ប្រជាពលរដ្ឋនៅក្នុងខេត្តសៀមរាបបានចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃអាទិត្យនេះយ៉ាងសស្រាក់សស្រាំ ដោយពួកគេចង់បានមេឃុំមួយដែលមានភាពស្អាតស្អំ ជួយការអភិវឌ្ឍ និងចេះជួយទុក្ខធុរៈប្រជាពលរដ្ឋហើយការសម្រេចចិត្តរបស់ពួក គេគឺផ្ដោតសំខាន់ទៅលើបុគ្គលជាជាងគណបក្សនយោបាយ។
ការិយាល័យបោះឆ្នោតមួយចំនួននៅខេត្តសៀមរាបរួមមាន នៅក្នុងអនុវិទ្យាល័យមិត្តភាពខ្មែរជប៉ុនព្រះឥន្ទកោសា ការិយាល័យបោះឆ្នោតនៅក្នុងវិទ្យាល័យ ១០មករា១៩៧៩ ការិយាល័យបោះឆ្នោតនៅក្នុងសាលាបឋមសិក្សាកេសរារាមជាដើម មានប្រជាពលរដ្ឋមកឈរតម្រង់ជួរចូលបោះឆ្នោតយ៉ាងច្រើនកុះករ។
ចាស់ជរា ស្ត្រីមានផ្ទៃពោះ អ្នកមានកូនតូច ត្រូវបានអនុញ្ញាតអោយចូល ទៅបោះឆ្នោតដោយមិនចាំបាច់តម្រង់ជួរ ឬចាប់លេខនោះទេ។
ប្រជាពលរដ្ឋចូលរួមបោះឆ្នោតក្នុងខេត្តសៀមរាប ដែល VOA ធ្វើការសម្ភាសន៍សុទ្ធតែបានអះអាងដូចៗគ្នាថា ការបោះឆ្នោតរបស់ពួកគេសំខាន់ គឺគិតទៅលើសកម្មភាព និងសមត្ថភាពរបស់បុគ្គលច្រើនជាការគិតលើគណបក្សនយោបាយ។
យុវជន សាត សំ អាយុ២៧ឆ្នាំ ជានិស្សិតផ្នែកទេសចរណ៍ រស់នៅឃុំអំពិល ស្រុកប្រាសាទបាគងខេត្តសៀមរាប។ យុវជនរូបដែលបានបោះឆ្នោតរួចរាល់ហើយនោះបានឱ្យVOAដឹងថា មេឃុំដែលគាត់ជ្រើសរើសនោះសំខាន់គឺចេះជួយប្រជាពលរដ្ឋ នៅពេលមានបញ្ហា ទោះបីជាមេឃុំនោះមកពីគណបក្សណាក៏ដោយ។
«អោយតែមេឃុំដែលអាចជួយដោះស្រាយនូវបញ្ហាប្រជាពលរដ្ឋបានទោះគាត់មកពីបក្សណាក៏ដោយក៏អត់បញ្ហាដែរ មានន័យថាពួកគាត់រស់នៅជាមួយប្រជាពលរដ្ឋ អីចឹងពួកគាត់ដឹងពីសុខទុក្ខឬក៏បញ្ហារបស់ប្រជាពលរដ្ឋ ។ អញ្ចឹង បើយើងអាចជ្រើសរើសនូវមេឃុំល្អ បានន័យថាយើងអោយគាត់ជួយដោះស្រាយនូវរាល់បញ្ហាផ្សេងៗឬក៏ជួយអភិវឌ្ឍន៍បន្ថែមនូវចំណុចខ្វះខាតដែលមាននៅក្នុងភូមិឃុំពីព្រោះជាធម្មតាថ្នាក់លើពួកគាត់មិនបានស្និទ្ធស្នាលឬក៏ដឹងសុខទុក្ខពីប្រជាពលរដ្ឋនោះទេ»។
លោក ចាន់ សុភាព មន្ត្រីអង្គការក្រៅរដ្ឋាភិបាលដែលបានចូលទៅបោះឆ្នោតនៅការិយាល័យបោះឆ្នោតនៅក្នុងវិទ្យាល័យ ១០មករា ១៩៧៩ បានអោយដឹងដែរថា គាត់បានចូលរួមការបោះឆ្នោតជ្រើសរើសក្រុមប្រឹក្សាឃុំ-សង្កាត់គ្រប់ទាំង៤អាណត្តិ ហើយការបោះឆ្នោត ទាំង៤ដងរបស់គាត់នោះគឺមានការផ្លាស់ប្ដូរ។
