ស្របពេលដែលសហរដ្ឋអាមេរិក និងចិនកំពុងតែចរចាលើកិច្ចព្រមព្រៀងពាណិជ្ជកម្ម និងដែលមានការព្រួយបារម្ភផ្សេងៗកំពុងតែកើតមានឡើងនៅសហរដ្ឋអាមេរិក ពាក់ព័ន្ធនឹងគោលបំណងបច្ចេកវិទ្យារបស់ចិន តំបន់បច្ចេកវិទ្យា Silicon Valley ក៏កំពុងតែជាប់គាំងក្នុងទំនាស់រវាងប្រទេសមហាអំណាចទាំងពីរ។
គេហៅថា ឥទ្ធិពលលោក ត្រាំ។ កំណើននៃការរឹតបន្តឹងពីរដ្ឋាភិបាលលើការវិនិយោគរបស់ចិននៅតំបន់ Silicon Valley ធ្វើឲ្យរាំងស្ទះកិច្ចព្រមព្រាងពាណិជ្ជកម្ម។ ក្រុមហ៊ុនទើបបង្កើតថ្មីនានាថែមទាំងបដិសេធការវិនិយោគពីចិនទៀតផង។
បន្ទាប់ពីមានចំណងកាន់តែរឹងមាំជាច្រើនឆ្នាំរវាងប្រទេសចិន និងតំបន់ Silicon Valley តំបន់បច្ចេកវិទ្យាមួយនេះកំពុងតែជាប់គាំង ក្នុងការប្រជែងគ្នារវាងចិន និងអាមេរិក ក្នុងការបង្កើតបច្ចេកវិទ្យាទំនាក់ទំនងជំនាន់ថ្មីនានា។
លោក Michael Wessel សមាជិកគណៈកម្មាការត្រួតពិនិត្យសេដ្ឋកិច្ច និងសន្តិសុខអាមេរិក-ចិននិយាយថា៖
«កិច្ចប្រឹងប្រែងច្នៃប្រឌិតរបស់ចិន គឺទូលំទូលាយ និងស៊ីជម្រៅ។ ចិនចង់ក្លាយជាអ្នកដឹកនាំភាពច្នៃប្រឌិតលើពិភពលោក ហើយកំពុងតែធ្វើទាំងរឿងស្របច្បាប់និងខុសច្បាប់ ដើម្បីសម្រេចគោលដៅនេះ»។
អាមេរិកថា វិធីសាស្រ្តទាំងអស់នោះ រួមមាន ការលួចចូលប្រព័ន្ធកុំព្យូទ័រខ្នាតធំ ដើម្បីលួចអាថ៌កំបាំងក្រុមហ៊ុន ការបងំ្ខឲ្យមានការផ្តល់បច្ចេកវិទ្យាឲ្យទៅដៃគូភាគីចិន និងគោលនយោបាយរដ្ឋាភិបាលដែលផ្តល់រង្វាន់ដល់ការលួចកម្មសិទ្ធិបញ្ញា។
លោក Parag Khanna អ្នកអង្កេតការណ៍និងអ្នកនិពន្ធសៀវភៅ «The Future is Asian» និយាយថា៖
«ចិនចង់គ្រប់គ្រងពិភពលោកតាមរយៈបច្ចេកវិទ្យាបញ្ញានិមិត្ត ឬ AI។ បច្ចេកវិទ្យាចិនស្មើនឹងការនាំចេញនូវរបបផ្តាច់ការ»។
ប៉ុន្តែលោក Khanna ថា តំបន់ Silicon Valley មានអ្វីត្រូវខាតបង់ច្រើន បើអាមេរិកបង្កការលំបាកក្នុងការធ្វើជំនួញជាមួយវិនិយោគិន និងក្រុមហ៊ុនចិន។
លោក Parag Khanna បន្តថា៖
«បើមិនធ្វើការជាមួយចិន យើងមានលទ្ធភាពតិចជាងមុនក្នុងការទទួលបានព័ត៌មានពីអ្វីដែលពួកគេកំពុងធ្វើ ហើយពួកគេនឹងរកដៃគូផ្សេង។ យើងនឹងត្រូវកាត់ផ្ដាច់ចេញពីទីផ្សារទាំងស្រុង»។
រដ្ឋាភិបាលអាមេរិកចង់ដាក់ការរារាំងថ្មីៗ ពីព្រោះខ្លួនជឿថា បច្ចេកវិទ្យាដូចជាបញ្ញានិមិត្ត និងមនុស្សយន្ត គឺសំខាន់សម្រាប់សន្តិសុខជាតិ ប៉ុន្តែមនុស្សមួយចំនួននៅក្នុងវិស័យបច្ចេកវិទ្យាឃើញហានិភ័យក្នុងដាក់ការរារាំងទាំងនោះ។
លោក Tim Draper ដែលជាអ្នកបណ្ដាក់ទុននិយាយថា៖
«ខ្ញុំគិតថា យើងគួរតែបើកចំហ និងចែករំលែក។ ប្រទេសទាំងពីរទទួលផលប្រយោជន៍ខ្លាំងតាមរយៈការទំនាក់ទំនងដែលបើកចំហ។ ខ្ញុំជឿថា យើងមានបញ្ហាមួយ នៅពេលយើងដាក់ការរារាំងនានាដែលធ្វើឲ្យយើងខាតប្រយោជន៍»។
ក្រុមហ៊ុនចិនកំពុងតែប្រជែងគ្នាដើម្បីបង្កើតបណ្ដាញអ៊ីនធឺណិត 5G ជុំវិញពិភពលោក។ ហើយអាមេរិកថា ការណ៍នេះជាហានិភ័យមួយត្រង់ថា ចិនទទួលបានឱកាសបង្កើតការឃ្លាំមើលតាមប្រព័ន្ធអេឡិចត្រូនិក។
ទម្ងន់នៃហានិភ័យធ្វើឲ្យពិបាកទាយថា ចិននិងអាមេរិកនឹងមានកិច្ចព្រមព្រៀងបានយ៉ាងណា។
លោក Christian Brose ប្រធានផ្នែកយុទ្ធសាស្ត្រនៃក្រុមហ៊ុន Anduril Industries និយាយថា៖
«នៅពេលអ្នកមានការសន្ទនា ដែលភាគីម្ខាងយល់ថា ចិនកំពុងបង្កបញ្ហាសន្តិសុខជាតិ ហើយភាគីម្ខាងទៀតយើញចិនជាឱកាសពាណិជ្ជកម្ម វាជាភាពខុសគ្នានៃវប្បធម៌ និងការរំពឹងទុកដែលពិបាកនឹងសម្របសម្រួល។ ប៉ុន្តែ ខ្ញុំក៏គិតថា វាមិនមែនមិនអាចទៅរួចនោះទេ»។
ខណៈដែលរដ្ឋាភិបាលអាមេរិកចង់ធានាថា សហរដ្ឋអាមេរិកឈ្នះការប្រជែងផ្នែកបច្ចេកវិទ្យា តំបន់ Silicon Valley បារម្ភថា វប្បធម៌ទំនាក់ទំនងបើកចំហរបស់ខ្លួនអាចបាត់បង់៕
ប្រែសម្រួលដោយ ណឹម សុភ័ក្រ្តបញ្ញា
