ការធ្លាក់ចុះនៃចំនួនភ្ញៀវទេសចរចិនកំពុងតែប៉ះពាល់ខ្លាំងដល់ហាងលក់រាយនៅក្នុងក្រុងហុងកុង ដែលហាងទំនិញធំៗបានពឹងផ្អែកលើលំហូរចូលនៃអ្នកធ្វើដំណើរមានទ្រព្យធនពីចិនដីគោក ចាប់តាំងពីការរឹតត្បិតការធ្វើដំណើរត្រូវបានលុបចោលកាលពីឆ្នាំ២០១៣ ដោយអនុញ្ញាតឲ្យភ្ញៀវទេសចរចិនដីគោកអាចធ្វើដំណើរដោយឯករាជ្យទៅកាន់ទឹកដីអតីតអាណានិគមរបស់អង់គ្លេសមួយនេះ។
អ្នកទេសចរចិនដីគោកមានចំនួនប្រមាណ៣ភាគ៤នៃភ្ញៀវទេសចរទៅហុងកុង ប៉ុន្តែចំនួននេះកំពុងធ្លាក់ចុះ ហើយហាងទំនិញធំៗកំពុងប្រឈមមុខនឹងបញ្ហាក្នុងការ «ផ្លាស់ប្តូរភ្លាមៗ» និងរក្សាការលក់របស់ខ្លួន។
លោក Sebastian Skiff នាយកប្រតិបត្តិនៃផ្នែកការអភិវឌ្ឍផ្នែកលក់រាយ និងការគ្រប់គ្រងទ្រព្យសកម្ម របស់ក្រុមហ៊ុន Colliers International Group ប្រចាំតំបន់អាស៊ីនិយាយថា៖ «នៅពេលអ្នកឃើញការធ្លាក់ចុះខ្លាំងដូច្នេះ វាកាន់តែពិបាកសម្រាប់ហាងទំនិញមួយក្នុងការឆ្លើយតបវិញយ៉ាងលឿនបែបនេះ ដោយសារតែទីតាំងជាច្រើនត្រូវបានគេជួលក្នុងកុងត្រារយៈពេលវែង។ ដូច្នេះ វាដូចជាការរុញច្រានទូកដ៏ធំមួយនៅក្នុងមហាសមុទ្រអញ្ចឹង»។
ហុងកុងកំពុងជួបប្រទះការធ្លាក់ចុះការលក់ទំនិញរាយដ៏ធំបំផុត ចាប់តាំងពីឆ្នាំ២០០៣មក។ រដ្ឋាភិបាល និងក្រុមហ៊ុនឧស្សាហកម្មបាននិយាយថា ការទិញគ្រឿងអលង្ការ នាឡិកាដៃ នាឡិកាព្យួរជញ្ជាំង និងទំនិញគុណភាពមានខ្ពស់និងមានតម្លៃផ្សេងទៀតបានធ្លាក់ចុះជិត ២៥ភាគរយនៅក្នុងឆ្នាំនេះ។
សេដ្ឋកិច្ចយឺតរបស់ចិនមានន័យថាភ្ញៀវទេសចរចំណាយក្នុងការទិញតិចតួច នៅពេលពួកគេទៅហុងកុង ហើយភ្ញៀវជាច្រើនសម្រេចចិត្តធ្វើដំណើរទៅកន្លែងផ្សេង ដោយសារតែការរឹតត្បិតទិដ្ឋាការសម្រាប់ជនជាតិចិនត្រូវបានសម្រួលនៅក្នុងប្រទេសឯទៀត។ ការបង្ក្រាបលើអំពើពុករលួយរបស់រដ្ឋាភិបាលចិនក៏ធ្វើឲ្យមានការធ្លាក់ចុះការទិញទំនិញទំនើបៗផងដែរ។
