ប៉ូលិសនៅប្រទេសអេស្ប៉ាញបានបញ្ជាក់ថា បុរសម្នាក់ដែលពួកគេបានបាញ់សម្លាប់នៅភាគខាងលិចទីក្រុង Barcelona កាលពីថ្ងៃចន្ទជាជនដៃដល់នៃការវាយប្រហារដ៏ប្រល័យដោយប្រើរថយន្តវ៉ែន កាលពីថ្ងៃព្រហស្បតិ៍សប្តាហ៍មុន។
ប៉ូលិសបានផ្ញើរសារតាមប្រព័ន្ធ Twitter កាលពីថ្ងៃចន្ទម្សិលមិញ បន្ទាប់ពីរបាយ ការណ៍កាលពីដំបូងថា បុរសនោះបានស្ថិតនៅក្រុង Subirats ដោយបានពាក់អ្វីទំនងជាខ្សែក្រវ៉ាត់ដាក់គ្រាប់អត្តឃាត។ ប៉ូលិសនិយាយថា៖ «យើងបញ្ជាក់ថា បុរសម្នាក់ដែលត្រូវបានបាញ់សម្លាប់នៅក្នុងក្រុង Subirats គឺ Younes Abouyaaquob ជាមេគំនិតនៃការវាយប្រហារភេរវកម្មនៅក្នុងទីក្រុង Barcelona»។
លោក Joaquim Forn រដ្ឋមន្រ្តីមហាផ្ទៃរដ្ឋ Catalan បានប្រាប់វិទ្យុ Catalunya ថា «ភស្តុតាងបង្ហាញ»ថា Younes Abouyaaquob បានស្ថិតនៅពីខាងក្រោយនៃរថយន្តវ៉ែន ក្នុងអំឡុងនៃការវាយប្រហារទីក្រុង Barcelona ដែលបានសម្លាប់មនុស្ស១៥នាក់។
ពីដំបូង ពួកអាជ្ញាធរនិយាយថា ពួកគេកំពុងស្វែករក Abouyaaquob ជាសមាជិកម្នាក់ចុងក្រោយនៃក្រុមដែលមានគ្នា១២នាក់ដែលនៅគេចខ្លួននៅឡើយ។
ប៉ូលិសបានចាប់ខ្លួនជនសង្ស័យ៤នាក់ក្នុងក្រុមដែលមានសមាជិក១២នាក់ខណៈដែលជនដែលនៅសេសសល់ទៀតបានត្រូវប៉ូលិសម្លាប់ឬស្លាប់នៅក្នុងការផ្ទុះនៅឯផ្ទះមួយកន្លែងមួយថ្ងៃមុនការវាយប្រហារ។ ជនសង្ស័យជាច្រើនមានការទាក់ទងទៅនឹងក្រុង Ripoll ភាគឦសាន្ត ជាទីកន្លែងមួយដែលប៉ូលិសបានផ្តោតលើការស៊ើបអង្កេតរបស់ខ្លួន។
នៅក្នុងសន្និសីទកាលពីថ្ងៃអាទិត្យ ប៉ូលិសអេស្ប៉ាញបានរាយការណ៍ថា ពួកគេបានរកឃើញកំប៉ុងឧស្ម័នចំនួន១២០នៅក្នុងផ្ទះមួយកន្លែងនៅក្រុង Alcanar ដែលប៉ូលិសជឿជាក់ថា ជារោងចក្រធ្វើគ្រាប់បែករបស់ជនសង្ស័យនៅក្នុងការវាយប្រហារកាលពីថ្ងៃព្រហស្បតិ៍។ លោក Josep Lluis Trapero ប្រធានប៉ូលិសតំបន់បានប្រាប់ពួកអ្នកយកព័ត៌មានថា សំភារៈជាច្រើនបានត្រូវរកឃើញដើម្បីវាយប្រហារមួយឬច្រើននៅក្រុង Barcelona៕