បុរសវ័យ៤៣ឆ្នាំរូបនេះ ក៏បានអោយដឹងបន្តថា លោកត្រូវតែបោះឆ្នោតរកមេឃុំណាដែលគិតគូរសុខទុក្ខរបស់ ប្រជាពលរដ្ឋ ហើយមេឃុំដែលមិនបម្រើប្រជាពលរដ្ឋ ទោះបីជានៅក្នុងបក្សដែលលោកចូលចិត្តយ៉ាងណា ក៏គាត់មិនបោះអោយដែរ។
«ទាល់តែគាត់ចេះជួយយកចិត្តទុកដាក់ប្រជាពលរដ្ឋ បើមិនជួយប្រជាពលរដ្ឋទេក៏យើងមិនបោះអោយដែរ។ យើងគួរបោះអោយនរណាដែលល្អសម្រាប់ប្រជាជនយើង»។
ដៃម្ខាងកាន់កង្ហារតូចប្រើថ្ម និងដៃម្ខាងទៀតទប់កូនអាយុបួនខែ ដែលបានស្ពាយនៅពីមុខយុវជន ខុម ក្រឹម អាយុ២៦ឆ្នាំ រស់នៅក្នុងសង្កាត់ស្លក្រាម ស្រុកសៀមរាប ខេត្តសៀមរាប។ យុវជនរូបនេះ បានអោយដឹងថា មេឃុំ ដែលគាត់បោះឆ្នោតគឺត្រូវចេះ ជួយប្រជាពលរដ្ឋដោយមិនប្រកាន់និន្នាការនយោបាយ។
«អញ្ចឹង បើមេភូមិគាត់ប្រកាន់គំនិតថាខាងណាក៏គាត់ជួយអោយតែប្រជាពលរដ្ឋនៅក្រោមការគ្រប់គ្រងរបស់គាត់ ខ្ញុំចូលចិត្តពេញចិត្តបោះអោយគាត់ បក្សមិនមែនចុះមកភូមិឃុំផ្ទាល់ទេគឺមានតែមេភូមិមេឃុំទេដែលនៅជាប់ជាមួយយើងផ្ទាល់។ អីចឹងគាត់ដឹងសុខទុក្ខប្រជារាស្ត្រច្រើនជាងថ្នាក់លើ។ អញ្ចឹង យើងរើសអ្នកដែលនៅជាប់ជាមួយយើងផ្ទាល់ ការងាររបស់យើងវាល្អ។
នៅក្នុងបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤នេះ នៅតាម ការិយាល័យ បោះឆ្នោតមួយចំនួនក្នុងខេត្តសៀមរាប គេសង្កេតឃើញថាមិនសូវមានបាតុភាពបាត់ឈ្មោះ ឬមិនអាចចូលរួមការបោះឆ្នោតដូចពេលកន្លងមកនោះទេ។
ទោះបីជាយ៉ាងណា នៅតាមការិយាល័យខ្លះមានប្រជាពលរដ្ឋឈរតម្រង់ជួរច្រើនពេកធ្វើអោយមានការជជែកតវ៉ាក្នុងការប្រជែងគ្នាចូលមុន ដោយប្រជាពលរដ្ឋខ្លះ បានស្ដីបន្ទោសដល់មន្ត្រីដែលបម្រើការនៅក្នុងការិយាល័យបោះឆ្នោតថាមានភាពលម្អៀង និងប្រកាន់បក្សពួក។
ជាក់ស្ដែង អ្នកស្រី សែម សោភា អាយុ ៥៥ឆ្នាំ ជាប្រជាពលរដ្ឋរស់នៅសង្កាត់ស្លក្រាម ស្រុកសៀមរាប ខេត្តសៀមរាបដែលកំពុងរងចាំបោះឆ្នោតនៅការិយាល័យអនុវិទ្យាល័យមិត្តភាព ខ្មែរ ជប៉ុន ព្រះឥន្ទកោសាបានសំដែងការមិនពេញចិត្តថាអ្នកស្រីរង់ចាំអស់រយៈពេលជិតបីម៉ោង ទៅហើយនៅមិនទាន់បានបោះឆ្នោតទៀត។
ក៏ប៉ុន្តែអ្នកស្រីប្ដេជ្ញាថានឹងតស៊ូបោះឆ្នោតអោយបានដើម្បីជ្រើសរើសរកមេឃុំដែរល្អម្នាក់សម្រាប់ការអភិវឌ្ឍភូមិឃុំ។
«មានអ្នកប្រជ្រៀតចូល គេចូលបាន តែនេះទើបតែថយមកវិញ ទើបតែប្រកែកគ្នាខ្លាំងមែនទែនចុះថយមកវិញ មកយកលេខនៅក្រៅ អង្គុយចាំយូរចង់កើតខ្យល់»។
