ភ្ជាប់​ទៅ​គេហទំព័រ​ទាក់ទង

លោក Spicer លាលែង​ពី​តំណែង ពេល​លោក Trump តែងតាំង​ប្រធាន​ផ្នែក​ទំនាក់ទំនង​ថ្មី

  • Steve Herman

ប្រធាន​ផ្នែក​ព័ត៌មាន​របស់​សេតវិមាន Sarah Huckabee Sanders ថ្លែង​ទៅ​កាន់​សារព័ត៌មាន​នៅ​ក្នុង​បន្ទប់ Brady Press Briefing ក្នុង​សេតវិមាន រដ្ឋធានី​វ៉ាស៊ីនតោន កាលពី​ថ្ងៃទី២១ ខែកក្កដា ឆ្នាំ២០១៧។

ការ​តែងតាំង​ប្រធាន​ផ្នែក​ទំនាក់ទំនង​ថ្មី​នៅ​សេតវិមាន​ប្រធានាធិបតី​សហរដ្ឋ​អាមេរិក​កាល​ពី​ថ្ងៃ​សុក្រ​សប្ដាហ៍​មុន បាន​ធ្វើ​ឲ្យ​លោក Sean Spicer ប្រធាន​ផ្នែក​ព័ត៌មាន​ប្រចាំ​សេតវិមាន​ដែល​មាន​ការ​ចាប់​អារម្មណ៍​ខ្លាំង​ពី​សាធារណជន លាលែង​ចេញ​ពី​តំណែង​ភ្លាមៗ។

កាល​ពី​ថ្ងៃ​ទី ២០ ខែ​មិថុនា កន្លង​ទៅ​នេះ អ្នក​យក​ព័ត៌មាន​នានា​ប្រចាំ​សេតវិមាន​ប្រធានាធិបតី​សហរដ្ឋ​អាមេរិក មិន​បាន​ដឹង​ថា ពេល​នោះ​ជា​ពេល​វេលា​ចុង​ក្រោយ​ដែល​ពួកគេ​ឃើញ​លោក Sean Spicer ធ្វើ​សន្និសីទ​ព័ត៌មាន​ប្រចាំ​ថ្ងៃ​ដោយ​មាន​ការ​ថត​ជា​វីដេអូ​នោះ​ទេ។

លោក Spicer តំណាង​ឲ្យ​រដ្ឋបាល​របស់​លោក​ប្រធានាធិបតី Donald Trump ដែល​មាន​តួនាទី​សំខាន់​ទី​ពីរ​បន្ទាប់​ពី​ប្រធាន​របស់​លោក។

ទោះជា​យ៉ាង​ណា​ក៏​ដោយ ចាប់​តាំង​ពី​ដំបូង​មក លោក Spicer បាន​កាន់​តំណែង​ដ៏​លំបាក​មួយ​ក្នុង​នាម​ជា​អ្នក​នាំ​ពាក្យ​របស់​លោក​ប្រធានាធិបតី Donald Trump។

លោក Sean Spicer អតីត​ប្រធាន​ផ្នែក​ព័ត៌មាន​ប្រចាំ​សេតវិមាន កាល​ពី​ធ្វើ​សន្និសីទ​ព័ត៌មាន​ដំបូង​បំផុត​នៅ​ថ្ងៃ​ទី ២១ ខែ​មករា កន្លង​ទៅ​នេះ បាន​និយាយ​ថា៖ «នេះ​ជា​ចំនួន​ទស្សនិកជន​ដ៏​ច្រើន​បំផុត​មិន​ដែល​មាន​ពី​មុន​មក ដែល​ចូលរួម​មើល​ការ​ស្បថ​ឡើង​កាន់​តំណែង​របស់​ប្រធានាធិបតី​សហរដ្ឋ​អាមេរិក ទាំង​អ្នក​ដែល​មក​ចូលរួម​ផ្ទាល់ និង​អ្នក​ដែល​ចូលរួម​មិន​ផ្ទាល់​នៅ​ទូទាំង​ពិភពលោក»។

លោក Spicer បាន​ចាក​ចេញ​ទៅ​ដោយ​មិន​រង់ចាំ​ឆ្លើយ​សំណួរ​ណា​មួយ​របស់​អ្នក​សារព័ត៌មាន​នោះ​ទេ ហើយ​ឥរិយាបថ​បែប​ចូល​ចិត្ត​ការ​ប្រកែក​តវ៉ា​របស់​លោក​ជាមួយ​នឹង​អ្នក​សារព័ត៌មាន​ដែល​គេ​ឃើញ​តាម​កញ្ចក់​ទូរទស្សន៍​នេះ ត្រូវ​បាន​គេ​ធ្វើ​ត្រាប់​តាម​បែប​កំប្លែង​លេង​សើច​ក្នុង​ន័យ​រិះគន់​នៅ​តាម​កម្មវិធី​ទូរទស្សន៍​នានា។

