ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កំណើន​តម្លៃ​ប្រេង​ឥន្ធនៈ​និង​ម្ហូបអាហារ ប៉ះពាល់​ធ្ងន់ធ្ងរ​ដល់​ក្រុមជន​ងាយ​រងគ្រោះ​នៅ​មីយ៉ាន់ម៉ា


រូបឯកសារ៖ មនុស្សម្នា ទិញ​អាហារ និង​គ្រឿងទេស​ផ្សេងៗ​នៅ​ផ្សារទំនើប​មួយ​ក្នុង​ទីក្រុង​រ៉ង់ហ្គូន ប្រទេស​មីយ៉ាន់ម៉ា កាលពី​ថ្ងៃទី៧ ខែកញ្ញា ឆ្នាំ២០២១។

រូបិយប័ណ្ណ​នៃ​ប្រទេស​មីយ៉ាន់ម៉ា គឺលុយ kyat (ខ្យាត់) បានចុះថ្លៃច្រើនមិន​ធ្លាប់​មាន​ពី​មុន បណ្តាល​ឱ្យមាន​ការ​ឡើង​ថ្លៃនៃ​គ្រឿងឧបភោគ​បរិភោគ​ជា​ចាំ​បាច់ដែល​នាំ​ចូល​ក្នុង​ប្រទេស ចាប់​តាំងពីប្រេង​ឥន្ធនៈ​រថយន្ត​រហូត​ដល់​ប្រេង​សម្រាប់​ធ្វើ​ម្ហូប នាំ​ឱ្យ​មាន​ការ​ពិបាក​ច្រើនដល់​ពលរដ្ឋ​សាមញ្ញ។

កាលពីសប្តាហ៍​ចុងក្រោយ​នៃ​ខែ​កញ្ញា ​អត្រា​ប្តូរ​ប្រាក់ដុល្លារ​ប្រែប្រួល​ខ្លាំងនៅ​ពេលមាន​សេចក្តី​ត្រូវ​ការកើន​ឡើង​យ៉ាង​គំហុកចំពោះ​រូបិយប័ណ្ណអាមេរិកាំង ដែលបាន​ជំរុញ​ឱ្យ​អត្រា​នេះ​ ​កើន​ខ្ពស់ដល់ប្រមាណ​ ២.៧០០​ kyats ស្មើ​នឹង​មួយ​ដុល្លារ គឺ​ជិតពីរ​ដង​នៃ​អត្រានៅ​មុន​រដ្ឋប្រហារ​កាល​ពី​ថ្ងៃ​ទី១ ខែ​កុម្ភៈ។

តាំងពី​ពេល​នោះ​មក តម្លៃ​ប្រេង​ឥន្ធនៈ​និង​គ្រឿង​ឧបភោគ​បរិភោគដឹក​ចូល​ក្នុង​ប្រទេស ក៏​បាន​កើន​ឡើង​ជិត​ ៥០%ដែរ នាំ​ឱ្យ​មានការ​ត្អូញ​ត្អែរពី​អាជីវករក្នុង​មូលដ្ឋានដែល​បាន​និយាយ​ជា​មួយ​វីអូអេ ដោយ​មាន​រួម​បញ្ចូល​ទាំង​ឈ្មួញ​ និង​អ្នក​ដឹក​អង្ករ​ទៅ​លក់​ឯ​ប្រទេស​ក្រៅ​ ព្រម​ទាំង​អ្នកនាំ​ចូល​ក្នុង​ប្រទេស​នូវ​ប្រេង​ចង្អិន​អាហារនិង​គ្រឿង​ទេស ​និង​អ្នក​លក់ដូរវត្ថុ​ទាំង​នេះ​ផង​ដែរ។

