ស.រ.អា.និយាយថា ខ្លួនបានដឹងអំពី «ការប្រុងប្រៀប» សម្រាប់ធ្វើការវាយប្រហារមួយដោយអាវុធគីមីដោយកងកម្លាំងរដ្ឋាភិបាលស៊ីរីស្រដៀងគ្នានឹងការវាយប្រហារមួយកាលពីខែមេសានៅក្នុងផ្នែកខាងជើងនៃប្រទេសស៊ីរីដែលបានបណ្តាលឱ្យស.រ.អា.ធ្វើការវាយប្រហារតាមអាកាសជាការតបតវិញ។
សេចក្តីថ្លែងការណ៍មួយកាលពីយប់ថ្ងៃច័ន្ទពីលោក Sean Spicer អ្នកនាំពាក្យសេតវិមានបានព្រមានប្រធានាធិបតីស៊ីរី Bashar al-Assad ថាប្រសិនបើកងកម្លាំងរដ្ឋាភិបាលស៊ីរីធ្វើការវាយប្រហារដោយអាវុធគីមីមួយលើកទៀត នោះ «លោក និងកងយោធាលោកនឹងបង់ខាតច្រើន»។
គ្មានព័ត៌មាន ឬភស្តុតាងចំៗអំពីការប្រុងប្រៀបធ្វើការវាយប្រហារដោយអាវុធគីមីនេះទេ។
លោកស្រី Nikki Haley ឯកអគ្គរដ្ឋទូតស.រ.អា.ប្រចាំអ.ស.ប.បានសរសេរតាម Twitter ថា ការវាយប្រហារថែមទៀតប្រឆាំងនឹងពួកជនស៊ីវិលស៊ីរី «នឹងត្រូវបន្ទោសលើរដ្ឋាភិបាល Assad ក៏ប៉ុន្តែក៏ត្រូវបន្ទោសដែរលើប្រទេសរុស្ស៊ី និងប្រទេសអ៊ីរ៉ង់ដែលគាំទ្រគាត់ក្នុងការសម្លាប់ប្រជារាស្ត្រខ្លូនឯង»។
ប្រទេសរុស្ស៊ី និងប្រទេសអ៊ីរ៉ង់ជាអ្នកគាំទ្រសំខាន់ៗដល់រដ្ឋាភិបាល Assad ហើយបានផ្តល់ការគាំទ្រខាងយោធានៅក្នុងការប្រយុទ្ធដ៏សាំញ៉ាំប្រឆាំងនឹងពួកឧទ្ទាម និងពួកជនសកម្មប្រយុទ្ធរដ្ឋឥស្លាម។
គ្មានប្រតិកម្មជាបន្ទាន់ពីប្រទេសស៊ីរី រុស្ស៊ី ឬប្រទេសអ៊ីរ៉ង់អំពីសេចក្តីថ្លែងការណ៍នេះរបស់សេតវិមាននៅឡើយទេ។
ការវាយប្រហារកាលពីថ្ងៃទី៤ខែមេសាលើក្រុង Khan Sheikhoun បានបណ្តាលឱ្យមនុស្សជាង៨០នាក់ស្លាប់។ ការធ្វើវិភាគដោយរដ្ឋាភិបាលបារាំងបានរកឃើញថាឧស្ម័ន Sarin បានត្រូវប្រើប្រាស់រួមគ្នាជាមួយ Hexamine ហើយថាការផលិតសារធាតុគីមីស្រដៀងគ្នានេះបានត្រូវប្រើប្រាស់នៅក្នុងការវាយប្រហារដោយអាវុធគីមីកាលពីឆ្នាំ២០១៣ដោយរដ្ឋាភិបាលស៊ីរីដែរ។
លោក Assad បានច្រានចោលថាកងកម្លាំងគាត់មិនមែនជាអ្នកទទួលខុសត្រូវដល់អ្វីដែលបានកើតមានឡើងនៅ Khan Sheikhoun ទេ ដោយនិយាយថាឧប្បត្តិហេតុនេះជា «ការប្រឌិត» ដោយស.រ.អា.ដើម្បីធ្វើឱ្យការវាយប្រហារយោធារបស់ខ្លួនលើកងកម្លាំងរដ្ឋាភិបាលស៊ីរីជាការត្រឹមត្រូវ។ការវាយប្រហារដោយស.រ.អា.បានត្រូវចំមូលដ្ឋានកងទ័ពអាកាសមួយរបស់រដ្ឋាភិបាលស៊ីរីដែលគេមានជំនឿថាជាប្រភពនៃអាវុធគីមីនោះ៕
