ភ្ជាប់​ទៅ​គេហទំព័រ​ទាក់ទង

ស្រ្តី​ទំនើង​កូរ៉េ​ខាងត្បូង​ត្រូវ​បាន​ឃុំ​ខ្លួន


លោកស្រី Cho Hyun-ah (រូប​កណ្តាល) អតីត​អនុប្រធាន​ក្រុមហ៊ុន​អាកាសចរណ៍​ Korean Air Lines ​បាន​មក​ដល់​ការិយាល័យ​របស់​រដ្ឋ​អាជ្ញា​ Seoul Western District Prosecutors Office នៅ​ក្នុង​ទីក្រុង​សេអ៊ូល​ ប្រទេស​កូរ៉េ​ខាងត្បូង​ កាលពី​ថ្ងៃទី៣០ ខែធ្នូ​ ឆ្នាំ២០១៤។

ក្រុម​អាជ្ញាធរ​កូរ៉េ​ខាងត្បូង​បាន​ចាប់ខ្លួន​អតីត​នាយក​ប្រតិបត្តិ​ក្រុម​ហ៊ុន​អាកាសចរណ៍ដែល​ធ្វើ​ឲ្យ​មានការ​រិះគន់​យ៉ាង​ខ្លាំងដោយ​ការ​ត្អូញត្អែ​អំពី​របៀប​ដែល​អ្នក​បម្រើ​តាម​យន្តហោះ​បាន​បម្រើ​គ្រាប់ Macadamia ​ដល់​លោកស្រី។

លោកស្រី Heather Cho ​ដែល​ជាកូន​ស្រី​របស់​អគ្គនាយក​ក្រុមហ៊ុន​អាកាស​ចរណ៍​កូរ៉េ​បាន​ត្រូវ​ស្ថិត​នៅ​ក្នុង​ការ​ឃុំ​ឃាំង​នៅ​ថ្ងៃ​ពុធ​នេះក្នុង​ទីក្រុង​សេអ៊ូលលើបទ​ចោទ​ប្រកាន់​ពី​ការ​រំលោភ​សុវត្ថិភាព​អាកាសចរណ៍។

កាល​ពី​ថ្ងៃ​ទី​៥ ​ខែ​ធ្នូ​ ​លោក​ស្រី Cho ​បាន​បង្ខំ​ឲ្យ​ជើង​ហោះហើរ​វិល​ត្រឡប់​មក​កាន់​ច្រកទ្វារ​វិញ​នៅ​ក្នុង​ទីក្រុង​ញូវយ៉ក​ដើម្បី​ដក​អ្នក​ធ្វើការ​ម្នាក់​នៅ​លើ​យន្តហោះ​ដែល​បាន​បម្រើ​គ្រាប់ Macadamia ​នៅ​ក្នុង​កញ្ចប់​ដោយ​មិន​ដាក់​គ្រាប់​នោះ​នៅ​ក្នុង​ចាន។

​គេ​ក៏​បាន​រាយការណ៍​ដែរ​ថា ​លោកស្រី​បាន​បង្ខំ​ឲ្យ​អ្នក​បម្រើ​យន្តហោះ​នោះ​លត់​ជង្គង់​នៅ​ពី​មុខ​លោកស្រី​នៅ​លើ​យន្តហោះ​ហើយ​បាន​យក​ចុង​សៀវភៅ​បុកអ្នក​បម្រើនៅ​យន្តហោះ​នោះ​ម្តង​ហើយ​ម្តង​ទៀត។

ពលរដ្ឋ​កូរ៉េ​ខាង​ត្បូង​ខ្លះ​មើល​ឃើញ​អតីត​នាយកប្រតិបត្តិ​ដែល​មាន​អាយុ​៤០​ឆ្នាំ​រូប​នេះ​ថា​ជាម្ចាស់​ក្សត្រី​ទំនើង​ហើយ​បណ្តាញ​ផ្សាយ​ព័ត៌មាន​បាន​ហៅ​សកម្មភាព​របស់​លោកស្រី​ថា​ជា​ឧបទ្ទវហេតុ​គ្រាប់ Macadamia ដ៏​ក្រេវ​ក្រោធ​មួយ។

​លោកស្រី Cho ​បាន​សុំអភ័យ​ទោស​ហើយ​បាន​លា​ចេញ​ពី​តួនាទី​របស់​លោកស្រី​ជា​អនុប្រធាន​ក្រុម​ហ៊ុន​អាកាសចរណ៍​កូរ៉េ។​ លោកស្រី​មិន​បាន​រង​ការ​ចោទ​ប្រកាន់​ពីឧក្រិដ្ឋ​កម្ម​ទេ ​ក៏ប៉ុន្តែ​អាច​ប្រឈមមុខ​ការ​ចោទ​ប្រកាន់​ពី​ការ​រំលោភការ​ហោះ​ហើរ​ហើយ​និង​ការ​ផ្លាស់​ប្តូរ​ផ្លូវ​ហោះ​ហើរ។

​តុលាការ​ទី​ក្រុង​សេអ៊ូល​បាន​សម្រេចថា ​លោកស្រី Cho ត្រូវ​ស្ថិត​ក្នុង​ការ​ឃុំ​ឃាំង​រហូត​ទាល់តែ​ការ​ចោទ​ប្រកាន់ត្រូវ​បាន​សម្រេច​ ហើយ​តុលាការ​និយាយ​ថា ​មានភាព​គ្រោះ​ថ្នាក់​ដែល​លោកស្រី​អាច​រត់​គេច​ខ្លួន ​ឬ​បំផ្លាញ​ភស្តុតាង។

​មន្រ្តី​ម្នាក់​ទៀត​របស់​ក្រុម​ហ៊ុន​អាកាសចរណ៍កូរ៉េ​បាន​ត្រូវ​ចាប់​ខ្លួន​លើ​បទ​ចោទ​ប្រកាន់​ពី​ការ​ព្យាយាម​បិទ​បាំង​ឧបទ្ទវហេតុ​នេះ។

​ភាព​ចម្រូង​ចម្រាស់​នៅ​ពេល​ថ្មី​ៗ​នេះ​បាន​កើត​មាន​ឡើង​នៅ​សប្តាហ៍​នេះ​បន្ទាប់​ពី​លោកស្រី Cho Yang-ho ​កូនស្រី​ម្នាក់​ទៀត​របស់​អគ្គនាយក​ក្រុមហ៊ុន​អាកាសចរណ៍​កូរ៉េ​បាន​ផ្ញើរសារអត្ថបទ​ទៅ​បងប្អូន​ស្រី​របស់​លោកស្រីដោយ​សន្យា​ថា​លោកស្រី​នឹង​ធ្វើការ​សងសឹក។

លោកស្រី Emily Cho ​ដែល​បាន​បញ្ជូន​សារអត្ថបទ​នោះ​បាន​សុំអភ័យ​ទោស​នៅ​ថ្ងៃ​ពុធ​នេះ​ដោយ​និយាយ​ថា ​លោកស្រី សុំ​អភ័យ​ទោស​ចំពោះ​ពាក្យ​ពេជន៍​នៅ​ក្នុង​សារ​នោះ៕

XS
SM
MD
LG