ពួក​អ្នក​បើករថយន្ត​តាក់ស៊ី​នៅក្រុង Yangon ​(រ៉ង់ហ្គូន) ទទួល​រងផល​ប៉ះបាល់​ខ្លាំង​ជា​ពិសេស។ ពួក​គេ​ច្រើន​នាក់​ បាន​ឈប់​បើកបរពីព្រោះ​មិន​អាចមាន​ប្រាក់សម្រាប់ទិញ​ប្រេង​ឥន្ធនៈ​ ហើយ​អ្នក​ខ្លះ​ទៀតនិយាយ​ប្រាប់​វីអូអេ​ថា ពួក​គេ​នឹងឈប់​ធ្វើអាជីវកម្ម​នេះ​ទាំង​ស្រុង បើ​តម្លៃ​ប្រេង​ឥន្ធនៈ​មិន​ចុះ​ថោក។

លោក Al Doe ជាអ្នក​បើក​រថយន្តតាក់ស៊ី​អាយុ​ ៥៣ឆ្នាំនៅ​ក្នុងសង្កាត់ Dagon ខាងជើងនៃ​ក្រុង Yangon។ លោកបាន​និយាយ​ថា៖ «នេះ​ជា​ស្ថានភាព​អា​ក្រក់បំផុតដែលខ្ញុំមិន​ដែល​ជួប​ប្រទះក្នុង​ពេល​៤០​ឆ្នាំ​កន្លង​ទៅ​នេះ​ក្នុង​របរ​ជា​អ្នក​បើក​តាក់ស៊ី។ មុន​ខែ​កញ្ញា លោក Al Doe មាន​ប្រាក់​ចំណូល ​៣ម៉ឺន​ kyats ក្នុងមួយ​ថ្ងៃ​ ហើយ​ចំណាយ​៦​ពាន់ kyats សម្រាប់​ប្រេង​ឥន្ធនៈ។

បុរសមាន​កូន​បី​នាក់​រូប​នេះ បាន​ថ្លែង​ប្រាប់​វីអូអេ​ថា៖ «នៅ​ពេល​នេះ​ខ្ញុំចំណាយ២ម៉ឺន​ kyats ​សម្រាប់ប្រេង​ឥន្ធនៈ​ក្នុង​មួយ​ថ្ងៃ តែមាន​ប្រាក់​ចំណូល​តែ ​៣ម៉ឺន kyats។​ តែ​បើខ្ញុំ​ត្រូវបង់ ​១ម៉ឺន kyats ​ឱ្យម្ចាស់​រថយន្តតាក់ស៊ី​ ខ្ញុំគ្មាន​ប្រាក់​ចំណូលទេ។ តែខ្ញុំអាចរស់រានបាន​ដោយសារម្ចាស់​រថយន្ត​តាក់ស៊ី​មិន​ទារប្រាក់​ជួល​រថយន្ត​នេះ​ទេ​ នៅ​ពេល​ពិបាក​នេះ»។

នៅមុន​រដ្ឋប្រហារ សាំង​ ឬប្រេង​ម៉ាស៊ូត​ថ្លៃ​ ៧០០ kyats ​ក្នុង​មួយលីត្រ។​ ពេល​នេះ វា​ឡើង​ថ្លៃ​ដល់​ជាង​១.៥០០​ kyats។ តែក្រុម​អ្នក​បើក​រថយន្ត​តាក់ស៊ីនិយាយ​ថា​ ពួក​គេមិន​អាចសុំ​ប្រាក់​ថែម​ទៀត​ពីអ្នក​ជិះ​ទេ ដែលនាំ​ឱ្យ​ពួក​គេ មិនអាច​បង់​តម្លៃ​ប្រេងឥន្ធនៈ​ និង​ថ្លៃ​ជួល​រថយន្ត​តាក់ស៊ីបានទេ។

លោក Min Wathan ជា​អតីត​អ្នក​កាសែត​ដែលក្លាយ​ជា​អ្នក​បើកប​រថយន្ត​តាក់ស៊ី​នៅ​ពេល​លោកបាត់​បង់​ការងារក្រោយពី​មានរដ្ឋប្រហារ។ លោក​បាន​និយាយថា៖ «ការ​បើក​បរក្នុង​ក្រុង Yangon មាន​គ្រោះ​ថ្នាក់ដែរ ​ពីព្រោះមានការផ្ទុះគ្រាប់​បែកញឹកញយ។​ គ្មាន​នរណាចង់​ធ្វើការ​ដោយ​មាន​គ្រោះ​ថ្នាក់​ ដោយ​គ្មានប្រាក់​ចំណូល​គ្រប់គ្រាន់​ទេ»។

