ប្រទេសចិនថាខ្លួននឹងដាក់បម្រាមជាបណ្តោះអាសន្ន មិនឲ្យជនបរទេសដែលមានទិដ្ឋាការឬប័ណ្ណស្នាក់នៅក្នុងប្រទេសចិន ចូលប្រទេសចិនបានចាប់ពីពាក់កណ្តាលអាធ្រាតថ្អៃសុក្រ ចូលថ្ងៃសៅរ៍ទី២៨ខែមីនា នៅក្នុងកិច្ចប្រឹងប្រែងចុងក្រោយរបស់ខ្លួនដើម្បីទប់ស្កាត់ការបន្តរាលដាលនៃមេរោគកូរ៉ូណាប្រភេទថ្មី។
ក្រសួងការបរទេសចិននិយាយកាលពីថ្ងៃព្រហស្បតិ៍ថា ប្រទេសចិនបានដាក់ការរឹតត្បិតថ្មីនេះ «ដោយផ្អែកលើស្ថានភាពការផ្ទុះរាតត្បាតនិងការអនុវត្តនានានៅប្រទេសដទៃ។»
អាជ្ញាធរចិនថា ខ្លួននឹងបើកចំហការទំនាក់ទំនងជាមួយប្រទេសដទៃទៀត និងចេញគោលការណ៍ឲ្យបានត្រឹមត្រូវទាក់ទងនឹងកម្មវិធីផ្លាស់ប្តូរបុគ្គលិកក្រោមលក្ខខណ្ឌពិសេសនានា។
រដ្ឋាភិបាលចិនក្នុងទីក្រុងប៉េកាំងនិយាយថា អ្នកកាន់ទិដ្ឋាការការទូតនឹងមិនត្រូវប៉ះពាល់ពីបម្រាមជាបណ្តោះអាសន្នមិនឲ្យជនបរទេសចូលប្រទេសចិននេះទេ។
កាលពីខែមករា ប្រទេសចិនបានបិទរាល់ការធ្វើដំណើរចេញចូលពីទីក្រុងនានាក្នុងខេត្តហ៊ូប៉េ ដោយរួមទាំងទីក្រុងវូហាន ដែលជាទីកន្លែងគេបានរកឃើញវីរុសថ្មីនេះដំបូងបំផុត៕
