គោលនយោបាយជឿនលឿនរបស់ជំរំនេះអនុញ្ញាតឲ្យជនភៀសខ្លួនរស់នៅ ធ្វើកសិដ្ឋាននិងធ្វើការជាមួយគ្នា ខណៈពេលដែលពួកគេរង់ចាំត្រឡប់ទៅមាតុភូមិវិញ។ ប៉ុន្តែនៅពេលដែលស្ថានភាពក្នុងប្រទេសស៊ូដង់ខាងត្បូងមិនងាយធូរស្រាលនោះ ជនភៀសខ្លួនជាច្រើនកំពុងពិចារណាលើការរស់នៅទីនេះ។
ក្រុមស្ត្រីភៀសខ្លួនពីប្រទេសស៊ូដង់ខាងត្បូងមួយក្រុមបានជួបជាមួយនឹងសមាជិកព្រឹទ្ធសភាមកពីគណបក្សប្រជាធិបតេយ្យរបស់អាមេរិកគឺលោក Chris Coons និងលោក Chris Van Hollen។ កាលពីខែសីហាកន្លងទៅ សមាជិកព្រឹទ្ធសភាទាំងពីរបានធ្វើទស្សនកិច្ចទៅកាន់ជំរំជនភៀសខ្លួនមួយចំនួននៅទូទាំងប្រទេសអ៊ូហ្គាន់ដា រួមទាំងជំរំ Bidi Bidi ដែលជាជំរំមួយក្នុងចំណោមជំរំធំៗបំផុតនៅក្នុងពិភពលោក។
ដោយថ្លែងតាមទូរស័ព្ទ លោកសមាជិកព្រឹទ្ធសភា Van Hollen បានចាត់ទុកជំរំទាំងនេះថាជា «គំរូល្អ» ដែលប្រទេសផ្សេងទៀតគួរពិចារណា នៅពេលទទួលយកជនភៀសខ្លួន។
លោក Van Hollen បាននិយាយថា៖
«ច្បាស់ណាស់ កត្តាដ៏សំខាន់មួយដើម្បីទទួលបានជោគជ័យគឺការគាំទ្រយ៉ាងខ្លាំងពីសំណាក់អន្តរជាតិ»។
នៅពេលជំរំ Bidi Bidi ត្រូវបានគេបើកទទួលមនុស្សនៅក្នុងឆ្នាំ២០១៦ វាគ្រាន់តែជាដីដាច់ស្រយាលមួយកន្លែងនៅភាគខាងជើងក្នុងប្រទេសអ៊ូហ្គាន់ដា ដែលជនភៀសខ្លួនស៊ូដង់ខាងត្បូងភាគច្រើនជាស្ត្រីនិងកុមារ បានមកទីនេះដើម្បីភៀសខ្លួនពីអំពើហិង្សានៅក្នុងសង្គ្រាមស៊ីវិលក្នុងប្រទេសរបស់ពួកគេ។
ជាទូទៅ គេឃើញមានភាពតានតឹងរវាងជនភៀសខ្លួននិងពលរដ្ឋម្ចាស់ស្រុក ដែលមានអារម្មណ៍ថា ជនភៀសខ្លួនដណ្តើមធនធានរបស់ពួកគេ។
ប៉ុន្តែប្រទេសអ៊ូហ្គាន់ដាបានសម្រេចចិត្តធ្វើផ្សេងពីនេះ ដោយទុកភាគរយខ្លះនៃមូលនិធិអន្តរជាតិរបស់ប្រទេសដើម្បីបំពេញតម្រូវការក្នុងស្រុក។ ក្រុមគ្រួសារជនភៀសខ្លួនទទួលបានដីដើម្បីសង់ផ្ទះដែលមានបន្ទប់ច្រើន ដើម្បីឲ្យពួកគេអាចដាំផ្លែឈើនិងបន្លែដោយខ្លួនឯងបាន។ ជាលទ្ធផល សេដ្ឋកិច្ចតូចមួយនេះចាប់ផ្តើមរីកចម្រើននៅក្នុងជំរំនេះ ដោយមានជនភៀសខ្លួនមួយចំនួនបានចាប់ផ្តើមអាជីវកម្មផ្ទាល់ខ្លួន។