ពួកអ្នកលក់ដូរ​ស្បៀង​អាហារថ្លែង​ថា​ កំណើនអត្រាប្តូរ​ប្រាក់​ដុល្លារ បាន​នាំឱ្យ​តម្លៃស្បៀង​អាហារដឹក​ចូលក្នុង​ប្រទេស​កើន​ឡើង​ពី ​២០%​ ទៅ​ ៥០%។ ជា​ពិសេស តម្លៃប្រេងចម្អិន​អាហារ ត្រូវ​លក់តាមរង្វាស់​រង្វាល់មួយ​របស់​មីយ៉ាន់ម៉ា​ហៅថា viss ដែលស្មើ​ប្រមាណ​ ១,៦ គីឡូក្រាម បាន​កើន​ឡើងជិតបី​ដង​ក្នុង​រយៈ​ពេល​តែ​ប៉ុន្មាន​ថ្ងៃ។

លោក Than Than Myint ជា​អ្នក​លក់​រាយ និង​លក់​ដុំនៅ​ក្នុងទី​ប្រជុំជន Pyawbwe នៃតំបន់​ក្រុង Mandalay។ លោក​បាននិយាយ​ថា៖ «តម្លៃ​ប្រេង​ចម្អិន​អាហារ គឺ​ប្រមាណ​ ២ពាន់ kyats ក្នុងមួយ viss តាមអត្រា​ ១.១៥០ kyats ស្មើ​មួយ​ដុល្លារ។ នៅពេល​នេះ​ វា​ឡើង​ថ្លៃ​ដល់​ប្រមាណ​ ៦ពាន់ kyats។ នេះជា​លើក​ដំបូងក្នុងប្រវត្តិសាស្ត្រ​ដែលតម្លៃប្រេង​ចម្អិន​អាហារ​ បាន​កើន​ខ្ពស់​បែប​នេះ»។

អ្នកស្រី​ Than Htay ស្ត្រីមេផ្ទះអាយុ​ ៥២​ឆ្នាំ​ក្នុង​សង្កាត់មួយនៃ​រដ្ឋធានី​ប្រទេសមីយ៉ាន់ម៉ា​បាន​និយាយប្រាប់វីអូអេ​ថា​ គ្រួសារអ្នកស្រី​មាន​សមាជិក​ប្រាំ​នាក់។ អ្នកស្រីថ្លែង​ថា៖ «ស្វាមី​និង​កូន​ច្បងខ្ញុំ​ជា​អ្នក​រដ្ឋការ។ កូន​បី​នាក់​ទៀត​គ្មាន​ការងារ​ធ្វើ​ទេ។ ខ្ញុំ​មិន​ដឹង​ជា​ចាត់ចែង​ចំណាយ​បែប​ណា​ទេ​ ជាមួយ​ប្រាក់​ចំណូល​ទាបតែ​ ៤​សែន kyats នៅ​ពេល​ម្ហូបអាហារ និង​ទំនិញ​ឡើង​ថ្លៃ​ពីរ​ដង​បែប​នេះ»។

អ្នកស្រី​បន្ថែម​ថា៖ «មានការ​ពិបាក​ខ្ចី​ប្រាក់​ពីអ្នក​ដទៃ ក្នុង​ពេល​ពិបាក​នេះ»។

រូបឯកសារ៖ មនុស្សម្នា តម្រង់​ជួរ​នៅ​ខាងក្រៅ​ធនាគារ​ដើម្បី​ដក​ប្រាក់​នៅ​ក្នុង​ទីក្រុង​រ៉ង់ហ្គូន ប្រទេស​មីយ៉ាន់ម៉ា កាលពី​ថ្ងៃទី១៣ ខែឧសភា ឆ្នាំ២០២១។
រូបឯកសារ៖ មនុស្សម្នា តម្រង់​ជួរ​នៅ​ខាងក្រៅ​ធនាគារ​ដើម្បី​ដក​ប្រាក់​នៅ​ក្នុង​ទីក្រុង​រ៉ង់ហ្គូន ប្រទេស​មីយ៉ាន់ម៉ា កាលពី​ថ្ងៃទី១៣ ខែឧសភា ឆ្នាំ២០២១។

