ភ្ជាប់​ទៅ​គេហទំព័រ​ទាក់ទង

​មនុស្ស​យន្ត​បង្រៀន​អង់គ្លេស​សិស្ស​កូរ៉េ​ខាង​ត្បូង


មនុស្ស​យន្ត​ឈ្មោះ​ អេង​ឃី (Engkey) ធ្វើ​ចលនា​​ចុះ​ឡើង​នៅ​មុខ​ថ្នាក់​រៀន​មួយ នៅ​ឯ​សាលា​បឋម​សិក្សា​ ហេហ្កឌ្យឹង (Hagjeong) នៅ​ក្នុង​ទី​ក្រុង​ ឌែហ្គូ (Daegu) ។

ក្រុម​វិស្វ​ករ​មួយ​ក្រុម​បាន​បង្កើត​មនុស្ស​យន្ត​មួយ ដែល​ពួកគេ​សង្ឃឹម​ថា នៅ​ទី​បំផុតនឹង​អាច​ជំនួស​គ្រូ​បង្រៀន​បរទេស​បាន។

មនុស្ស​យន្ត​ឈ្មោះ​ អេង​ឃី (Engkey) ធ្វើ​ចលនាចុះ​ឡើង​នៅ​មុខ​ថ្នាក់​រៀន​មួយ នៅ​ឯ​សាលា​បឋម​សិក្សា​ ហេហ្កឌ្យឹង (Hagjeong) នៅ​ក្នុង​ទី​ក្រុង​ ឌែហ្គូ។ មនុស្ស​យន្ត​ដែល​មាន​រាង​ជា​ស៊ុត បាន​ណែ​នាំសិស្ស​ថ្នាក់​ទី៤​ ចំនួន​៦​នាក់​ ឲ្យថា​តាមនូវ​ឃ្លា​ជា​ភាសា​អង់​គ្លេស និង​បង្រៀន​ក្មេង​ៗទាំង​នេះ​នូវ​ចម្រៀង​កុមារជា​ភាសា​អង់​គ្លេស។

ប៉ុន្តែ​ សម្លេង​របស់​ អេងឃី មិន​មែន​ជា​សម្លេង​ដែល​និយាយ​ដោយខ្លួនឯង​នោះ​ទេ។​ វា​ត្រូវ​បាន​ត​ភ្ជាប់​តាម​រយៈ​ទូរសន្និសីទ ឬ Teleconference ទៅប្រទេសហ្វីលីពិន ដែល​នៅទី​នោះ​ គ្រូ​ម្នាក់បង្រៀន​តាម​រយៈកញ្ចក់​ទូរទស្សន៍។ រូប​ភាព​នៃ​ស្ត្រី​ជន​ជាតិស្បែកសម្នាក់ត្រូវ​បាន​បង្ហាញនៅ​លើ​បន្ទះ​រូបភាពនៅ​លើ​ក្បាលមនុស្ស​យន្ត អេងឃី ទោះ​បី​ជា​អ្នក​ស្រី​មិន​មែន​ជា​គ្រូ​បង្រៀន​នៅ​ក្នុង​ប្រទេស​ហ្វីលីពិន​ក៏​ដោយ។ ក្រុម​អ្នក​ផលិត​ មនុស្ស​យន្ត អេង​ឃី និយាយ​ថា មនុស្ស​យន្ត​នេះ​មាន​ប្រយោជន៍​លើស​ពីអ្វី​ដែល​គ្រាន់​តែ​ជា​ផ្ទាំង​វីដេអូ​មួយ​ដែលនៅ​លើកង់​នោះ​ទៅ​ទៀត។

លោក គីម​ មុនសាង (Kim Mun-sang) គឺ​ជា​នាយក​នៃ​កម្ម​វិធី​មនុស្ស​យន្តវៃឆ្លាត នៅ​ឯ​វិទ្យាស្ថាន​កូរ៉េ​សម្រាប់វិទ្យា​សាស្រ្ត​ និង​បច្ចេក​វិជ្ជា ដែល​ទទួល​ការ​គាំ​ទ្រ​ផ្នែក​ហិរញ្ញវត្ថុ​ពី​រដ្ឋាភិបាល​ ​នៅ​ក្នុង​រដ្ឋ​ធានី​ សេ​អ៊ូល (Seoul)។ លោក​បាន​ពន្យល់​អំពី​របៀប​ដែល​មនុស្ស​យន្ត​ដំណើរ​ការថា៖

«យើង​មាន​ទស្ស​នៈ​មួយ​ចំនួន​អំពី​បច្ចេកវិទ្យា។ យើង​អាច​ដឹងចលនា​របស់គ្រូ​បង្រៀន​ភាសា​អង់គ្លេស​បាន។ ខណៈ​ពេល​ដែល​គ្រូ​ធ្វើ​ចលនា​ដៃ​របស់គាត់មនុស្សយន្តក៏​លើក​ដៃ​របស់​វា​ដែរ។​ ឧទាហរណ៍ ប្រសិន​បើ​គ្រូ​សើច យើង​ដឹង​ទឹក​មុខសើច​របស់​គ្រូ​បាន។ ដូច្នេះ មនុស្ស​យន្ត​អាច​ធ្វើ​ដូចអ្វីដែល​គ្រូ​ភាសា​អង់​គ្លេស​ធ្វើ​»។

