ប្រធានាធិបតីនៃប្រទេសស្រីលង្កា សុខចិត្តចែករំលែកអំណាចជាមួយនិងបក្សប្រឆាំងនៅថ្ងៃចន្ទនេះ ខណៈមានការកើនឡើងនូវបាតុកម្មតវ៉ានៅជុំវិញប្រទេស ដើម្បីទាមទារឲ្យលោកចុះចេញពីតំណែង ដោយសារតែបញ្ហានៃការខ្វះខាតស្បៀងអាហារ ប្រេងសាំង និងថ្នាំពេទ្យ កាន់តែមានសភាពធ្ងន់ធ្ងរឡើងនៅក្នុងប្រទេសនេះ។ នេះបើតាមការចេញផ្សាយរបស់ទីភ្នាក់ងារព័ត៌មាន AFP។
ការអំពាវនាវរបស់លោកប្រធានាធិបតី Gotabaya Rajapaksa ទៅកាន់សមាជិកសភា បានធ្វើឡើងខណៈដែលកងកម្លាំងសន្តិសុខ បានព្យាយាមបង្ក្រាបបាតុកម្មចំពោះអ្វីដែលរដ្ឋាភិបាលទទួលស្គាល់ថាជាកង្វះនូវសេចក្តីត្រូវការទំនិញចាំបាច់ផ្សេងៗ យ៉ាងធ្ងន់ធ្ងរបំផុតចាប់តាំងពីប្រទេសនេះបានទទួលឯករាជ្យពីចក្រភពអង់គ្លេសកាលពីឆ្នាំ ១៩៤៨ មក។
សេចក្តីថ្លែងការណ៍មួយចេញពីការិយាល័យប្រធានាធិបតីបញ្ញាក់ថា៖ «លោកប្រធានាធិបតីអញ្ជើញគណបក្សនយោបាយទាំងអស់ក្នុងរដ្ឋសភាឲ្យទទួលតំណែងក្នុងគណៈរដ្ឋមន្ត្រី ហើយចូលរួមក្នុងកិច្ចប្រឹងប្រែងដើម្បីស្វែងរកដំណោះស្រាយដើម្បីបញ្ចប់វិបត្តិរបស់ប្រទេសជាតិ។»
សេចក្តីថ្លែងការណ៍នេះសង្កត់ថា ដំណោះស្រាយចំពោះវិបត្តិដែលកាន់តែធ្ងន់ធ្ងរនេះ គួរតែត្រូវស្វែងរក «ក្នុងក្របខ័ណ្ឌប្រជាធិបតេយ្យ» ខណៈដែលមនុស្សរាប់ពាន់នាក់នាំគ្នាចូលរួមក្នុងការធ្វើបាតុកម្មនៅតាមបណ្តាទីក្រុងនិងភូមិស្រុកនានា។
ការអញ្ជើញនេះបានធ្វើឡើងបន្ទាប់ពីសមាជិកគណៈរដ្ឋមន្ត្រី២៦នាក់ លើកលែង តែលោកប្រធានាធិបតី Rajapaksa និងបងប្រុសរបស់លោកគឺនាយករដ្ឋមន្ត្រី Mahinda Rajapaksa បានដាក់ពាក្យលាលែងពីតំណែង នៅក្នុងកិច្ចប្រជុំមួយកាលពីយប់ថ្ងៃអាទិត្យ។ នាយកធនាគារកណ្តាលរបស់ប្រទេសស្រីលង្កាលោក Ajith Cabraal ក៏បានដាក់ពាក្យលាឈប់ពីតំណែងដែរនៅថ្ងៃចន្ទនេះ។
កាលពីយប់ថ្ងៃអាទិត្យ មនុស្សរាប់ពាន់នាក់បានធ្វើបាតុកម្មដែលមានសំឡេងលាន់រំពងតែដោយសន្តិវិធី នៅទូទាំងប្រទេសកោះដែលមានពលរដ្ឋ២២លាននាក់ ដើម្បីស្តីបន្ទោសលើវិធីដោះស្រាយវិបត្តិរបស់លោក Rajapaksa។
ពួកសកម្មជនបាននិយាយថាពួកគេនឹងធ្វើបាតុកម្មធំជាងនេះ នៅតាមទីក្រុងសំខាន់ៗមួយចំនួននៅថ្ងៃចន្ទ ដើម្បីបង្ខំឲ្យលោក Rajapaksa និងក្រុមគ្រួសារលោក ដែលពីមុនមានប្រជាប្រិយភាពយ៉ាងខ្លាំងនេះ ឲ្យចុះចេញពីតំណែង៕
កូឡុំបូ —