អ្នកស្រី Nwe Yee Win ជាសកម្មជន​សិទ្ធិការងារ អាយុ​៣៧ឆ្នាំ​ និង​ជា​កម្មការិនីដេរ​សម្លៀក​បំពាក់ដែល​បាន​បាត់បង់​ការងារ​ដោយសារ​រោងចក្រ​អ្នកស្រី​បាន​បិទក្រោយពីមាន​រដ្ឋប្រហារ។

អ្នកស្រីបាន​និយាយ​ថា៖ «តាំង​ពីបាត់បង់​ការងារ​មក ខ្ញុំប្រុង​ប្រយ័ត្នណាស់អំពី​ការ​ចាយ​វាយប្រាក់កាស។ ខ្ញុំ​ភ្ញាក់ផ្អើលខ្លាំង​ ​ពេល​ខ្ញុំ​ទៅ​ផ្សារកាល​ពី​ថ្ងៃទី៣ តុលា។ អ្វីៗ​ទាំង​អស់​ថ្លៃៗ​ណាស់។ កាល​ពី​ខែកញ្ញា ដំឡូងថ្លៃ​តែ​ ១ពាន់ ២រយ kyats ក្នុង​ ១ viss។ ពេល​នេះ វា​ថ្លៃ​ ២ពាន់ kyats ក្នុង ១ viss»។

អ្នកស្រី Nwe Yee Win បាន​ថ្លែង​ថា៖ «ខ្ញុំពឹងពាក់​លើ​ប្រាក់​បៀវត្សរ៍​ប្រចាំ​ថ្ងៃ​របស់ប្តី​ខ្ញុំ។ គាត់ បានបាត់បង់​ការងារ កាល​ពី​ពេល​ថ្មីៗ​នេះ។ យើង​គ្មានប្រាក់​គ្រប់គ្រាន់​សម្រាប់​បង់​ឈ្នួល​ផ្ទះ​ទេ។ យើង​មាន​ផល​ប៉ះពាល់​ធ្ងន់ធ្ងររូច​ស្រច​ហើយ​ដោយសារ​ការរាតត្បាតនៃ​ជំងឺ​កូវីដ​១៩ ​និង​រដ្ឋប្រហារ។ ​ខ្ញុំមិនដឹង​ធ្វើបែប​ណាទេ​ដើម្បីបញ្ចៀស​ការស្រេកឃ្លាន នៅ​ពេលមានស្ថានភាព​អាក្រក់​បែប​នេះ»។

​ការ​ចុះតម្លៃ​ប្រាក់​ kyat នាំឱ្យ​មាន​ការ​ពិបាក​មិនមែនតែដល់​ប្រជារាស្ត្រក្នុងតំបន់​ក្រុងប៉ុណ្ណោះ​ទេ តែក៏​បាន​ធ្វើឱ្យ​លំបាក​ដល់ក្រុម​កសិករក្នុង​តំបន់​ជន​បទ​ដែរ​ ដែល​មានចំនួន​ ៧០%​ នៃ​ប្រជារាស្ត្រទាំង​អស់​របស់ប្រទេសមីយ៉ាន់ម៉ា។ ​កំណើនតម្លៃ​ជីមានផល​ប៉ះពាល់ដោយ​ផ្ទាល់​ដល់កសិករ។ តម្លៃជី​ម៉ាក Pearl បានកើន​ឡើង​ពី​៦៥.០០០ kyats ទៅ​ដល់ ៧៩.០០០ kyats ក្នុងមួយបាវ។

