ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាហ្រ្វិក​ខាងត្បូង​ពិចារណា​ជម្រើស​បន្ទាប់ពី​ដីកា​ចាប់ខ្លួន​លោក Putin​ របស់​តុលាការ​ព្រហ្មទណ្ឌ​អន្តរជាតិ


រូបឯកសារ៖ ប្រធានាធិបតី​រុស្ស៊ី​លោក Vladimir Putin (ស្ដាំ) និង​ប្រធានាធិបតី​អាហ្វ្រិក​ខាង​ត្បូង​លោក Cyril Ramaphosa ថ្លែង​ក្នុង​អំឡុងពេល​នៃ​កិច្ចប្រជុំ​កំពូល​រុស្ស៊ី-អាហ្វ្រិក នៅ​រមណីយដ្ឋាន Black Sea ក្នុង​ទីក្រុង Sochi ប្រទេស​រុស្ស៊ី ថ្ងៃទី ២៣ ខែតុលា ឆ្នាំ២០១៩។
រូបឯកសារ៖ ប្រធានាធិបតី​រុស្ស៊ី​លោក Vladimir Putin (ស្ដាំ) និង​ប្រធានាធិបតី​អាហ្វ្រិក​ខាង​ត្បូង​លោក Cyril Ramaphosa ថ្លែង​ក្នុង​អំឡុងពេល​នៃ​កិច្ចប្រជុំ​កំពូល​រុស្ស៊ី-អាហ្វ្រិក នៅ​រមណីយដ្ឋាន Black Sea ក្នុង​ទីក្រុង Sochi ប្រទេស​រុស្ស៊ី ថ្ងៃទី ២៣ ខែតុលា ឆ្នាំ២០១៩។

តុលាការ​ព្រហ្មទណ្ឌអន្តរជាតិ (ICC)​ដែល​មាន​នៅ​ទីតាំង​នៅក្នុង​ទីក្រុង​ឡាអេ បាន​ចេញ​ដីកា​ចាប់ខ្លួន​មេដឹកនាំ​រុស្ស៊ី​លោក Vladimir Putin កាលពី​ដើម​ខែមីនា​ពី​បទ​ឧក្រិដ្ឋកម្ម​សង្គ្រាម​ពាក់ព័ន្ធ​នឹង​ការនិរទេស​កុមារ​អ៊ុយក្រែន​ទៅកាន់​ប្រទេស​រុស្ស៊ី។ អាហ្រ្វិក​ខាងត្បូង​គឺជា​ប្រទេស​ហត្ថលេខី​នៃ​លក្ខន្តិកៈ​ទីក្រុង​រ៉ូម​របស់​តុលាការ ICC ​ដែល​មាន​កាតព្វកិច្ច​ដូច​ប្រទេស​ហត្ថលេខី​នានា​ក្នុង​ការអនុវត្ត​ដីកា​ចាប់ខ្លួន​អន្តរជាតិ​របស់​តុលាការ​នេះ។

ក៏ប៉ុន្តែ ​រដ្ឋាភិបាល​ទីក្រុង​ប្រេតូរីយ៉ា ​ក៏ជា​សម្ព័ន្ធមិត្ត​ជិតស្និទ្ធ​ជាមួយ​រដ្ឋាភិបាល​ទីក្រុង​មូស្គូ​ដែរ ហើយ​បាន​បដិសេធ​មិន​រិះគន់​ការឈ្លានពាន​របស់​រុស្ស៊ី​ឆ្នាំ២០២២ ទៅលើ​អ៊ុយក្រែន​ទេ ​ហើយ​ថែមទាំង​ឈាន​ទៅ​ដល់​ការចរចា​ទ្វេភាគី​ជាមួយ​រដ្ឋមន្ត្រី​ការបរទេស​រុស្ស៊ី​លោក Sergey Lavrov នៅ​ដើម​ឆ្នាំ​នេះ និង​ធ្វើជា​ម្ចាស់ផ្ទះ​សម្រាប់​សមយុទ្ធ​នាវា​ចម្បាំង​យោធា​រុស្ស៊ី​រួមគ្នា​កាលពី​ខែកុម្ភៈ​ទៀតផង។

