ប្រទេសកូរ៉េខាងត្បូងបានបង្កើនការប្រុងប្រយ័ត្នចំពោះមេរោគកូរ៉ូណាវីរុសថ្មីរហូតដល់កម្រិតខ្ពស់បំផុត។
ប្រធានាធិបតីកូរ៉េខាងត្បូងលោក Moon Jae-in បានជំរុញកុំឲ្យក្រុមមន្ត្រីស្ទាក់ស្ទើរក្នុងការ«ចាត់វិធានការដ៏ខ្លាំងក្លាដែលមិនធា្លប់ធ្វើមិនមុនមក»ដើម្បីគ្រប់គ្រងការឆ្លងរាតត្បាតមេរោគកូរ៉ូណាវីរុសប្រភេទថ្មីនេះ។
នាយករដ្ឋមន្ត្រីកូរ៉េខាងត្បូង លោក Chung Sye-kyun បាននិយាយថា មេរោគកូរ៉ូណាវីរុសថ្មីនេះបានឆ្លងរាតត្បាតដល់«ដំណាក់កាលមួយដែលកាន់តែគ្រោះថ្នាក់» នៅក្នុងប្រទេសកូរ៉េខាងត្បូង ដោយសារតែមានការរាយការណ៍អំពីករណីអ្នកឆ្លងថ្មីបន្ថែមទៀតនៅថ្ងៃអាទិត្យនេះ។
លោកនាយករដ្ឋមន្ត្រី Chung បានថ្លែងសុន្ទរកថាថ្នាក់ជាតិតាមកញ្ចក់ទូរទស្សន៍កាលពីល្ងាចថ្ងៃសៅរ៍ថា រដ្ឋាភិបាលក្រុងសេអ៊ូលកំពុងតែខិតខំប្រឹងប្រែងពេញទំហឹងដើម្បីគ្រប់គ្រងកុំឲ្យមេរោគកូរ៉ូណាវីរុសថ្មីនេះឆ្លងរាតត្បាតបន្ថែមទៀត។
មជ្ឈមណ្ឌលគ្រប់គ្រងនិងបង្ការជំងឺរបស់កូរ៉េខាងត្បូងបានឲ្យដឹងថា ក្នុងចំណោមករណីឆ្លងថ្មីចំនួន១២៣ដែលត្រូវបានរាយការណ៍នៅថ្ងៃអាទិត្យនេះ មាន១១៣ករណីកើតឡើងនៅក្នុងទីក្រុង Daegu ដែលជាទីក្រុងធំបំផុតទីបួនរបស់កូរ៉េខាងត្បូង និងនៅក្នុងតំបន់ជុំវិញនោះ។ កូរ៉េខាងត្បូងឥឡូវនេះមានករណីឆ្លងមេរោគកូរ៉ូណាវីរុសថ្មីនេះចំនួន៥៥៦ករណីហើយ។
កាលពីថ្ងៃសៅរ៍ ក្រសួងការបរទេសសហរដ្ឋអាមេរិកក៏បានចេញសេចក្ដីប្រកាសចំពោះការធ្វើដំណើរទៅកាន់ប្រទេសជប៉ុននិងកូរ៉េខាងត្បូងផងដែរ ដោយសារតែការផ្ទុះមេរោគកូរ៉ូណាវីរុសថ្មីនេះ ដោយតម្រូវឲ្យអ្នកធ្វើដំណើរទាំងអស់បង្កើនការប្រុងប្រយ័ត្ន ប្រសិនបើត្រូវធ្វើដំណើរទៅប្រទេសទាំងនេះ។
ក្រសួងការបរទេសសហរដ្ឋអាមេរិកបានឲ្យដឹងថា សេចក្ដីប្រកាសឲ្យប្រុងប្រយ័ត្នកម្រិតទីពីរនេះមានន័យថា អ្នកដំណើរទាំងអស់គួរតែចៀសវាងទាក់ទងជាមួយនឹងអ្នកឈឺ និងត្រូវអនុវត្តអនាម័យជាប្រចាំ ដូចជាត្រូវលាងដៃ ដើម្បីកុំឲ្យឆ្លងមេរោគនេះ។ ប្រទេសចិនបានរាយការណ៍ថា មានករណីឆ្លងមេរោគកូរ៉ូណាវីរុសថ្មីនេះចំនួន៦៤៨ករណី ដែលធ្វើឲ្យចំនួនអ្នកឆ្លងសរុបកើនឡើងដល់៧៦.៩៣៦ករណី។ អ្នកជំងឺចំនួន៩៧នាក់ថែមទៀតបានស្លាប់ ដែលធ្វើឲ្យចំនួនអ្នកស្លាប់ដោយសារមេរោគនេះសរុបកើនឡើងដល់២.៤៤២នាក់៕
ប្រែសម្រួលដោយអ្នកស្រី ហុង ចិន្ដា
