ប្រទេសកូរ៉េខាងត្បូងនឹងផ្អាកមួយផ្អែកនូវកិច្ចព្រមព្រៀងអន្តរកូរ៉េនៅថ្ងៃពុធនេះដើម្បីចាប់ផ្ដើមឡើងវិញនូវការតាមដានខ្សែត្រៀមជួរមុខតាមផ្លូវអាកាសលើប្រទេសកូរ៉េខាងជើង បន្ទាប់ពីកូរ៉េខាងជើងបានបញ្ជាក់ថាខ្លួនបានបង្ហោះផ្កាយរណបចារកម្មយោធាមួយគ្រឿងដែលជាការរំលោភលើការហាមឃាត់របស់អង្គការសហប្រជាជាតិ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP ដែលយោងលើការបញ្ជាក់របស់មន្ត្រីកូរ៉េខាងត្បូង។
ការប្រកាសរបស់កូរ៉េខាងត្បូងនេះដែលទំនងជានឹងធ្វើឱ្យកូរ៉េខាងជើងខឹងសម្បាបានធ្វើឡើងប៉ុន្មានម៉ោងក្រោយមកបន្ទាប់ពីកូរ៉េខាងជើងបានអះអាងថាបានបង្ហោះផ្កាយរណបឈ្លបយកការណ៍យោធាមួយគ្រឿងចូលក្នុងគន្លងគោចរ។ ការបង្ហោះនេះគឺជាការព្យាយាមលើកទី ៣ របស់កូរ៉េខាងជើងនៅក្នុងឆ្នាំនេះ។
ការអះអាងរបស់កូរ៉េខាងជើងនេះមិនត្រូវបានផ្ទៀងផ្ទាត់ដោយប្រភពឯករាជ្យនោះទេ។ ក្រសួងការពារជាតិសហរដ្ឋអាមេរិកបានបញ្ជាក់ថា ខ្លួននៅវាយតម្លៃថាតើកូរ៉េខាងជើងពិតជាបានបង្ហោះផ្កាយរណបនេះដោយជោគជ័យឬក៏អត់។ ចំណែកឯប្រទេសជប៉ុនវិញបានលើកឡើងថាមិនមានការបញ្ជាក់អះអាងណាមួយថាផ្កាយរណបកូរ៉េខាងជើងបានចូលដល់ក្នុងគន្លងគោចរនោះទេ។
ប៉ុន្តែ សហរដ្ឋអាមេរិកនិងសម្ព័ន្ធមិត្តរបស់ខ្លួននៅតែថ្កោលទោសចំពោះការបង្ហោះផ្កាយរណបរបស់កូរ៉េខាងជើងនេះ ដោយពួកគេជឿថាការបង្ហោះនេះមានបំណងលើកកម្ពស់បច្ចេកវិទ្យាមីស៊ីលរបស់កូរ៉េខាងជើងក៏ដូចជាបង្កើតប្រព័ន្ធតាមដានលើដែនអវកាសផងដែរ។
កូរ៉េខាងជើងបានបញ្ជាក់ថា ខ្លួនមានសិទ្ធិអធិបតេយ្យស្របច្បាប់នៅក្នុងការបង្ហោះផ្កាយរណបចារកម្មនេះដើម្បីទប់ទល់ជាមួយនឹងអ្វីដែលខ្លួនហៅថាជាការគំរាមកំហែងកាន់តែខ្លាំងឡើងដែលនាំមុខដោយសហរដ្ឋអាមេរិក។ ប៉ុន្តែ សេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិនៅតែហាមឃាត់មិនឱ្យកូរ៉េខាងជើងបង្ហោះផ្កាយរណប ដោយយល់ឃើញថាការបង្ហោះនេះគឺជាការបិទបាំងការសាកល្បងបច្ចេកវិទ្យាមីស៊ីលរយៈចម្ងាយឆ្ងាយរបស់ប្រទេសនេះ។
លោក Heo Tae-keun អនុរដ្ឋមន្ត្រីការពារជាតិកូរ៉េខាងត្បូងទទួលបន្ទុកកិច្ចការគោលនយោបាយ បានបញ្ជាក់នៅក្នុងសន្និសីទកាសែតដែលផ្សាយតាមទូរទស្សន៍ថា ការបង្ហោះផ្កាយរណបរបស់កូរ៉េខាងជើងលើកនេះមិនត្រឹមតែជាការរំលោភយ៉ាងជាក់ច្បាស់លើសេចក្ដីសម្រេចរបស់អង្គការសហប្រជាជាតិប៉ុណ្ណោះទេ ប៉ុន្តែថែមទាំងជា «ការបង្កហេតុធ្ងន់ធ្ងរមួយដែលគំរាមដល់សន្តិសុខជាតិរបស់កូរ៉េខាងត្បូង» ផងដែរ៕