លោក Spicer ត្រូវ​បាន​គេ​គិត​ថា​ស្ថិត​ក្នុង​ស្ថានភាព​ស្រពិចស្រពិល បន្ទាប់ពី​លោក​បាន​ធ្វើ​កំហុស​ខុស​ឆ្គង​ជា​ច្រើន​ដូចជា​កំហុស​ដែល​លោក​បាន​និយាយ​ដូច​ខាង​ក្រោម​ជា​ដើម។

«យើង​មិន​បាន​ប្រើ​អាវុធ​គីមី​នៅ​ក្នុង​សង្គ្រាម​លោក​លើក​ទី​ពីរ​នោះ​ទេ។ មាន​មនុស្ស​ដែល​គួរ​ឲ្យ​ស្អប់​ដូចជា​លោក Hitler ជា​ដើម ដែល​លោក​ក៏​នៅតែ​មិន​ប្រើ​អាវុធ​គីមី​ដែរ»។

អ្នក​ដែល​ត្រូវ​បាន​តែងតាំង​ជំនួស​តំណែង​លោក Sean Spicer ជា​ប្រធាន​ផ្នែក​ព័ត៌មាន​របស់​សេតវិមាន គឺ​អនុ​ប្រធាន​ផ្នែក​ព័ត៌មាន​អ្នកស្រី Sarah Huckabee Sanders។ ប្រធាន​ថ្មី​របស់​អ្នកស្រី គឺ​ហិរញ្ញធិការី​លោក Anthony Scaramucci ដែល​ជា​អ្នក​មិន​ដែល​មាន​បទ​ពិសោធន៍​ផ្នែក​ទំនាក់ទំនង ឬ​ក៏​ផ្នែក​រដ្ឋាភិបាល​ពី​មុន​មក​ទេ។ លោក Spicer ត្រូវ​បាន​គេ​រាយការណ៍​ថា បាន​ជំទាស់​ចំពោះ​ការ​តែងតាំង​លោក Anthony Scaramucci នេះ។

លោក Trump ចង់​តែងតាំង​អ្នក​ណា​ដែល​ជា​អ្នក​គាំទ្រ​ដំបូងៗ​នៃ​យុទ្ធនាការ​ឃោសនា​បោះ​ឆ្នោត​របស់​លោក។ លោក Anthony Scaramucci ដែល​ជា​ប្រធាន​ថ្មី​ផ្នែក​ទំនាក់ទំនង​រូប​នេះ ពី​មុន​ធ្លាប់​បាន​គាំទ្រ​សមាជិក​គណបក្ស​សាធារណរដ្ឋ​ដទៃ​ទៀត និង​ធ្លាប់​បាន​ហៅ​លោក Trump ថា​ជា​អ្នក «ប្រឆាំង​នឹង​អាមេរិក» និង​ជា «អ្នក​នយោបាយ​ដើម្បី​តែ​ប្រយោជន៍​ផ្ទាល់​ខ្លួន»។

លោក Anthony Scaramucci បាន​និយាយ​យ៉ាង​ដូច្នេះ​ថា៖ «ខ្ញុំ​មិន​គួរ​និយាយ​ដូច្នោះ​អំពី​លោក Trump នោះ​ទេ។ លោក​ប្រធានាធិបតី Trump! ប្រសិន​បើ​អ្នក​កំពុង​តែ​ស្ដាប់ ខ្ញុំ​សូម​អភ័យទោស​លើក​ទី ៥០ ចំពោះ​ការណ៍​ដែល​ខ្ញុំ​បាន​និយាយ​ដូច្នោះ»។

ការ​ផ្លាស់ប្ដូរ​បុគ្គលិក​នេះ​បាន​ធ្វើ​ឡើង ពេល​ដែល​សេតវិមាន​ប្រឹងប្រែង​បង្កើន​អាទិភាព​គោល​នយោបាយ​របស់​ខ្លួន ស្រប​ពេល​ដែល​មាន​ការ​លេច​ឡើង​ជា​បន្ត​បន្ទាប់​នូវ​ទំនាក់ទំនង​រវាង​យុទ្ធនាការ​ឃោសនា​បោះ​ឆ្នោត​របស់​លោក Trump ជាមួយ​នឹង​រដ្ឋាភិបាល​រុស្ស៊ី៕

ប្រែ​សម្រួល​ដោយ ភី សុភាដា

XS
SM
MD
LG