លោក គីម​ និយាយ​ថា មនុស្ស​យន្ត​ អេងឃី ក៏​មានម៉ូត​ស្វ័យ​យ័ត​មួយ​ផង​ដែរ ដែល​វា​អាច​ចាប់​បាន​ការ​និយាយ​ភាសា​អង់​គ្លេស​របស់​សិស្ស​ ហើយ​ធ្វើ​ការ​កែរ​តម្រូវ​ការ​បញ្ចេញ​សម្លេង។ លោក គីម​ និយាយ​ថា ដោយសារ​តែ ប្រទេស​កូរ៉េ​ខាង​ត្បូង ផ្តោត​ការ​យក​ចិត្ត​ទុក​ដាក់​ទៅ​លើ​ការរៀនភាសាអង់គ្លេស​ មនុស្ស​យន្តអាច​បំពេញការខ្វះ​ខាត​គ្រូ​បរទេស។

«នៅ​ក្នុង​ប្រទេស​កូរ៉េ មានតម្រូវ​ការ​ជា​ច្រើន​សម្រាប់​ការ​សិក្សា​ភាសា​អង់​គ្លេស ដូច្នេះ ពួក​គេ​ត្រូវ​ការ​មេរៀន​ភាសា​អង់គ្លេស​ដ៏​ល្អ​ពី​អ្នក​និយាយ​ភាសា​អង់គ្លេស​ពី​កំណើត។ ប៉ុន្តែ ដូច​ដែល​អ្នក​បាន​ដឹង​ហើយ វា​មិន​មែន​ជា​ការ​ងាយ​ស្រួល​ទេ ក្នុង​ការ​រក​គ្រូ​ល្អ​ដែល​និយាយ​ភាសា​អង់គ្លេសពី​កំណើត​នៅ​ក្នុង​ប្រទេស​កូរ៉េភ្លាមៗ​ទេ។ មិន​មាន​គ្រូច្រើន​ទេ»។

លោក​ គីម បន្ថែម​ថា មនុស្ស​យន្ត អេងឃី នឹង​ជួយ​សន្សំ​សំច័យ​ថវិកា​របស់​សាលា។ លោក​និយាយ​ថា តម្លៃ​ក្នុង​ការ​កសាង​មនុស្ស​យន្ត​មួយ និង​ជួល​គ្រូជន​ជាតិ​ហ្វីលីពិន​ម្នាក់​ដើម្បី​ធ្វើ​ការ​ជាមួយវា គឺ​ប្រហែល​ជាពីរម៉ឺន​ដុល្លា​ក្នុង​មួយ​ឆ្នាំ។ នេះ​មាន​តម្លៃ​ប្រហែល​ជា​ពាក់​កណ្តាល នៃ​តម្លៃផ្គត់​ផ្គង់​គ្រូ​បរទេស​ម្នាក់រស់​នៅ​ក្នុង​ប្រទេស​កូរ៉េ។

លោក​និយាយ​ថា ប្រសិន​បើ​កម្ម​វិធី​សាក​ល្បងប្រើ​ប្រាស់​មនុស្ស​យន្ត​ អេង​ឃី នៅទី​ក្រុង​ ឌែហ្គូ ទទួលជោគ​ជ័យ នោះ​មនុស្ស​យន្ត​បន្ថែម​ទៀត​អាច​នឹង​ត្រូវ​បាន​ប្រើ​ប្រាស់​នៅ​ក្នុង​ការបង្រៀន​ក្រោយម៉ោង​សិក្សារបស់​សាលា។

ក្រុម​អ្នក​បង្កើត​មនុស្ស​យន្ត អេង​ឃី និយាយ​ថា សិស្ស​នឹង​កំណត់​ថា​តើ​មនុស្ស​យន្ត​នេះ​ទទួល​បាន​ជោគជ័យ​កម្រិត​ណា​ក្នុង​នាម​ជា​គ្រូ​ម្នាក់។ ប៉ុន្តែ​ ពួក​គេ​សង្ឃឹម​ថា នៅ​ថ្ងៃ​ណា​មួយ សាលា​ទាំង​អស់​នៅ​ក្នុង​ប្រទេស​កូរ៉េ​ខាង​ត្បូង​នឹង​មាន​មនុស្ស​យន្ត​មួយ​នៅ​ក្នុង​ថ្នាក់​រៀន៕

ប្រែ​សម្រួល​ដោយ​ ឌី ខាំបូលី

XS
SM
MD
LG