រដ្ឋមន្ត្រី​ការបរទេស​អាហ្វ្រិក​ខាង​ត្បូង​អ្នកស្រី Naledi Pandor បាន​ប្រាប់​ស្ថានីយ៍​វិទ្យុ​ក្នុង​ស្រុក SAfm ក្នុង​បទសម្ភាស​មួយ​ថា​ រដ្ឋាភិបាល​កំពុង​រង់ចាំ​ការពិនិត្យ​ឡើងវិញ​ផ្នែក​ច្បាប់​លើ​បញ្ហា​នេះ ហើយ​បន្ទាប់​មក​នឹង​ពិចារណា​ជម្រើស​របស់​ខ្លួន។

អ្នកស្រី Pandor ថ្លែង​ថា៖

«វា​ជា​ស្ថានភាព​លំបាក​មួយ ប៉ុន្តែ​អ្នក​ដឹង​ទេ ខ្ញុំ​គិត​ថា គណៈរដ្ឋមន្ត្រី​ត្រូវ​ពិភាក្សា​រឿង​នេះ នៅ​ពេល​ដែល​ខ្ញុំ​មាន​មតិ​ហើយ ខ្ញុំ​នឹង​យកមតិ​នោះ​ទៅ​ជម្រាប​ដល់​គណៈរដ្ឋមន្ត្រី។ ដូច្នេះ​សកម្មភាព​របស់​យើង​នឹង​ត្រូវបាន​ដឹកនាំ​ដោយ​មតិ​រួម​របស់​រដ្ឋាភិបាល»។

ទោះជា​យ៉ាងណា​ក៏ដោយ ​រដ្ឋមន្ត្រី​រូបនេះ​បាន​បដិសេធ​ចំពោះ​លទ្ធភាព​នៃ​ការដក​ការអញ្ជើញ​លោក Putin ក្នុង​ការទៅ​ចូលរួម​កិច្ចប្រជុំ​កំពូល​នៃ​ក្រុម​ប្រទេស​ដែល​សេដ្ឋកិច្ច​កំពុង​រីកចម្រើន ដែល​ត្រូវបាន​គេ​ស្គាល់​ថា BRICS ដែល​មាន​ប្រទេស ប្រេស៊ីល​ រុស្ស៊ី ​ឥណ្ឌា ​ចិន ​និង​អាហ្វ្រិក​ខាងត្បូង​ជា​សមាជិក។ អាហ្រ្វិក​ខាងត្បូង​គ្រោង​នឹង​ធ្វើជា​ម្ចាស់ផ្ទះ​នៃ​កិច្ចប្រជុំ​កំពូល​នៃ​មេដឹកនាំ​ប្លុក​នេះ នៅ​ខែសីហា​ខាងមុខ​នេះ។ ទីក្រុង​មូស្គូ​មិន​ទាន់​បញ្ជាក់​ថា តើ​លោក Putin នឹង​ចូលរួម​ដោយ​ផ្ទាល់ ឬ​យ៉ាង​ណា​ទេ។

អ្នកស្រី Pandor ក៏​បាន​រិះគន់​តុលាការ ICC ​ផងដែរ​ចំពោះ​ការមិនមាន​អ្វី​ដែល​អ្នកស្រី​ហៅ​ថា «វិធីសាស្រ្ត​ស្មើៗ​គ្នា» ចំពោះ​មេដឹកនាំ​ទាំងអស់​ដែល​ទទួល​ខុសត្រូវ​ចំពោះ​ការរំលោភ​បំពាន​ច្បាប់​អន្តរជាតិ និង​ចំពោះការផ្តោត​ទៅ​លើ​រដ្ឋ​មួយ​ចំនួន​ជាង​រដ្ឋ​ដទៃ​ទៀត។

ក៏ប៉ុន្តែ​លោក Darren Bergmanដែល​ជា​រដ្ឋមន្ត្រី​ការបរទេស​ស្រមោល​នៃ​ប្រទេស​អាហ្វ្រិក​ខាង​ត្បូង​ដែល​មក​ពី​គណបក្ស​ប្រឆាំង​ដ៏​សំខាន់​ក្នុង​ប្រទេស​នេះ​គឺ​គណបក្ស​សម្ព័ន្ធ​ប្រជាធិបតេយ្យ​បាន​និយាយ​ថា រដ្ឋាភិបាល​ត្រូវតែ​ប្រកាន់ខ្ជាប់​នូវ​ការប្តេជ្ញាចិត្ត​របស់ខ្លួន​ចំពោះ​តុលាការ ICC។

