បេសកជនកូរ៉េខាងត្បូងពីររូបបានធ្វើដំណើរមកកាន់សហរដ្ឋអាមេរិកដើម្បីបញ្ជាក់ប្រាប់មន្ត្រីរដ្ឋាភិបាលរបស់លោកប្រធានាធិបតី Donald Trump អំពីជំនួបរបស់ពួកគេជាមួយនឹងមេដឹកនាំកូរ៉េខាងជើងលោក Kim Jong Un។
លោក Chung Eui Yong ប្រធានការិយាល័យសន្តិសុខជាតិកូរ៉េខាងត្បូង បានចាកចេញពីទីក្រុងសេអ៊ូលនៅថ្ងៃព្រហស្បតិ៍នេះ ដោយមានការអមដំណើរដោយលោក Suh Hoon ប្រធានទីភ្នាក់ងារស៊ើបការណ៍សម្ងាត់ជាតិកូរ៉េខាងត្បូង។
លោកទាំងពីរគ្រោងនឹងពិភាក្សាជាមួយរដ្ឋមន្ត្រីការបរទេសអាមេរិកលោក Rex Tillerson និងទីប្រឹក្សាសន្តិសុខជាតិអាមេរិកលោក H.R. McMaster អំពីជំនួបរបស់ពួកគេជាមួយនឹងលោក Kim Jong Un កាលពីប៉ុន្មានថ្ងៃកន្លងទៅនេះ.
បើយោងតាមការបញ្ជាក់របស់លោក Chung Eui Yong លោក Kim Jong Un បានស្នើថាលោកនឹងផ្អាកការសាកល្បងអាវុធនុយក្លេអ៊ែរ និងគ្រាប់ផ្លោងមីស៊ីល នៅពេលដែលលោកចូលរួមដោយផ្ទាល់នៅក្នុងការចរចាជាមួយនឹងសហរដ្ឋអាមេរិកដើម្បីបញ្ចប់កម្មវិធីអាវុធនុយក្លេអ៊ែររបស់លោក ក្នុងករណីណាដែលសន្តិសុខរបស់ប្រទេសកូរ៉េខាងជើងត្រូវបានធានាតែប៉ុណ្ណោះ។
បន្ទាប់ពីជំនួបនៅក្នុងរដ្ឋធានីវ៉ាស៊ីនតោននេះ លោក Chung Eui Yong នឹងធ្វើដំណើរទៅកាន់ប្រទេសចិន និងរុស្ស៊ីដើម្បីបញ្ជាក់ប្រាប់មន្ត្រីរដ្ឋាភិបាលនៃប្រទេសទាំងពីរនេះអំពីសំណើរបស់ប្រទេសកូរ៉េខាងជើង។ ចំណែកឯលោក Suh Hoon វិញ នឹងធ្វើដំណើរទៅកាន់ប្រទេសជប៉ុន។
ប្រទេសចិន រុស្ស៊ី ជប៉ុន កូរ៉េខាងត្បូង និងសហរដ្ឋអាមេរិក បានចរចាជាមួយនឹងរដ្ឋាភិបាលក្រុងព្យុងយ៉ាងអស់រយៈពេលជាច្រើនឆ្នាំមកហើយដើម្បីបញ្ចប់កម្មវិធីអាវុធនុយក្លេអ៊ែររបស់កូរ៉េខាងជើង។ ប៉ុន្តែ ការចរចានេះបានជាប់គាំងតាំងពីឆ្នាំ ២០០៨ មកម្ល៉េះ៕