នាង Helen Mak ប្រធានជាន់ខ្ពស់នៃសេវាកម្មលក់រាយរបស់ក្រុមហ៊ុន Knight Frank ប្រចាំនៅក្រុងហុងកុង និយាយថា៖ «វាធ្វើឲ្យប៉ះពាល់ដល់ទីផ្សារលក់រាយទាំងមូល ដោយសារតែមនុស្សភាគច្រើនមិនអនុវត្តការទិញវត្ថុអនុស្សាវរីយឲ្យគ្នា ដោយសារតែមានកំហុសផ្នែកនយោបាយនោះឯង»។
ហាងលក់ទំនិញហុងកុងធំៗមួយចំនួនព្យាករថា ការធ្លាក់ចុះនៅក្នុងវិស័យទេសចរ និងការឈានទៅដល់ការធ្លាក់ចុះនៅក្នុងវិស័យលក់រាយនេះ នឹងកាត់បន្ថយនូវចំណូលបានពីការជួលហាងលក់រាយធំៗ ដល់ទៅ៤០ភាគរយនៅក្នុងរយៈពេល៥ឆ្នាំខាងមុខ។ ដើម្បីប៉ះប៉ូវនឹងការខាតបង់នេះ ហាងលក់ទំនិញធំៗជាច្រើនអាចនឹងជំនួសហាងលក់ទំនិញមានតម្លៃដែលមានទំហំច្រើនម៉ែត្រការ៉េ ជាមួយនឹងតូបលក់អាហារតូចៗវិញ។
ក្រុមហ៊ុន Swire Properties មានគម្រោងបង្កើនចំនួនហាងចំណីអាហារ និងភេសជ្ជៈនៅក្នុងហាងលក់ទំនិញរបស់ខ្លួនឲ្យបាន៥០ភាគរយក្នុងអំឡុងពេល២ឆ្នាំទៀត។ អ្នកវិភាគដូចជា លោក Forrest Chan ដែលបម្រើការនៅក្រុមហ៊ុន CCB International Securities បារម្ភថាការធ្លាក់ចុះនៃការលក់រាយនឹងប៉ះពាល់កាន់តែខ្លាំងដល់សេដ្ឋកិច្ចហុងកុង។
លោកនិយាយថា៖ «មានមនុស្សចំនួនច្រើនគ្រាន់បើដែរក្នុងវិស័យលក់រាយដែលមិនមានការងារធ្វើ ហើយពលករច្រើនណាស់ដែលមានបទពិសោធន៍នៅក្នុងវិស័យសេវាកម្ម។ ដូច្នេះ វាមិនងាយស្រួលសម្រាប់ពួកគេក្នុងផ្លាស់ប្តូរទៅធ្វើការនៅក្នុងវិស័យមួយទៀតនោះទេ។ ដូច្នេះ នៅក្នុងពេលខាងមុខ អត្រាអ្នកគ្មានការងារធ្វើនឹងកើនឡើងបន្តិចនៅហុងកុង»។
ការណ៍នេះអាចនឹងប៉ះពាល់ដល់វិស័យលក់រាយរបស់ហុងកុងកាន់តែខ្លាំង ខណៈពេលដែលហាងទំនិញធំៗពឹងផ្អែកលើពលរដ្ឋក្នុងស្រុកកាន់តែខ្លាំងឡើងៗ ដើម្បីទូទាត់សងការខាតបង់ប្រាក់ចំណូលពីការលក់ទៅភ្ញៀវទេសចរចិនដីគោក។ កាលពីឆ្នាំមុន ការចំណាយក្នុងវិស័យលក់រាយបានធ្លាក់ចុះជាង៨ភាគរយ ហើយអ្នកវិភាគទស្សន៍ទាយថា ការលក់រាយនេះនឹងធ្លាក់ចុះបន្តទៀតនៅក្នុងឆ្នាំ២០១៦៕
ប្រែសម្រួលដោយ ប៊ុន ប៉េងហ៊ុយ