លោក Darren Bergman ថ្លែង​ថា៖

«គណបក្ស​សម្ព័ន្ធ​ប្រជាធិបតេយ្យ​ជឿ​ថា គណៈរដ្ឋមន្ត្រី​មិនគួរ​បន្ត​អញ្ជើញ​លោក​ប្រធានាធិបតី​ Putin​ ទៀត​ទេ ​ដូច្នេះ​ហើយ​គួរតែ​ដក​ការអញ្ជើញ​នោះ។ ប្រសិនបើ​ពួកគេ​មិន​ធ្វើ​ទេ ពួកគេ​គួរតែ​ត្រៀម​ខ្លួន​ជា​ស្រេច​ដើម្បី​អនុវត្ត​ដីកា​ចាប់​ខ្លួន​លោក​ប្រធានាធិបតី Putin»។

លោក Steven Gruzd អ្នកវិភាគ អំពី​ប្រទេស​រុស្ស៊ី​នៅ​វិទ្យាស្ថាន​អាហ្វ្រិក​ខាងត្បូង​សម្រាប់​កិច្ចការ​អន្តរជាតិ (South African Institute for International Affairs) បាន​ប្រាប់​ VOA ​ថា ​មាន​មធ្យោបាយ​មួយ​ចំនួន​ដែល​រដ្ឋាភិបាល​អាច​អនុវត្ត​បាន។ រដ្ឋាភិបាល​អាហ្វិ្រក​ខាងត្បូង​អាច​គេច​ចេញ​ពី​បញ្ហា​នេះ​បាន​ដោយ​ធ្វើ​កិច្ចប្រជុំ​កំពូល ​BRICS ​នេះ ​តាម​អនឡាញ ​ដោយ​រួចខ្លួន​ចេញ​ពី​កាតព្វកិច្ច​តុលាការ​ទាំងស្រុង​ ឬ​ក៏​ពួកគេ​អាច​ទំនងជា​ព្យាយាម​ស្វែងរក​អភ័យ​ឯកសិទ្ធិ​ការទូត​មួយ​ចំនួន​សម្រាប់​លោក Putin ក្នុង​នាម​ជា​ប្រមុខរដ្ឋ។

លោក Steven Gruzd ថ្លែង​ថា៖

«យើង​បាន​ឃើញ​បញ្ហា​នេះ​ពីមុន​មក។ នៅ​ឆ្នាំ ២០១៥ លោក Omar al-Bashir នៃ​ប្រទេស​ស៊ូដង់​បាន​មក​ប្រទេស​អាហ្វ្រិក​ខាងត្បូង​ចូលរួមកិច្ចប្រជុំ​កំពូល​សហភាព​អាហ្វ្រិក ហើយ​អាហ្វ្រិក​ខាងត្បូង​ត្រូវបាន​បញ្ជា​ឱ្យ​ចាប់ខ្លួន​លោក​តាមដីកា​របស់​តុលាការ​ក្នុង​ស្រុក។ ប៉ុន្តែ​ការបញ្ជា​នោះ​មិន​ត្រូវ​បាន​គេ​អើពើ និង​ត្រូវ​បាន​ជំទាស់​ ហើយ​លោក​ត្រូវ​បាន​អនុញ្ញាត​ឱ្យ​គេច​ខ្លួន​ពី​មូលដ្ឋាន​យោធា»។

លោក Lunga Ngqengelele អ្នកនាំពាក្យ​ក្រសួង​ការបរទេស​និង​សហប្រតិបត្តិការ​អន្តរជាតិ​របស់អាហ្វ្រិក​ខាង​ត្បូង​បាន​ប្រាប់ VOA ថា គណៈរដ្ឋមន្ត្រី​ទំនង​ជា​នឹង​ពិភាក្សា​អំពី​បញ្ហា​នេះ​ក្នុង​សប្តាហ៍​នេះ៕

ប្រែសម្រួលដោយអ្នកស្រី លី ម៉ូរីវ៉ាន់

XS
SM
MD
LG