ​ពេញ​ខ្លួន ដែល​ធ្វើ​ឲ្យ​គេ​ពិបាក​ស្គាល់​អត្តសញ្ញាណ​បាន​ភ្លាមៗ។ ប៉ូលិស​បី​នាក់​បាន​រងរបួស ហើយ​ឆ្កែ​របស់​ប៉ូលិស​មួយ​ក្បាល​ត្រូវ​បាន​សម្លាប់​នៅ​ក្នុង​ការ​វាយឆ្មក់​នោះ៕

XS
SM
MD
LG