កាលពីឆ្នាំមុន បន្ទាប់ពីមានកិច្ចព្រមព្រៀងសន្តិភាពមេដឹកនាំស៊ូដង់ខាងត្បូង លោកប្រធានាធិបតីអ៊ូហ្គាន់ដា Yoweri Museveni និយាយថា លោកសង្ឃឹមថា ជនភៀសខ្លួនអាចនឹងចាប់ផ្តើមត្រឡប់ទៅមាតុភូមិវិញបាន។ ប៉ុន្តែរឿងនេះមិនបានកើតឡើងនោះទេ។
របាយការណ៍ថ្មីមួយចេញផ្សាយកាលពីដើមខែកញ្ញាដោយទីភ្នាក់ងារមនុស្សធម៌ជាច្រើន រួមមានអង្គការ Oxfam ផងដែរនោះបានឲ្យដឹងថា ជនភៀសខ្លួនជាពិសេសស្ត្រី មានការស្ទាក់ស្ទើរក្នុងការត្រឡប់ទៅមាតុភូមិវិញ។ ពួកគេភ័យខ្លាចថា សន្តិភាពនេះនឹងមិនមានបានយូរនោះទេ។
ជាលទ្ធផល មន្ត្រីតាំងទីលំនៅ លោក Michael Joelle និយាយថា ជំរំជនភៀសខ្លួន Bidi Bidi មិនអាចទទួលយកមនុស្សបន្ថែមទៀតនោះទេ ហើយជនភៀសខ្លួនខ្លះត្រូវបានគេបដិសេធ ហើយការតាំងទីលំនៅកំពុងជួបបញ្ហា។
លោក Joelle បានថ្លែងថា៖
«នៅមុនពេលប្រកាសអាសន្នឆ្នាំ២០១៦ យើងបានផ្តល់ដីដែលមានទំហំ ៥ពាន់ម៉ែត្រការ៉េ ហើយផ្ទៃដីនេះកាន់តែចង្អៀតឡើងព្រោះចំនួនជនភៀសខ្លួនបានកើនឡើង»។
លោក Michael Joelle និយាយថា នៅក្នុងករណីខ្លះ ទីភ្នាក់ងារតាំងទីលំនៅអស់លទ្ធភាព និងមិនអាចទទួលយកជនភៀសខ្លួនបន្ថែមបាននោះទេ។
ស្ថានភាពនេះកាន់តែអាក្រក់ បន្ទាប់ពីម្ចាស់ជំនួយអន្តរជាតិបានផ្អាកមូលនិធិជំនួយនៅដើមឆ្នាំនេះ បន្ទាប់ពីមានរបាយការណ៍ថា មូលនិធិសម្រាប់ជនភៀសខ្លួននៅក្នុងប្រទេសអ៊ូហ្គង់ដាមិនត្រូវបានគេប្រើប្រាស់ត្រឹមត្រូវ។
អ្នកស្រី Grace ដែលជាជនភៀសខ្លួនម្នាក់នៅជំរំ Bidi Bidi បានរត់គេចពីប្រទេសកំណើតរបស់ខ្លួន ជាមួយនឹងកូនៗ កាលពី៤ឆ្នាំមុន។ ប្តីរបស់អ្នកស្រីទើបតែមកតាមក្រោយកាលពីឆ្នាំមុន។
អតីតគ្រូបង្រៀនរូបនេះនិយាយថា អ្នកស្រីមិនគិតថា អ្នកស្រីនឹងត្រឡប់ទៅប្រទេសស៊ូដង់ខាងត្បូងក្នុងពេលឆាប់ៗនោះទេ។
អ្នកស្រី Grace បានថ្លែងថា៖
«យើងទទួលបានដំណឹងអាក្រក់នានា ដូចជាមានការសម្លាប់ រំលោភ និងមានរឿងជាច្រើនទៀតកំពុងកើតឡើង»៕
