ការរក្សាគម្លាតឲ្យនៅឆ្ងាយពីគ្នាគឺជាវិធីមួយក្នុងចំណោមវិធីល្អបំផុតមួយចំនួន ដែលយើងត្រូវអនុវត្ត ដើម្បីទប់ស្កាត់នឹងការរាតត្បាតនៃវីរុសកូវីដ១៩ នេះ។
អង្គការវេជ្ជសាស្រ្ត និងសុខភាពនាំមុខរបស់សហរដ្ឋអាមេរិក ដែលតំណាងឲ្យវេជ្ជបណ្ឌិត គិលានុបដ្ឋាក និងមន្ទីរពេទ្យ បានសរសេរលិខិតចំហរទៅកាន់សាធារណៈជនអាមេរិកាំង ដោយអំពាវនាវឲ្យពួកគេនៅផ្ទះ។
ពួកគេបាននិយាយថា ការនៅផ្ទះ គឺជាគន្លឹះសំខាន់មួយក្នុងការបន្ថយល្បឿននៃការរីករាលដាលនៃវីរុសកូវីដ១៩នេះ។ ការអនុវត្តនេះ នឹងរារាំងមនុស្សមិនឲ្យប៉ះលើផ្ទៃវត្ថុ ឬ កន្លែងនានា ដែលមនុស្សជាច្រើនបានប៉ះ ដែលអ្នកខ្លះ អាចមានមេរោគនេះ នៅលើដៃរបស់ពួកគេ។
លោកវេជ្ជបណ្ឌិត Dan Allan នៃគ្លីនិក Cleveland បានថ្លែងក្នុងសម្តីដើមថា៖ «បាក់តេរីនឹងមាននៅគ្រប់ទីកន្លែងដូច្នេះប្រសិនបើអ្នកមិនលាងដៃមុនពេលបរិភោគ ឬ ប្រសិនបើអ្នកប៉ះលើផ្ទៃវត្ថុផ្សេងៗទៀតដែលមានមេរោគនោះ អ្នកអាចឆ្លង ហើយងាយនឹងឈឺ។ មានមេរោគខ្លះ អាចរស់បានរាប់សប្តាហ៍នៅលើផ្ទៃនានា ដូច្នេះអ្នកពិតជាត្រូវព្យាយាមថែរក្សាបរិស្ថាននៅជុំវិញអ្នក ជាពិសេសការបរិភោគ និងកន្លែងបរិភោគអាហាររបស់អ្នកឲ្យបានស្អាត»។
វិទ្យាស្ថានសុខាភិបាលជាតិសហរដ្ឋអាមេរិកបានឲ្យដឹងថា វីរុសកូវីដ១៩ អាចរស់នៅក្នុងអាកាសរហូតដល់ ៣ ម៉ោង និងនៅលើផ្ទៃកន្លែងណាមួយជាច្រើនម៉ោង ឬ រហូតដល់ជាច្រើនថ្ងៃបាន។ ដូច្នេះប្រសិនបើអ្នកប៉ះប៊ូតុងជណ្តើរយន្ត ឬ បង្កាន់ដៃជណ្តើរ ឬ ជណ្តើរយន្ត ឬក៏បង្កាន់ដៃទ្វារ អ្នកអាចឆ្លងវីរុសនេះបាន។
លោកវេជ្ជបណ្ឌិត Dan Allan នៃគ្លីនិក Cleveland បានថ្លែងបន្តក្នុងសម្តីដើមថា៖ «អ្វីៗដែលប៉ះដោយដៃប្រហែលជានឹងកខ្វក់ហើយ។ ភាគច្រើននៃជំងឺរបស់អ្នក គឺមកពីដៃរបស់អ្នកផ្ទាល់។ ដូច្នេះ ការលាងដៃឲ្យបានត្រឹមត្រូវដោយប្រើពេលឲ្យបានគ្រប់គ្រាន់ដោយប្រើសាប៊ូ ឬ ប្រសិនបើអ្វីដែលអ្នកមានគឺត្រឹមតែទឹកលាងដៃមានជាតិអាល់កុលនោះ អ្នកត្រូវតែឲ្យប្រាកដថា អ្នកបានសម្អាតដៃរបស់អ្នកមុនពេលដែលអ្នកប៉ះមុខ ឬ បរិភោគ»
គ្រូពេទ្យណែនាំថា នៅពេលយើងក្អក ត្រូវប្រើកែងដៃរបស់យើងខ្ទប់មាត់ និងច្រមុះ ដើម្បីទប់ស្កាត់ការរីករាលដាលនៃវីរុសនេះ។ ប៉ុន្តែ វាជាការល្អបំផុត នៅពេលដែលយើងក្អក យើងប្រើក្រដាស់ជូតមាត់ខ្ទប់មាត់ និងច្រមុះ ហើយបន្ទាប់មកបោះវាចោល។
វីរុសកូវីដ១៩នេះ ហាក់ដូចជារីករាលដាលភាគច្រើននៅក្នុងសហគមន៍ នៅតាមភោជនីយដ្ឋាន និងការជួបប្រមូលផ្តុំគ្នា ជាជាងនៅក្នុងមន្ទីរពេទ្យ។
នោះហើយជាមូលហេតុដែលការរក្សាគម្លាតឲ្យនៅឆ្ងាយពីគ្នា ការសម្អាតដើម្បីសម្លាប់មេរោគនៅលើផ្ទៃនានា និងរបស់ដែលអ្នកប៉ះញឹកញាប់ដូចជា ក្តារចុចកុំព្យូទ័រ ការលាងដៃ និងការមិនប៉ះភ្នែក ច្រមុះ និងមាត់របស់អ្នក នឹងធ្វើឲ្យអ្នក និងអ្នកដទៃមានសុវត្ថិភាព។
អង្គការសុខភាពនិយាយថា ពួកគេចង់ជួយមនុស្សឲ្យជាសះស្បើយពីជំងឺនេះ ប៉ុន្តែ ពួកគេចង់ឲ្យប្រជាពលរដ្ឋអាមេរិក ចូលរួមចំណែកដោយអនុវត្តទៅតាមការណែនាំ ដើម្បីការពារមិនឲ្យអ្នកជំនាញសុខភាព ធ្លាក់ខ្លួនឈឺដែរ៕
ប្រែសម្រួលដោយអ្នកស្រី លី ម៉ូរីវ៉ាន់
