ក្រសួងការបរទេសបានបញ្ជាក់ពីភាពពិតប្រាកដនៃសារទំនាក់ទំនងការទូតផ្ទៃក្នុងមួយដែលបានចុះ ហត្ថលេខាដោយមន្ត្រីប្រហែល៥០ដែលបានរិះគន់រដ្ឋបាលលោកប្រធានាធិបតីអូបាម៉ាក្នុងការដោះស្រាយសង្គ្រាមស៊ីវិលនៅស៊ីរី ហើយបានអំពាវនាវឱ្យប្រើប្រាស់ការវាយប្រហារដោយមានគោលដៅកំណត់មួយចំនួនប្រឆាំងនឹងរដ្ឋាភិបាលស៊ីរី។
ឯកសារនោះបានបែកធ្លាយចេញពី «បណ្តាញជំទាស់» នៅផ្ទៃក្នុងក្រសួងការបរទេសដែលអនុញ្ញាតឱ្យបុគ្គលិក និងអ្នកការទូតណាដែលមិនយល់ស្របនឹងគោលនយោបាយរបស់រដ្ឋាភិបាលសម្តែងការព្រួយបារម្ភរបស់ពួកគេជាមួយនឹងថ្នាក់ដឹកនាំដោយមិនភ័យខ្លាចការសងសឹកអ្វីឡើយ។
លោក John Kirby អ្នកនាំពាក្យក្រសួងការបរទេសបានបញ្ជាក់ថាពិតជាមានឯកសារនោះមែនប៉ុន្តែលោកមិននិយាយលម្អិតដល់ខ្លឹមសារនៅក្នុងនោះទេ។
ឯកសារផ្ទៃក្នុងដែលកាសែត New York Times ទទួលបាន បានស្នើសុំដល់រដ្ឋបាលលោកអូបាម៉ាឱ្យប្រើប្រាស់ «ការប្រឈមមុខនិងការប្រើប្រាស់អាវុធតាមអាកាសប្រកបការគិតគូត្រឹមត្រូវ» ដើម្បីតតាំងជាមួយនឹងកងទ័ពស៊ីរី និងបញ្ចប់សង្គ្រាមស៊ីវិលឱ្យបានឆាប់ដោយសារវាបានឆក់យកជីវិតមនុស្សជិត៥០០.០០០នាក់។
ឯកសារនោះបន្តថា «ហេតុផលសីលធម៌ក្នុងការអនុវត្តតាមដំណាក់ៗដើម្បីបញ្ចប់ការស្លាប់និងការឈឺចាប់ក្នុងប្រទេសស៊ីរីក្រោយពីសង្គ្រាមដ៏ឃោរឃៅអស់រយៈពេល៥ឆ្នាំគឺមានជាភស្តុតាងស្រាប់ហើយមិនមានអ្វីត្រូវចោទសួរទេ។ ស្ថានភាពនៅរឹងមួយកន្លែងក្នុងប្រទេសស៊ីរីនឹងនៅតែបង្ហាញពីបញ្ហាប្រឈមដ៏អាក្រក់ខាងផ្នែកមនុស្សធម៌ ការទូត និងសកម្មភាពពាក់ព័ន្ធនឹងភេរវកម្ម បើទោះបីជាវាមិនទាន់ដល់ដំណាក់កាលមហន្តរាយក៏ដោយ»។
រហូតមកដល់ពេលនេះ គោលនយោបាយរបស់រដ្ឋបាលលោកអូបាម៉ានៅក្នុងប្រទេសស៊ីរីគឺកំហិតត្រឹមតែជួយដល់ទាហានក្រុមបះបោរប្រយុទ្ធនឹងលោកប្រធានាធិបតី Bashar al-Assad និងក្រុម ISIS។ សហរដ្ឋអាមេរិកនៅមិនទាន់ប្រឈមមុខនឹងលោក Assad និងកងកម្លាំងដែលគាំទ្រដោយរុស្ស៊ី ផ្ទាល់និងជាចំហរទេ៕