លោក Kyi Myint ជា​កសិករដែល​ដាំ​ស្រូវ​ និងល្ងនៅ​លើ​ដី​ ៨ហិកតា​របស់​លោក​នៅ​សង្កាត់​ Myaing ក្នុង​ក្រុង Magway។ លោក​បាននិយាយ​ថា៖ «ថ្លៃ​ជួលម៉ាស៊ីន​ច្រូត​កាត់​ នឹង​កើន​ឡើង​ពីរដងដោយសារតម្លៃសាំង​នៅ​ពេល​នេះ។ យើងស្រងាក​ចិត្តនឹងស្ថានភាពបច្ចុប្បន្ន»។

លោក Kyi Myint បាន​បន្ថែមថា ​ទោះជា​បានចំណាយ​ប្រាក់​ច្រើន​ជាង​មុនសម្រាប់​សម្ភារៈ គ្រឿង​ឧបករណ៍​ និងការ​ច្រូត​កាត់ក៏​ដោយ ក៏​កសិករមិន​ទទួលបានការ​ធានា​ថា​ ដំណាំ​របស់​ពួក​គេ ​នឹង​មាន​តម្លៃល្អ​ទេ។

ឧត្តមសេនីយ៍ Zaw Min Tun អ្នកនាំ​ពាក្យ​ក្រុម​ប្រឹក្សា​យោធា បាន​និយាយនៅ​ក្នុងសន្និសីទ​កាសែតមួយកាល​ពី​ថ្ងៃ​ទី​៣០ ខែ​កញ្ញា​ថា «មាន​កិច្ច​ខិតខំ​ប្រឹងប្រែង​ទាំងអស់​ ដើម្បី​រក​ដំណោះ​ស្រាយ​ល្អបំផុត»​ ចំពោះការ​កើន​ឡើង​នៃ​តម្លៃ​វត្ថុ​នានានេះ។

លោកបាននិយាយ​ថា៖ «យើង​មាន​ការ​ទទួល​ខុស​ត្រូវ​ក្នុងការ​ដោះស្រាយ​កំណើន​តម្លៃ​ប្រាក់​ដុល្លារ ​និង​មាស នៅ​ពេល​នេះ។ យើង​ នឹងខិតខំ​ព្យាយាមដោះស្រាយ​បញ្ហា​ទាំង​នេះ តាម​វិធី​ល្អ​បំផុត ទោះ​ជាវា​ប្រហែល​ជា​មាន​ខ្ចោះខ្លះ​ក៏​ដោយ»។

កាល​ពី​ថ្ងៃទី៣​ ខែ​តុលា ធនាគារ​កណ្តាលរបស់​ក្រុមប្រឹក្សា​យោធា​ ​បាន​ចេញ​ផ្សាយគោលការណ៍​ណែនាំ​មួយ​ថា​ ​ពួកអ្នកនាំ​ចេញ​ទៅ​លក់​ឯ​ប្រទេស​ក្រៅ​ នឹង​ត្រូវ​អនុញ្ញាតឱ្យរក្សា​ទុកប្រាក់​ចំណូល​នៃ​ការ​ជញ្ជូនទំនិញទៅ​លក់​ក្រៅប្រទេស​របស់​ពួក​គេនៅក្នុងគណនី​រូបិយវត្ថុ​បរទេស​របស់​ពួក​គេ​ ​ចំនួនតែ​៣០​ថ្ងៃ​ប៉ុណ្ណោះ។

ពាណិជ្ជករ​ក្នុងមូលដ្ឋានម្នាក់​នៅក្រុង​ Yangon ​ដែល​មិន​ចង់​ឱ្យ​គេបញ្ចេញឈ្មោះ​ បាន​និយាយ​ប្រាប់​វីអូអេ​ថា៖ «ចំណាត់ការ​នេះ ​ជា​ដំណោះស្រាយមួយ​សម្រាប់​រយៈពេល​ខ្លីដល់បញ្ហា​ប្តូរ​ប្រាក់​បរទេស​របស់​ប្រទេស»៕

ប្រែ​សម្រួល​ដោយលោក​ ឈឹម សុមេធ

XS
SM
MD
LG