ចាប់តាំងពីរដ្ឋប្រហារយោធានៅខែកុម្ភៈ កងទ័ពមីយ៉ាន់ម៉ា បានបង្ក្រាបក្រុមបាតុករប្រឆាំងរដ្ឋប្រហារ ខណៈការប្រយុទ្ធគ្នាដ៏គ្រោះថ្នាក់នៅតែបន្តផ្តោតលើកងទ័ពឧទ្ទាមដែលប្រឆាំងនឹងការគ្រប់គ្រងរបស់របបយោធា។
ខណៈកំពុងប្រយុទ្ធនឹងសង្គ្រាមនោះ ពលរដ្ឋមីយ៉ាន់ម៉ា ក៏កំពុងប្រយុទ្ធដើម្បីមានអ៊ីនធឺណិតប្រើប្រាស់ដែរ ព្រោះទីក្រុងរាប់សិបត្រូវបានគេរាយការណ៍ថា គ្មានអ៊ីនធឺណិត។
ប្រទេសនេះ បិទអ៊ីនធឺណិតជាយ៉ាងទៀងទាត់ស្ទើរពេញមួយឆ្នាំ ដោយរបបយោធានិយាយថា ដើម្បី«ស្ថិរភាព» ក្នុងកិច្ចខិតខំប្រឹងប្រែងទប់ស្កាត់ព័ត៌មានមិនពិត និងព័ត៌មានក្លែងក្លាយ។
កាលពីថ្ងៃអង្គារ អ្នកស្រី Htaike Htaike Aung សកម្មជនសេរីភាពអ៊ីនធឺណិត នៅប្រទេសមីយ៉ាន់ម៉ា បានប្រកាសនៅលើបណ្តាញសង្គមថា អ៊ីនធឺណិតនៅទីប្រជុំជន និងនៅក្រុងចំនួន២៥ ត្រូវបានកាត់ផ្តាច់។
ទោះយ៉ាងណាក៏ដោយ រដ្ឋាភិបាលយោធាមីយ៉ាន់ម៉ា បានបដិសេធមិនទទួលខុសត្រូវចំពោះការដាច់សេវានេះទេ ផ្ទុយទៅវិញរដ្ឋាភិបាលនេះ បានបន្ទោសកងកម្លាំងការពារប្រជាជនក្នុងស្រុករបស់មីយ៉ាន់ម៉ាចំពោះការដាច់សេវានេះ។ នេះបើយោងតាមអង្គការព័ត៌មាន Mizzima។
បញ្ហាអ៊ីនធឺណិតនៅប្រទេសមីយ៉ាន់ម៉ានៅឆ្នាំនេះ ត្រូវបានបង្ហាញឱ្យឃើញច្បាស់នៅក្នុងរបាយការណ៍របស់អង្គការ Freedom House។ អង្គការនេះ ចាត់ចំណាត់ថ្នាក់សេរីភាពអ៊ីនធឺណិតរបស់បណ្តាប្រទេសនានា ដោយផ្អែកលើកត្តាផ្សេងៗ ដូចជាការកំណត់ខ្លឹមសារនិងការរំលោភសិទ្ធិអ្នកប្រើប្រាស់ ដោយកំណត់មាត្រដ្ឋាន១០០ពិន្ទុ។ ប្រទេសមីយ៉ាន់ម៉ាជាប់ចំណាត់ថ្នាក់លេខ ៣០ក្នុងឆ្នាំ២០២០ ប៉ុន្តែឆ្នាំនេះ ប្រទេសនេះបានធ្លាក់ដល់ចំណាត់ថ្នាក់ទី១៧ ដែលមានន័យថា «គ្មានសេរីភាព»។
របាយការណ៍នេះរកឃើញថា របបយោធានេះ បានចាប់ផ្តើមបិទអ៊ីនធឺណិតភ្លាមៗ បន្ទាប់ពីរដ្ឋប្រហារ ហើយភ្លាមៗនោះ បានគ្រប់គ្រងនិយ័តករទូរគមនាគមន៍មីយ៉ាន់ម៉ា។ ស្ថានភាពនយោបាយដែលកំពុងបន្ត បានបណ្តាលឱ្យប្រតិបត្តិករដ៏ធំមួយនៅប្រទេសមីយ៉ាន់ម៉ា គឺក្រុម Norwegian group Telenor បញ្ឈប់ប្រតិបត្តិការនៅក្នុងប្រទេសនេះ។ បន្ទាប់មក របបយោធា បានរារាំងប្រព័ន្ធផ្សព្វផ្សាយសង្គម និងបណ្តាញព័ត៌មានតាមអ៊ីនធឺណិតយ៉ាងតិច៧។ កាលពីខែមីនា ប្រព័ន្ធផ្សព្វផ្សាយចំនួន៥ ត្រូវបានដកហូតអាជ្ញាប័ណ្ណ៕