នៅក្នុងខេត្តសៀមរាប មានគណបក្សនយោបាយចំនួន៧ បានចូលរួមប្រកួតប្រជែងក្នុង ការបោះឆ្នោតឃុំ-សង្កាត់នាថ្ងៃអាទិត្យ រួមមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សសម្ព័ន្ធដើម្បីប្រជាធិបតេយ្យ គណបក្សហ៊្វុនស៊ីនប៉ិច គណបក្សខ្មែររួបរួមជាតិ គណបក្សសាធារណរដ្ឋប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យ។
លោក មុត មល្លា ប្រធានគណៈកម្មាធិការប្រតិបត្តិប្រចាំខេត្តសៀមរាបនៃគណបក្ស សង្គ្រោះជាតិ បានអោយដឹងថាស្ថានភាពការបោះឆ្នោតលើកនេះមានភាពល្អប្រសើរជាងពេលកន្លងមក បើទោះបីជាមានភាពអវិជ្ជមានខ្លះក៏ដោយ។
ជាមួយគ្នានេះដែរ លោក ឃឹម ប៊ុនស៊ុង អភិបាលខេត្តសៀមរាប និងជាប្រធានគណបក្សប្រជាជនកម្ពុជាប្រចាំខេត្តសៀមរាប បានឱ្យដឹងថាស្ថានភាពការបោះឆ្នោតដែលមានសភាពល្អប្រសើរនេះគឺដោយសារមានការរៀបចំ និងការចូលរួមបានយ៉ាងល្អពីគ្រប់មន្ត្រីពាក់ព័ន្ធទាំងអស់។
«ជារួមទៅគិតទាំងការយកចិត្តទុកដាក់របស់ថ្នាក់ការពារគណកម្មការរបស់យើងគ្រប់ជាន់ថ្នាក់ដែលបានខិតខំការពារតាំងពីការឃោសនារហូតដល់សន្តិសុខសុវត្ថិភាពតាមការិយាល័យបោះឆ្នោតផ្សេងៗ ក៏យើងធ្វើបានល្អហើយប្រជាពលរដ្ឋក៏យល់ច្បាស់ពីការទៅចូលរួមការបោះឆ្នោតនេះ»។
លោក ផល ប៊ុនគី លេខាអង្គការខុមហ្វ្រែលប្រចាំខេត្តសៀមរាបក៏បានទទួលស្គាល់ដែរចំពោះស្ថានភាពល្អប្រសើរក្នុងដំណើរការបោះឆ្នោតនេះ ក៏ប៉ុន្តែនៅមានចំណុចខ្វះខាតមួយចំនួន ដែរដូចជាយ៉ាងហោចណាស់មានការិយាល័យបោះឆ្នោតចំនួនពីរបានបោះត្រាច្រលំលើសន្លឹកឆ្នោតជាដើម។
ជុំវិញភាពមិនប្រក្រតីទាំងនោះលោក នឹម វ៉ាន់សម ប្រធានគណៈកម្មាធិការខេត្តរៀបចំការបោះឆ្នោតប្រចាំខេត្តសៀមរាប បានអោយដឹងថាចំពោះការបោះត្រាច្រឡំលើសន្លឹកឆ្នោត គណបក្សនយោបាយបានយល់ព្រមទទួលយកជាផ្លូវការហើយ។
ក្នុងខេត្តសៀមរាបមានឃុំចំនួន១០០ ក្នុងស្រុកចំនួន១២ ដែលមានការិយាល័យបោះ ឆ្នោតចំនួន១.៣៨៩ ការិយាល័យហើយមានប្រជាពលរដ្ឋដែលមានឈ្មោះនៅក្នុងបញ្ជីបោះឆ្នោតចំនួន៤៩៣.៦២៦នាក់។
កាលពីការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៣កន្លងទៅ គណបក្សប្រជាជនបានទទួលជោគជ័យចំនួន៩៨ឃុំ ហើយ ២ឃុំបានទៅលើគណបក្សសម រង្ស៊ី ដែលសព្វថ្ងៃក្លាយជាគណបក្សសង្គ្រោះជាតិ ក្រោយពីរួមបញ្ចូលគ្នាជាមួយគណបក្សសិទ្ធិមនុស្ស៕
